KA ṬAWNGṬAINA NGHIL AM AN TA?

Ka Pathien aw, ka Lal Pathien, 

Ienga dim i mi maksan a? 

Ka ṭawngṭaina'n a hung zui che, 

Ka ṭawngṭaina bek hi lo ngai ta. 

Mihriem nun hi a beidawng tak tak chun ei nghatna tieng tieng hi a dawng vawnga. Lungkham bângna ding ei zawng ruoia. Ei hmu si nawh. Van ei en la an sânga, hnuoi ei en le a dawnga. Ei indawmkun thlawk thlawk a. Vân tieng ei hang nghaa, Pathien kuoma ei ṭawngṭaia, a mi mâksan am an ta aw ti thei dingin a re thlawk thlawk a. Dawnna ri nekin a re ri chu an ring lem a. Lung hi a na vawng vawng hlak chu a nih. 

Chuong ang hun khir le harsatna chu Mihrâng Rev. Thangngur khawm khan  a lo tuok ta hlak chu ni ngei a tih. 

Ka ṭawngṭaina nghil am an tah? 

Ka ṭawngṭaina bêk hriet ni sien;

Mi dang chu ko naw ning Lalpa, 

Nang ka hmangaitu naw hi chu. 

tiin a lo inzawt hiel a nih. Mihring rama hin vangduoina a la fe tluong pei a. Hnuoirama ei beiseina chu a hung tlâwna. Hnuoitieng thila ei beiseina le innghatna hai po po chu sukchim pêk in ei um a. Chu huna chun ṭhangpuitu ding ei invai a. Midang ṭhangpuitu ding hrim ei hriet nawh. Hmangaitu Lalpa Isu chau naw chu! 

Ama, zaipu Pu Laibata khawmin hieng hin a lo inzâwt ve hiel a nih. 

Aw Lalpa, lungngaiin ka khat thin, Vanduainate'n min hual vel a; 

Tah leh rumna thlalerah hian, 

Mittui nen ka rawn zawng ve a che.

Aw, ka Lalpa, ka mangan zawng zawng hi, 

I kutah ka kawl tir a che; 

Nang lungngai fate hnemtu chuan, 

Kei pawh min lo hnem ve ang che.

Ṭhen le ruol, khuo le veng an hmuingil thûr thûra. Fâk zawngna kawnga le inchûk thiemna kawnga khawm an hlawtlingin an kamding zo tah. Pathien hin thlierbîk a nei hiel am a ni ti châng a bo nawh. Ṭâwngṭaina le theitawpa ṭhang ei lâk ve khawm hin hmakhuo a eng in an lang naw a.  Theitawp chu a tawp taa. Ei khawvel sâwrchin in a um a. Mi laka inkiltawi na le, chan sie bîk rieua inngaina chen a hung tlunga. Lâwmna ding hi a vâng hlak a ni maw... 

Mihriem remruotna chun damsung khawsak inhawina le chanṭha lem beiseiin inchûkna kawnga hma lâk dâm, sumdawngna dâm, lo sin le huon siem dam, ran vai le thil dang dang hai thawin a pâr tlâna hlâwkna intêl dingin ei inbeisei ve hlaka. Sienkhawm beiseina naw tieng takin phaivuo a hung hrâng a.  Hmatieng hun ding dâwnkhawla ei beiseina le suongtuona hai chun ra an insuo ve thei ta naw a. Nun a tluong ve thei ta nawh. Chuonglai zing chun, insûnga damnawna khirtak a hung tlung belsa a. Inkhatpa bei a dawng a. Nu lung a mâwl zo tah. Mihriem ngaia vangduoina tawpkhawk  thina chen a hung tlunga, lusûnna in a mi tuom vel chun Habakuk anga  "Lalpa a chun hlim ka ta" ti thu insam chu thil harsa tak a nih.

Vângduoi bîk rieua inhrietna lei chun zawna tam tak a hung suok a. Hnuoi ṭawngsephur rama hin thla a ngam thei ta naw a. Mihriem ngirhmun a hang inphet tak tak chu ei chengna hi hmun ṭi um, hmun ser ram am an ta aw ti châng a tam hlak. Ama, Rev. Thangngur bawk in hieng hin a lo inzâwt a. 

Hmunser am lo ni tah. Kân siengna hnuoiram hi? 

Ka chung turni kawlah hung suok tininkimin;

Rinumna le lungngaina'n an mi bawm. 

Ka sawl ta ie... (2)

A ni ngei, vângduoina ei hang tuok zet chun sung le kuo, laina, ruolṭha hai hmu ding an um ta naw a. Phungruol haiin an mi ṭinsan zo tah. Hmangaitu anga ei ngai hai khawma an mi maksan tah a, harsatna ruok chun min kiengsan zai a la rel chuong nawh. Ṭhangpuitu ding tukhawm ei hmu zo ta naw a. Sim le hmara zawng inla khawm an um chuong nawh. Suol râllienin mi hnêban tumin nitin el hin sa angin an mi pêl zing bawka. Nun hadamna ding hrim a um naw chu a nih. Sienkhawm, Goshen rama a mihai inrûm ri hre zing hlaktu chun ei beidawng inrûm ri a hriet a. A mi la mâksan ve nawh. 

Ka ângsûnga râl muongleia chun, 

Ka mi an chêng muong thei kumkhuo'n;

In mi ngai zuol theina dingin, 

Akâr chun kan bîksan thei cheu. 

I ṭawngṭaina innghil ka ti'm, 

I ṭawngṭaina ka hrietzing ie;

Ka thutiemah ka la um zing, 

Ka dân thienghlima hum ding chen. 

Ram nêl umlo, hnuoi rinum rama hin harsatna ei tuok chângin thla an vai hlaka. Pasietna dam, damnawna dâm, khuorel thil leia vangduoina dam, suol leia hliem tuora inrûmna dam ei tuor hlaka. Hi damlai nun hi a tâwp hma chu hieng thil hai hi la tuok pei bawk ei tih. Mi thilthawtheihai hnengdena le hmusitna dam, Krista hming leia sukrinumna hai khawm la hmasuon pei ei tih. 

Chuongang ruom inthim tak ei hraw a, nun sâwl le chau taka ei umlai khawmin ei Pathien chun a mi maksan ngai naw a. Ei ṭawngṭaina a hriet a. Pindan sungrila ei mitthli tlak na hai khawm a hmu ṭhel naw a. A thutiema chun a la um zing a nih. A ângsûng 'muonglei' rama kumkhuoa ei châwl na dingin. A nih! Chu huna chun hnuoi lungngai mitthli hi hul tâng a ta. Ṭaplai bâng tang ei tih. Sa le mihriem dorâl an bâng na hmuna chun!

Riekmaw Cabin

29 Oct 2025