Nî chu a lum hle el a, boruok chu an up deu chur bawk a. Bandh le strike tamna ni hlak Manipur ram, Tuiṭhaphaia hin thlifîm chen khawm hi 'bandh' in a um ve am an tah? Annawleh, mihriem duamna hleiluot leiin leilung chu nasataka suosam in a um taa. Leilung lungnilo leiin thlifîm hrang hieu hieu hlak hai khawm an 'strike' ve am an ta aw ti dingin a um. Chuongang boruok mi tuomvêl le mipui inzie nei nuoi kâra chun to ṭawkin mihai chêtzie chu ka thlîr zinga. Mîzie chi hrang hrang, ennuomum le hlimum tak tak hmu ding a um a. Chuonglaizing chun lungrila ngaituo zawm ding thil dâm, nundân mak tak tak le ngaituoum taka khawsa hmu ding an um nuol bawk. Hringnun hi a va'n khairuol naw ngei deh!
Mipuihai chu hunbi tiem hnawta inhmaw taka an intlân pel suou suou kara chun, lungkham reng nei loa tuolleng an inkat nuk bawk a. Kut inchel meuin nunghak le tlangvalhai khawm chu indi rielin an lêng vêl a, kâwla ni liem ding thlîr chu an hun intawina ni ve ngei a tih. Lirthei man to le mawi tak taka sûngkuo nun hlim hmel êm êma khawsa an um laiin, vawisûn hi an khawvêl nun tâwpna ding nî ni âwm taka hmel lungngai em em el, thim kulpui nêr ding ang el a hmatieng kal pên hrat ngamlo hmu ding an um nuol bawk. Chuongang boruok kara chun thlan luong nguoi nguoia sin rum thaw hmu ding an um bawk.
Kâwmkara tuol thuomhnaw le thlan phul buon buona tlangvâl in suodur le bawngtuthlaw an let vel chun thlîrtu hrim a nei ve nawh. Lêngruol nunghak mit lâk zâwng a ni ve naw ni ngei a tih. Ennuomum ti taka thlîrtu chu kei chau ka ni el âwm. Kawtthlêr lûnlai taka nû kalpen inâwt tliei tliei chun a hmêla hlimna chu a hlie a, a phur chau niloin a lungril ngaituona khawm chu a rik hle a ni ti inhmai ruol a ni nawh. Lamlien sîr le kawr dung hrûta nun inhnuoi tak hraw khawm an um bawk. Anni hai chun tu ihrietfuk le ngaisak an hlaw nawa, mihriem ni ve siin tlâng lampui le kawthlêr lûnna hmun hai chu an chang zo ve ta naw a nih. Nisa hnuoia khawvêl hmang seng seng nun hi a van thlau ngei de aw...!
Thingpui no chu dawkân a chun ka tet ri khak a. Nu 'Mawii Hotel' chu ka suoksan tah a. In tieng panin ka lâwn hnep hnep a. Hotela thingpui rielno khat chau ka dâwn sûnga ka thil hmuhai chun ka ngaituona lairil an fanga. Thil dang ngaituona ding hrim an leng ve ta nawh. Mitinin ei duthusam le ei izawng chu nun inhawitirna, hlawtlingna le hadamna hai hi ni mei a tih. Sienkhawm, chu ei zawngna lampuia chun ei nuom dân sengin ei tlân a, ei khawtlâng nunze mawi le ei Kristienna chen ei theinghil pha am an ta aw ti thei dingin a um tah.
Ei khawtlâng nun ei en a, inpawngnêkna le indaidanna in bu a khuor mêk tah. Mi thilthawtheihaiin mi rimsie le pasiehai chan-ai ding an kei hêk a. An buzênga an seng lût a. Thieng le thienglo dâwn loin hlâwkna hnawtin kiltin an hrûta. Kut tlingloa an huoi lut hausakna chun an invur pâwnga. In ropuitak le an huonna bang insâng tak sûnga chun chawng an chên a. An kul puotienga mi rimsie le pasiehai nun harsatna hrim an hmu phâk ta ngai nawh. Duâmna le hmasielna lei chun ṭam kâwr vâng angin an inno hlut hlut a. Chuong thilhai chu 'malsawmna' tiin hming mawi takel an inbuk a. An in le lo, rothilhai chu iengkim hretu Pâ kuoma inhlan thienghlim dingin rawngbawltu hrieknâl ngei chu an beisei nâwk pei bawk si. Chau chu niloin, Pathien ramlienna tiin thilpek ṭhahnem tak tak Kohran rawngbawlna ah an sung lût a. Chuong thilhai chu lawmtakin pulpita inhlân thienghlim in a um pei hlak bawk. Chuongang mi thilthawthei hai chu khawtlâng le kohrana mi inzakaia ei ruot nawk ang lawi si. Puipungna thila hai dawsâng chunga ei inṭhungtir a. Ditsakna thangsuopuon ei inhliea, ei khâwi ngam pei chu an tah.
Chau chu an nawh, mi chung en an nina chu an nauhaiin an hung sawm ve pei a. Khawtlâng le Kohrana hming hlieuna nei rawp hlak hai sien khawm roreltuhaiin an suksuolna an hmu ṭhel rawp a. An chunga dân anga thununna kengkaw ngam an um meu nawh. Chuonglaizing chun, mi pasie nau, kâwmkara seilien ve naran in khawtlâng hrieta thil mawilo a lo thaw pal chun nataka chuk hrawn a ni hlaka. Lunginsietna ṭhang dêr loa sawisa nuomtu khawm an bâng nawh. A nun harsatna hrethiemtu le lainatu a nei ve naw a. Mi suol bîk rieu angin an lang lem ta hlak.
Hun tawite sûnga ka thil hmuhai chun ka ngaituona a ṭhuoia. Ei ram khawtlâng nun ei en a; indikna a chuoi tah a, ringumna chu kawtthlera a tlu ta am a ni aw ti thei dingin a um. Ei chêngna Kristien rama hin; mihriemin a mihriem chanpui chunga inzana a kiem a, ei Kristienna nun in pâr insuo loin, ei thlazâr hnuoia mi an châwl-dam thei ta si naw chun, khuo le vênghai ta dinga hling ei inchang lem ta hlak a nih. Chu ngirhmun ngei chu a nih hringnun hringlo nun chu!
Chuleiin, ziekmi ropui Mafaa Hauhnar in, "a felna hlîngin mi a chhun ve ngai lo" a lo ti angin. Ei inchûk insângna le ei thiemna hai hin mi khêng chîng ngai naw inla. Ei felna le ṭhahnemngaina hlingin mi sun naw sien, ei thiemna hriem hin mî hliem bawk naw raw seh. Eini anga hamṭhatna dawng ve phâk lohai chunga hmusitna inlangtir ngai naw bawk ei tiu. Mî tukhawm hmusit dingin Pathienin malsawmna'n a min thuom naw a. Mî a pasiet lei am a nih, midang a phâk zo naw lei ringawt lem chun hmusit ngainaw nâwk zuol inla nuom a um takzet. Khawvêl mita chun mî ditsak le thlîr bîk khawm ei lo ni el thei. Amiruokchu, ei ngirhmun ṭhat bîk lei ringawtin mî chungtlâk chîng mi ei ni ding a ni nawh. Ama, zaipu K. Hminga hla hi in enfiena in hmang mawl ei tiu.
Zirna rûn sâng hrut chhuak a,
Thiamna-lehkhamawi târah,
Finna aia chapona zirchhuak,
Hretam ber a inchhal,
In thiamna hriam khan mi a hliam.
In vanneih a siamin,
Râwn kai in chang leh si.
Dinhmun ṭhatna atanga mi hmuhsit ching te,
Thiamna sang tak aṭanga mi chungtlak ching,
Thihna hmaa angkhata kun za theuh tur hi,
Tu nge inthlei thei?
A pawimaw tak chu; Vân hmangaina Kalvari a inthawka hung pârsuok ngei kha ei nun senga hin hung indâwn thar nawk sien, ei kohran le khawtlânga hin hmangaina tui ang hung luong mawl raw seh!
Riekmaw Cabin!
21st Feb 2022
Amen! 🤘🏻
ReplyDelete🙏
DeleteNamata
ReplyDelete