Mîmtukthla 26, 2016 zântieng (ruoiṭhe tâwm lai vel ni mei a tih) ka ruolpa pakhatin ami hung phone a. Kan inbiek zing lai chun, "In Krismas hmang a'nhawi am?" tiin kan dawn a. Ama chun, "Anhawi naw e, lêngkhawm khawm kan țin awl taluo. Vawisûn chu a tâwpni a ni a, an hlim met ning a tih khuong khawm an rang deu tah. Zâna chu hlim tei tei zân an tah", tiin innui hak hak in a mi dawn a.
A zîng nâwk ni 28, 2016 zântieng ka ruolpa pakhat ka zuk phone nâwk a. "In Krismas hmang a'nhawi am?" tiin ka hang indawn ve nâwk a. Ama chun, "Kei chu inhawi ka ti ie, midang chun inhawi an ti di'm ka hriet naw a, inhawi ka ti el," tiin ami dawna. Kan inbiek zo chun ei thupui 'IN KRISMAS HMANG A'NHAWI DE MAW?' ti ngaituona a hung suok tah a nih.
Kumpui lingleta Kristien haiin, a têlpuia ei tûng em em chu Krismas hi a nih ti inla a suol kher ring a um nawh. Khuo le vêng mâksana ram danga sinthaw le inchûklaihai khawmin hi hunpui hi hnawtin, 'Ber' thla ei chuongkai a'nthawk ni le thla tiemna (calendar) ei bî deu zing ta hlak. Anleh, hieng lawma ei tûng hi iengtin chie in am ei hmang liem tâwl a? Kum 2016 Krismas khan Bethlehem chen fe in Lal thar pieng lâwmin chibai ei bûk ve am?
Krismas ei hmangna san tak hi Kristienhai hin ei hriet deu seng ring a um. Amiruokchu, ei hmang dân le ei Lalpa Naute Isu pieng ei lâwm dânhai chu inang vawng kher naw ni a. Chibai ei bûk dânhai khawm inang naw rup a tih. A ṭhenin lungril robâwm an hawng laiin, a ṭhen ruok chu sabêl char hawng khawm ei um el thei a nih.
Khi a chunga ei hril ta ang khin, Kohran hmunkhata inkhâwm khawm ei hmâng dânhai chu a'ndang hle ti hriet theiin a um. Mi ṭhenkhat chu mâni hlim tum neka mi hlim inchân am ei ni aw ti dingin ei um. "Tuta ṭum chu ka hlim, ka lâwm" ti nêkin "kan hlim naw eh!'' ti a mi hlim boruok inlêng vel nghâka, a boruok inchân el khawm hi ei ang tâwl tah. Khawsak mivarhai anga lungril robâwm hawnga Krismas hmang hi ei inlau deu khawm ni mei a tih. Taksaa ei inbuotsainahai khawm a ṭha, amiruokchu a pawimawtak le ei lâwm ding tak lâwm fu loa ei hmang liem el chun a pawi hle ding a nih. Hieng ang hun lâwmum hi ei chang phâk nâwk kher di'm?
"Tiena mi han hmu an nuom ni lâwmum hi;
Hmu loin sang tamtak an liem ta.
Lal lungawi kum hun lawmum sandamna ni hi;
Ei ni ha'n ei chang bîk hi ei vangnei ngei."
Ei vângnei zie hi ei ngaituo hlak am? Sandamna lawmum, mitin ta dinga Chanchințha hung intluntu piengcham hmu nawk theia ei um hi ei lawm ve naw am a nih? Chu chau chu niloin, hmangaina thilthlâwnpêk ropuitakel, 'Sandamna' changtu eini hi ei vangnei zuol na chu a nih. Lâwma chibai bûk naw thei ding ei ni nawh. Mi țhenkhat chun, "Ka hlim, ka lâwm" ei ti el thei, a țha. Ei lungril inthûktaka sandam hlimna le lawmna hi a ni ei lâwmna ding tak chu. Mîhai angin kut benin ei va lâm suok ve da'l thei. Amiruokchu, ei lawmzie hi puong suok dân chi tum tum a um a nih.
Krismas lêngkhawm khawm țhang țha pei lo, thlîrtu dinga ruot ni awm taka meipui âwi malama mî lêngkhawm lo thlîr vêl hlak haiin, "Kan Krismas hmang a'nhawi nawh!" ti ta ngai nawng ei tiu. Nangin i tum dân le i nuom dâna i hmang naw lei khan mi țhenkhat ințhangtir naw la. Inhawi naw i ti le țawngțaina le țhang nasatakin la la, inhawi deua hmang tum ve el ding a nih. Mi hlimna hlektla rût ding inchân in um ta nawng ei tiu. Mîhaiin ei hlimna, ei lâwmna thlî lo dawng ve ta raw hai seh!
Mari inpakna hla;
"Ka thlarau khawm a mi sandamtu Pathien chunga a lâwm bêk bêk a,
A suoknu tlâwmzie a hmu a, a lunginsiet a. Ngairawh, tuta inthawkin ruolthar po poin hamțha an mi ti ding anih." ti hi a ropui bek bek el.
Mari chu khawvêl nunghâk tamtak laia Naute Isu insiengna nu dingin
thlangin a um a. Ringnaa ei pa Abraham kuoma Pathien in thu a lo tiem ta sukdikna dinga thlanga a um lei hin a lawm bêk bek a ni kha tie. Eini Kristienhai, hieng ang lâwma sandamna ropui changtuhai, ei lungril Isu Krista insieng ta hai hin ei lâwm ve naw am a nih. Lâwmna chang hrelo dâm ei lo ni pal el am? Ei lâwmna hi fûr ruotui thlâk hun lai chun a lo da met ani khawma, 'Bethelehem ngaina chul hnung pâr ang a vul nawk tah' ti ang khan Krismas sûng bek hin chu ei lungrila lawmna pâr ang hung vul thar nawk hlak ngei sien nuom a um takzet. Chu pha chun ei Krismas hmang hi inhawi hlak ngei a tih!
Riekmaw Cabin.
Post a Comment
Post a Comment