KA ṬAWNGṬAINA NGHIL AM AN TA?

Tienami pakhata chun hieng hin an ziek a. Khawsak lal pakhat hin a ramsûnga mi var ruol, a khâwnbâwlhai chu a ko khâwma. A lungngai le beidawng huna ama inhnêmna dingin thil iengam a ni pe seng dingin a ngên tâwl a. Khâwnbâwl upahai laia mi pakhat chun kutsebi, "This too shall pass" ti thu inker hi a pêk a. Lal chun harsatna le lungngaina a tuok châng chu kutsebi chu a en hlak a. A lungngai nun hnêmna in a hmang rawp hlak a ni an tih. Hi thu hi vawisun chena infuina thu hlun a la ni zing a nih

Khawvêl mihriem taphawt hi mâni tâwk senga phurrik phur a, nun beidawng le lungngai hun nei hlak ni ngei ei tih. Beidawngna le lungngaina hi mihriem hringnun le inzawm tlat, ei damsunga ei tuok ve ngei ding, ei pumpel theilo thil chu a nih. Hringnun hi lungngaina sûmpui in a tuom rawp hlaka. Hi lei hi ni ngei a tih, English novelist Thomas Hardy chun hieng hin a lo tih, "Happiness is but a mere episode in the general drama of pain". (Hlimna hi chu khawvêl natna le rinumna rama hin a châng chânga hung inlang ve zau hlak a nih). 

Mi ṭhenkhat, sin zawnga lekha inchûktuhai chu an beisei angin sin an zuk hmu el thei ta naw a. Nu le pa an hung upa in an tar tah a, sin thawthei ding ngirhmuna khawm an um ta nawh. Chu huna chun sin nei ngei tumin nasatakin ṭhang an lâka, inrimtakin lekha an tiem a, hun zalên hrim an nei ve thei ta nawh. Exam an pêk thei hunsûng kumbi thliek hlak inkhêl el thei ding ngirhmuna an um tah. Chuonglaizing chun mi ṭhenkhat awlsam taka sin hmu an hung uma. Mâni mawphurna phur zo loa inngaina chen lungrila a hung pieng a. Beidawngna ruoma an pil ta hlak a nih.

Chuongang bawkin fâk zawngna kawnga hmuingil tuma kawng dang dang dapa sinthaw an um hlak a; sumdâwng, ran vâi, huon siem le inrimtaka lo sinthaw in an um a. Nisienlakhawm, an sin inrimna ra chu an beisei angin an sîk thei ta naw a. Kutbentheka um el khawm an um rawp hlak. Chuonghai ta ding chun mihriem hisâpna a buoi a, kumtluona an inrimna chu favâi laia inzun ang chau a lo ni tah. Chuonglaizing chun Pathien ngaisaknaw mihai chu an inno hlut hlut a, mi hmuingil tak angin an inlang hlak a. Chu pha chun a nih, Inpâkna hla ziektu angin ei sirbi an phet vâng vâng châng a um rawp hlak. Inkhat nu le pa, nauhai hmakhuo ngâitu ta ding chun 'Ka lâwm ie Lalpa' ti chu intak hle dingin ring a um. 

Mihriem ngaia hieng hlawsamna ei tuok châng hin chu Pathien lâka lungawi harsa ei tih a. Ama ei mawsiet nuom hiel hlak a nih. Amiruokchu, ei ta ding bîka Pathien hunruot (timeline) a um ve a, a huntiem a tlung ve hun a la um ding a nih. Chu hun chu ei nghâk hrâm hrâm nuom a um. Vawitam hlawsamin lo beidawng hlak tah ni inla khawm; Peter angin, "Nisienlakhawm, I thuin lênhai dêng nâwk ka tih" ti thei dingin insiem ei tiu. 

 

Lal Solomon meu khawmin a hrietthiem ve lo ni sien khawm, nunghak le tlangvâl inhmangaina chungchâng khawm hi ka hril sa nuom chu a nih. Asanchu, mi tamtak mitthli suk fartu a ni hlak si a. Mihrâng, Pu C. Ṭhuamluaia (a thlarau muongin chawl sien) khawmin, "Hmangaihna in tih hi a ṭha lo a ni ang, ṭahna a ni" a lo ti pha hiel a nih. 

Tleirawl inhmangaina a bul ṭan in, hun tamtak hlimna le lâwmna, harsatnahai khawm lo paltlang tah. Thienghlim taka hmangaina lidama an intâwl zing lai chun beiseinaw tieng takin suor hrata an intâwl lûta. A tawpa chun mihriem tuorna tawpkhawk hrilfietu mitthli a hung far ta hlak a nih. 

Lungril dit zâwng le nuom zâwng, mizie inhre sa vawng ta chun hmatieng hun ding chen dâwn khâwl in duthu an lo sâm ve hlak a. Kristien sûngkuo indina damlaini tiem chu an beiseina ni ve ngei a tih. Sienkhawm, mihriem remruotnahai chu a hung tlawl a. Ringumnawna lei dâm, nu le pa le sûngkuo remti nawna lei dâm le, thil dang dang lei dâmin chuong beiseinahai po po chu sûm lai an zâm ral tah. Chu pha chun a nih hmangaitu lungril chu sun ang elin a na a. A taksa chenin a tuor pha hiel hlak. Chu a nun beidawngna chu hrethiemtu ding a zâwng ruoi hlaka. Khawvêla hin damsan hrim neiin an hriet ta nawa. Mal ngawi ngawia inhrietna a neia, mâni inngaisietnain a hun tamlem a hmang tah a. Hringnun hi a nghawkin a nghâwka. Iengkim el hin a lung a suk lên hlaka. Khawvêla hin lungkham bângna ding an vâi a, nun sâwl takin an thuok hlêp hlêp hlak a nih. 

A ni ngei, mihriemin ei nuna harsatna ei tuok dânhai chu inang vawng naw ni a. Ei harsatna tuok chit hi ei ta ding chun a rik a, ei sâwl in ei châupui hiel hlak a nih. Thina- lusûn leia ṭap dâm, natna khirtak leia beidawnga indawmkûn hun dâm, vangduoina le hlawsamnahai ei tuok châng khawm um a tih. Chu huna chun hi thu hin ei lungril suk tharin, infui nawn hlak inla nuom a um takzet. 

"This too shall pass. 

It might pass like a kidney stone. 

But it will pass."

("Hi khawm hi hunin la liempui a tih. 

Kal a lung angin a liem el rawi mawh.

Sienkhawm, a la liem ngei ding a nih.") 

Krista, Pathien Hring neituhai hi ei hringnuna harsatna ei tuokhai lei hin châu sawng el ding ei ni nawh. Hieng natna le rinumnahai hi a tuorlai chun rinumin inlang  hlak sien khawm, nikhat chu hieng thilhai po po hi lâkhmangin la um a ta, a la bo vawng ding a nih. Tuorsel takin ṭhang fan fan ei ta, Pathien zârin thi pui êm naw mei nih. Mupui angin ei hrâtna chu siemtharin a um nâwk hlak ngei ding a nih.

Harsat a zuolin, 

Beidawng el naw la;

Vangneina kâwl hmatieng

La hung eng ngei a tih. 

I lungril lungkhamna'n tuomin, 

Hmatieng eng hri naw sien khawm;

Vantieng i mit hang inlên la

Pathien chu a hnai zing i bula. 

Pathien a hnai zing bâng rawh; (2)

Pathien a hnai zing, 

Nauang tap lai bâng rawh.

Riekmaw Cabin

28, Feb 2022