KA ṬAWNGṬAINA NGHIL AM AN TA?

Khawsûng chu a re deu ṭhiep a. Vân chu a puo deu ruoi bawk a. Arasihai chu an inlep deu zek zek a. Thlasik lam khawm an khang deu riei tah. Zan boruok chu an thiengin khawsâwt a um hle el. Râlkhata chun ṭhalai ruol hla inchûk ri khawm zuk hriet theiin a um bawk. Chuonga insâwnga kan nupaa khuorêl mawina kan thlîr lai chun kan in tieng panin bullet a hung inri phei dut dut tah a. Kan gate bula chun a chât chawta. Pa Tluong, ti le gate a hung nam ri rawk chu an ruol a. Inhnuoi tieng kan ṭum suk a. Chu tlangvâl chu tu'm a na tiin ka zu panhnai a. Aw..., tlângval thawveng Ramtâwn a lo ni zing annawm. 

Insûnga chun kan inzui lût a. Ieng thu'm an ta a vawizân chu nang ang lo takin Aigupta rim i hung innam hak el a ka ti a. A lukhum a hlîpa, chabi chu table chunga a sie a, a kutbâwm savun a siem khawm chu ṭawng loin a hlîp pei a. Chuonga hun iemani chen kan inṭhung hnung chun Ramtâwn chu a hung ṭawng a. 

Pa Tluong, mi dem naw raw aw... ? Vawizan chu ka lung an lêng ema ka hung 'khiks' met a nih. Nang le in insûng kan za naw lei a ni naw a. Ka nun hi a rinum em el a ni a hung ti a. A hmela chun hril suok el theilo phurrik a nei ti chu inhmai ruol a ni nawh. 

Kei chun, nang ang tlangvâl thawveng hin iem buoina i lo nei ve bawk am a ni maw ka hei ti fiem a. A ṭhungna a siem ṭha a, a hang inthuok deu sat a. Chawmkhat chu ceiling enin a tang deu vang vang a, a chil a lem khau khau a. A leather jacket hlîp malam chun ka bulhnaia a hung inṭhunga. Hril nuom tamtak nei chu ni ngei dingin ka ring. 

Kan nu chun thingpui a hung siema, kan dâwn lai chun Ramtâwn chu kan ina riek nghal dingin a fiela. Mikhuol room a ruok thu hai khawm a hril. Thingpui kan dawn zo chun zâl dingin pindan a mi pan san tah a. 

Pa Tluong, en rawh. Tuidam khuoa hin in hung um na a la sawt naw a, chanchin hi i hrietnaw tamtak a um a nih. Ka chanchin lem hi chu i hriet  naw tam tak a la um ding a nih. Vawizân chu hang hril vawng ka che. Iengleia kum 40 vâl chena  la lêng am ka na ti khawm hi i hung hrietthiem pei ta ka ring  a tih a. A zakuo bân a hlîm a. A hei inkhul deu khak a. Ka zurui lunglen mi sawn pal i tih. Tlâwmte chau ka hung lem zau a nih a ti a. A zu dâwn lei am a ni a râwl chu a khur deu dar hin ka hriet. A chanchin chu hieng hin a mi hril tah a. 

Zani dawr thuomhnaw lak dinga Guwahati ka zu fe chu mî nuhai ka zu hmua, kum 12 vêl liemta laia thilhai kha lungril mitthla ah a hmatiemin an hung inlang zut zuta. Nunhlui chulram fangin ramtin ka ngaituoa, hunin a liempui ta'm a ni ka ti hai kha zani lai chau thil angin an hung thar nawk a ni hih. 

Kum 12 vel liemta khan nuhmei pakhat dit deu el hi ka neia. A nu le pa chu mi invawng fel takel. An neinung bawk leiin ei khawtlânga khawm mi inzakai anni a. An naunu khawmin a sûn a, a nun a ngil a, a titak bawk leiin tukhawm lepchie taka sai ngam kan um ngai nawh. Kan ruolhawn dithrawn a tlinga. A rûk taka ngaizawngtu kan ni deu seng el hmel. Ama hlak chu a bengvâr si a. Mi hi ṭhatak in a biek vawng hlaka. A ṭawngbau ṭha lei chun kan ruolhai mi pahni tawpin an zuom suol pha tah a. Tukhawmin a tak rama inngaizawngpui dingin kan inring ngam ta nawh. 

A tawi zawngin hril el lang, kum a hung invawi pei a, khuo khat kohran hmunkhat ta châwk chu inhmu hun a hung tama. Kan hung inngaina ve ṭan a, chu inngainatna chun a mi ṭhuoi pei a, kan hung inngaizawng ve ta a. An ina khawm ka lêng lût ve zeu zeu hlak. 

Ei khuoa hin inchûkna in ṭha fumfe tak a um naw leiin  B. Com inchûk dingin delhi ka pan a. Ringumtaka um zing dingin thu kan intiem a. Sienkhawm, vairama ka thanghmang sung chun a pa sinthawna leiin Arunachal Pradesh tieng an insawn a. A pa hi NEEPCO a sinthaw a ni a. Insûng khawsa thei tak anni bawk. Ama khawm BSc Nursing an chuk zoin Guwahati ah a um a. A pa pension hnung chen khawmin chutaka chun um hmun an khuor zawm ta pei a nih. 

Kâr a hla a, inhmu a hung inkhata. Thîkthu a lo na bawk leh buoina neu neu a hung um ṭan a, ringhlana thil damin a mi chimbuoia. Chuong sa sa khawm chun hmangaina hruiin kan lan tlung zawm hrâm hrâm hlak a nih. 

B. Com ka zo chun sawrkar sin zawng nêkin mani a sumdawngna ṭan dingin lungril ka siema. Dâwr ka thaw ṭan a, mi ṭhenkhat chun sawrkar sin hmuzo lo tiin an mi nuisaw hlak. Anachu, ka sin a ka hlim a, ka fâk tawk ka hmu a ka lung a awi. 

Nikhat chu dâwr thuomnaw ding lâk malamin ama hmu dingin Guwahati ka zu fe a, ka beisei angin thil a um ta nawh. A nu le pahai chun a sinthawna hospitala Doctor pakhat chu mâkpa dingin an iei naw thu ka hriet a. Ama, Siemte khawmin a nu le pa thu chu a sêl chuong nawa. An inthlawp hlak ti chu khawtuol ṭawng ka hung hriet a. Tlâng ṭawng chu andik vawng naw theia, an ina va lêng lût hrim hrim ka tih tiin zana chun Patarkuchi Road tieng ka fe pheia.  An ina chun mi an lo so mal mal a, ka hei lût chu Birthday lawma hlim khêk vel an lo ni zing. Siemte Birthday a ni ti chu kei khawm ka hrietdawk thut a. 

Damte'n Birthday an lawmna pindan sâwng chung tieng chu ka pan a. Siemte sangnu Kimpui chun a mi hung chibai a. A bula inṭhung dingin a mi fiel a. A hnungtieng chun to ṭawkin kan ṭhung ta lem a. Siemte chu a bieng sen inno tât in annui var var a. Zakaw fuol sen, a sier zâwnga khup chen inthlêr a hâk a. A sam chu a dâr chunga a tla hnap a. A châng vel chun a zakuoa tle sep sep chu varṭien arasi angin an inlep siei sieu a. En a dâwl ngawt el!

Chuonga to ṭawka ka thlîr zing lai chun tlangvâl hmel fai takel hi parte chawiin a hung lût a, Siemte umna tieng chu panin a fe peia. A pâr chawi chu Siemte a pêk a. Bieng inchuktuo in an inkuo chawta, mipui fekhawmhai chun kut an ben dur dura. A phûr fâl deuhai chu an lâm bawka. Ka thil hmu chu awi harsa ka ti a, insuk thawveng tumin tuol tieng ka pan a. Inchung sâwng kil khata hin cigarette ka va pak khu vang vanga. Siemtu sangnu Kimpui chun a mi hung pan a, U Ram, hung ṭhang ve ta la. Ka U in i hung a la hriet naw maw tiin a mi hung ko a. Kim, hieng lai hin lo um lem ka tih. Amiruokchu, nakie le i u Siemte hi kan biekpui nuoma, ka lo nghâk thu hi mi hril pêk raw tiin thu kan cha a. 

Birthday lâwma hung khâwmhai an ṭin zo chun Siemte chu a hunga. Inphalam hmel takin hmai inkhup dâkin a mi en a. A bâna keiin ka âwma ka kuo kuo de a, ka ṭânga an bei hnap a, a sam chu damtên ka chul hieu hieu a. A bâwk a ka zuk fâwp a, a hung inhnîk fat fat a, a mithli chu a hrûk a. Sâwt fu ṭawng loa ka kuo hnung chun inchung zawla chun thla eng thlir malamin kan inṭhunga. 

Siemte, ka hmangai che ti i hriet maw? Iengkar khan am i tiem thu i lo sût a? Ringumna thu ei tiem kha kumtluonga ding annnaw? I kumtluong chu a lo tawi ngei maw ti malam chun a kutpâr chu ka chel a. A kûn a, a to veng veng a. Chawmkhat hnunga chun a hung ṭawng suoka.

U Ram, ka chanchin hriet hin a mi ṭhâwng em a, lungril mumal khawm ka put thei tak tak ta naw a nih. Delhi i fe khan Tuiṭhaphai nunghak le in inthlawp ti thuthang an mi hril a. Thudik finfie tumin lekha vawitam ka hung thawn chea. Sienkhawm nang hlakin iengkhawmin i mi dawn si nawh. Kum thum sung i ṭawngbau ka nghâk a. Ka nghâk dawk zo naw phing chein hienga thuthlukna siem el kan tah. A mi ti a. 

Khuol thuthang mei mei leiin maw ei kâr thu hieng hin a um ta chu? Nang inphatsan ding che in i mi ring a ni maw? Mi hang en la, phatsantu hmel ka put am? I mi lo va ring zo naw de ka ti thawr thawr el tah a. Ka ṭawngki a lo insang deu leiin mi hrethiem rawh, ka lung a na ema nih ka ti zawm nghal a. 

Ei huntawng an mil thei naw lei a ni hi U Ram, i thiemnawna um nawh a mi ti a. Bul ṭan thar ei tih, hieng ringawta ei chanchin tâwp ding chun ka phal nawh ka la zuk ti nawk hrâm a. Tuhin chu an hnu tah, iengkim an hnu vawng tah tiin a mi dawn a. A mitthli chu a hrûk fat fat a. Thawthei neiin kan hriet ta nawa, hril nuom tamtak nei siin hril ding hre loin ka ṭhung ta zinga. 

Inchunga inthawk chun kan ṭum suk a. Choka a chun mi ṭhenkhat an lo la buoi nak nak a. Doctor pa khawm chu inti chawngpu takin titi a sep hluom hluom a. An titi na lai chun to tawkin ka van ṭhung ve a. Siemte nu le pa'n ka hmel an zuk hmu chu mak tina tak khawm an nei ni ngei a tih. Kei, tlangram schoola Headmaster nau naran el chu an mâkpa dingin an min sit deu khawm a hawi. Doctor pa an huor dân anthawk chun  thil tamtak ka hung hrietthiem ta pei a. Siemte nu le pa anthawk chun a mawi zâwng bek khawmin ṭawngbau ṭha ka dawng nawh. Um zing na chi ni dingin ka hriet nawa, Siemte hai ina chun kan leng ve ta naw ti ka hriet chun ka tlungna Hotel tieng ka pan tah a. 

Ramtawnin chuonga a chanchin a hril zo chun gold flake a keidawk an ruol. A ziel hawp chu boruok lai a khu an zam tir chiei a. Hmangaina hi a châng chu hi meikhu ang chau a ni hi a ti dam sat a. 

Anle chu kum tamtak liemta chu iengleia i la nat pui rawp am? Insukdam rawh, pasal innnawm tiin ka hei cho a. 

A ke a tet deu that a, Pa Tluong, a nu le pa thu phierruk vawng a nih. Tuta ka hrilhai che kha kum 12 liemtaa thil tlung a ni kha. Krismas bazaar thuomhnaw la dinga zani ka zu fe chun thudik ka zu hriet chau annawm a ti malam chun a bawk a tuoia. A hei inthuok nawk deu hlap a. 

Pa Tluong, nikhatni ka zu fe a ka chanchin hriet chu hril ka che. Hi a nih ka lungril suk na bêk bêk tu chu a ti a. Siemte chu Doctor pa le an innei a. Nau khawm pahni an nei hman tah. A pasal chu zu dâwn hlak a ni leiin insûng an inrem thei nawa. Hlimni reng an hmu nawh. Siemte chun a pasal kut a tuor châng khawm a um rawp hlak. A karchâng a pasal in nuhmei dang laka a lêr san hlak bawk. A tawpa chu an inṭhe pha hiel a nih. Siemte khawm Hospital a thawk ta loin a pahai inhnuoi a hluo a, dâwr chite siemin fâk a zawnga, a khawsa ve ṭawk ṭawk a nih. 

Siemte hmu dingin dâwra chun zântieng ka va fe a. A nu le pa an thiem thei naw thu hieng hin a mi hril a, tiin Siemte thuhril chu a hril zawm pei a. 

U Ram, ka nu le pa hin mi umthei sungkuo hi an huor a. Insûng harsa hai le nupa a insiem chu nupa nun hlim antak a, insel inhalna a tam nuom tiin an mi lo hril hlaka. Chuleiin, nang anthawka an mi keihlat nuom leiin thuthang an hril vel a. I chanchin indiknaw takin an hril thanga. Ka lo awia, tuhin hieng hi ka ni ta hi. Hringnun hi aw, pieng nawn nawk thei ni lang chu ka va hmang thiem ta ding deh a ti vawng vawnga. Sienkhawm, tui inbuo ta hnung rût nâwk tum ang chau a ni tah. 

Anle chu nang khawm hung kir talo ding nunhlui ngaituoin i nun i hmanga. Siemte chu a liem an tah. Nuhmei nei dân ngaituo la, i nun ruokna khawm a zie um deu rawi mawh. A ni naw si leh i la hmangai tak tak a ni chun zu ṭhuoi ei tih. Rem ruotpui ka che ka ti el tah a. 

Pa Tluong, innei ding khawmin ka fiel annawm. Nang ka hmangaina hi hun in a liempui thei ve nawa. A chul thei naw a ni hi. Hun liemta hnung hai theinghil in bung thara kai ei ta, inṭhuoi el ei tih tiin ka tlema ka thlem thûk zo ta naw ni kha a ti a. 

A lo hmangai tak tak naw che mani ding maw? Chuonga a remthei ta naw el chu tiin ka hei indawn a. 

Ka hriet bîk ta naw Pa Tluong ti malam chun Siemte le an inbiek dan thu chu hieng hin a hril zawm pei a. 

U Ram, ka ṭhat na, ka par mawina po po chu hlemhletna leiin a chul zo tah a. Tuhin chu râwl kuokara pâr thi hlêp hlêp ang kan tah. I ta dingin mawina iengkhawm inhlan thei ka nei ta nawh. Chuleiin, mi hrethiem la, i mi fielna hi inza um hle sien khawm ka zâwm thei naw nih. I laka hin ka damsûng inthiem thei chuong naw ning. Hienga um hi ka ta dingin a hadam thlak lemin ka hriet tah. Mi fe san el rawh a ti leiin kei khawmin ka fiel lui ngam ta naw  nih a ti a. 

Pa Tluong, nunghak tlangval inhmangaina hi ka lâk run a. Mawi khawm ka ti hlak. A tuor khawm ka tuor hrim a nih. Tu chen hin ka la dam thei naw a ni hi. Ei khaw mihai chun "nunhlui phur zo lo" tiin mi sel raw hai seh. A pawi ka ti nawh. Ama, Siemte ta dinga ka thei sun chu hienga nun chulram chang ta hnung fang hi niin ka hrieta, bo el ding chun ka phal nawh. A hlu a nih.

Siemte kha maw Pa Tluong, ka hmangai hmasatak a ni a. Ka hmangai nuhnungtak khawm ni rawseh. Hmangaina hi a ṭhen in an hlimpuia, kei ruok chun ka ṭap pui nawk hlak a ni hi. Anachu ka lawm, Siemte zûnleng hi bo el dingin ka phal nawh. Tlân thim ka pan hma khat chu a ti a. 

Chuonga lungsie taka Ramtawnin hmangaina lampuia a vangduoina thu an zawt lai chun a hang tang deu ak a, a chil a lem dak dak a. Hieng hin a hung hril zawm nâwk a. 

Pa Tluong, Hmangainaa hin ka tlâwm a nih. Vâl ka tlâwm. Anachu mi dem naw raw aw... a ti dam deu rieia. 

Ka lungrilin, "Aw Ramtawn, i hmel le i piengzie hlak insit um lo. Siemte le in inhmangaina thawnthu chu lungsie takin tawp sien khawm, hmangaina chanchin ngainuomum lem ziek thar dingin kal i pên ngam ta naw el hi chu kan thiem naw rûk ngawt el che. Amiruokchu, ka dem naw che, hmangainaa inhliem hi chu a na a ni hi maw... A na a nih!"

Zân a sawt ta bawk leiin Ramtâwn khawm chun ṭinzai a rêl a. Kan in Mangṭha tah a...