Liem tah kum 2017 kha innui le ṭap hun inpawl nawkin ei hmang zo hrama. Independent Kohran ta ding bîk lem chun kum tawp tieng kha a lungngaithlakin a mi barakhai hle el. Hmun dang danga ei Kohrana mi pawimawhai bâka ei ṭhuoitu hlun Rev. D. Ruolngul le Rev. Lalngaisang, ei inpâm em em haiin an khuolzinna hnuoi ram an maksan kum a lo ni zing el. Krista Mihrâng Pasalṭhahai an liem zet chu ei nghatna tieng tieng a dawnga. Ârpui te ṭhuoi lai mupuin a lâk hmang angin ei invâi ruoia, lungkham bângna ding ei zawng vel ruoi el. A hamhai thlak ngawt el. An maksan Kohran mipui haiin, "A la hun naw ie. Ṭhena thu kan la tiem naw cheu annawm..." tiin ṭap râwl in ko inla khawm kîr zai hrim an rêl ta nawh. A ni ngei, mihrâng hai sulhnung ei thlîrkir chângin an damlai khuolzin hringnun kha a rimsikthlâk em annawm maw? Hnuoi rinum rama hin tu’m châm sawng nuom an ta? Tuhin chu an sin inrimna chawlsanin, a harsa le rinum, lungngaina an intlângpui, buoina tamtak an ituor pui lo fe hmasa hai - Rev Hrangtawnlien, Rev H. L Bana le mi dang dang hai leh Pâ angsunga lungmuongtakin an châwl hadam taa. Hnuoi ram reng an ngai ta nawh! Kanaan ram mawi an pan ta ie...
Hun tawite châwl hmang dingin Tuolbuol 6, 2018 khan Sielmat ka hang chuongkai ve hlawl a. A lâwilên le ram leilung hai chu a la'n dang chuong nawh. Phalbi dei lai tak a ni bawk leiin a boruok khawm a'nthieng huntâwk hle. Sienkhawm, kawtthlerhai ka hang fang vêl a, lamṭhuom tin a chun, "Mihrâng an kim ta nawh!" tî fie taka inziekin an mi lo hmuok ni’n ka hmu a. Lungkimlo ṭutin ka um ta zing a. Lungkham reng neiloa kan tuolchaina hlak Sielmat tlânga châm sawt khawm chu ka thlakhla ta naw hle el. Mihrâng an va kiem sâwt ngei de maw...?
Ama, Rev D. Ruolngul hai le hin vengbuk (Lalvêng) khata um kan ni a. Zîng thingpui dâwn ding damin kan ina a hung lêng lût ve hlak a. Tûk khat chu kan ina an hunga; verandah-a Plastic chaira an ṭhung chun, chu ṭhungna chun a mit a lak ta hle el a. Ka pu khawm chun “I dit phawt chun chawi rawh!” ti’n chair chu an chawitir tah a. Chu plastic chair chu an in verandaha hin an sie a, vairik le zântieng ni nêma hai hin a'nṭhung hlaka, lekhabu a tiem dâm hmu ding a um deu zie hlak. Ama va pâwlin va bie kher ngai naw inla khawm hi lai hin Pathien mi, mi ringum a chêng a nih ti hriet khan a vengbuk el chau ni lovin a khawsung ta ding khawmin lung a muong hle hlak a nih.
Rev. D Ruolngul kha Independent Kohran ta ding chun sûtpui a tling takzetin ka hriet. Pathien thutak hrietna le inchuktirna kawnga khawm Kohranin a thuok tâwp ni chena ei sawr le râwn a la ni zing a. Kohran kalchawi dân le ro inrêlbâwlna ah hai khawm ei ringrâwl tak a ni rawp hlak. Independent Kohran chanchin hril le ziek nikhuoa a hming lam loin zo thei ni naw ni a, kim thei ngai bawk naw nih. Upa hai thurosie chun, "Hna hlui chu hna tharin a thlâk hlak" an ti hlak a. A ni ngei, hna hlui a ṭil chun hna tharin a hung thlak hlak ti chu leilung dâna inkhel theilo a nih. Ei ṭhuoitu, Rev D. Ruolngul khawm a hun tâwp a tlung ve tah a, ṭhuoitu tharin an hung thlak ve pei chu an tah. Amiruokchu, ama anga ṭhuoitu ṭha hi vânkhuphnuoi mi hming sak hai le, la hung um mek ding hai lai hin ei um nâwk kher di’m aw ti chu zawna dawn harsa tak a nih. ‘Mi bîk’ khâng ang lâwma ṭhuoitu ṭha, mi ringum Kohran hmangaitu kha kei chun ‘Independent Kohran cheldingtu dinga Pathien bêlruot’ ka ti nuom hiel a. ‘Father of Independent Kohran' chawimawina pêk khawm a phu hlie hlie in ka hriet.
Independent Kohran ta dinga mi hlu bîk; Pathien mi, mi ropui Rev. Lalngaisang khawm hi taksa dân taka 'rang' ka iti thei ding a ni a. A hming ang hrimin ei 'LALPA' hi a ngai sâng a, Bible khawm a dâr chunga chawi ngat hlak mi a nih. Pathien thu a zawm zie dam, a ringumzie le indikna nun a kengkaw zie hai hi tuchena hril tawplo la ni pei a tih. Pathien thutaka Kohranhai chawmtu, thutaka kan inghatna ban, a chanchin hi Independent Kohran chanchinbua hin hrietzing ni hlak a tih.
A taksa a hung chau taa, a hriettheina a hung fie ta naw hnung khawmin Biekina a la hung ṭawk ṭawk hlak a. Biekina mi ṭawng le thuhril hai chu pangngai takin a hriet ve thei ta naw a. A bula inṭhung hlak a nuhmei, ka ni Lalrêng dâm an dawn hlak a, mipui to ṭhuopa an um lai dâm a hung ṭawng suok lawng châng a um rawp hlak. Chu huna chun mi ṭhenkhat chun nuizata la in a ṭawng chu an lo innuipui vet hlak. Aw..., mâwlna a va ni ngei deh! Kei chu ka nui an za ve hlawl nawh!
A hratna le theina po po chanchin ṭha thu maktak hrila inhmang zo ṭhakin a um a. A huntâwp tieng kum upat leia pangngai âw zo taloa a um hnung khawmin, Pathien Biekin a la hung pan ṭawk ṭawk hlak dâm kha a va hlu ngei deh.
Tuhin chu Biekina inkhawm fe le hung vêla ei hmu zie hlak ei mi hlun hai hmel chu hmu ding an um ta nawa, an inthungna hlak khawm a ruok huou tah a, kawtthlera hai khawm chun an hlimthla ding awm hrim an lang ta nawh. Ha hmai tlawng ang deuin an umnaw chu keia hin a langsâr zuol in ka hriet a. An maksan kohranhai khawm anni ve ngei ka ring. Taksa rama hmu ding um ta naw hai sien khawm an nun in Kohran lai thu a la hril zing a. Suongtuona mitthla ah an la châm zing hlak, bo el ding chun ka phal lul nawh!
Krista Pasalṭha haiin Independent Kohrana Pathien rawng an bawl sûng khan harsatna thlipui tamtakin a nuoi hlak a. Nisienlakhawm Krista an ringna inthla loin det takin an chel lem saua, harsatna hai chu Pathien ringsanin an tuormuolsuo hlak a ni ti hretu hai seng ei ni ka ring. Pathien ram hmangaina leia khawvel rama an invâkvaina, an harsatna hai an inzawt ri ruok chu hriet ding a um ngai meu nawh. An nun a'nthawk hin tulai Krista ringtuhai hin inchuk ding ei va hau ngei deh! Eini hai chun harsatna ei tuok met le inzâwt senglo ding ei neia, mi neka tuor bîk êm êma ingaina chen ei nei hlak. Akârchâng lem chu Pathien meu khawm ei mawsiet nuom hiel hlak a nih. Ei mihrâng hai ruok hin chu sepui raw tuor in an tuor thlawk thlawk a. Chu an ringumna le tuorselna hai lei chun Pathienin mal a sawma, Independent Kohran khawm hmêl ditum tak a hung put ve pei tah a nih. A va ropui ngei. Lalpa chau chu ropuitak sien, A hming thienghlim chu inpakin um rawse!
Independent Kohran khawm Pathienin mi ṭhuoi pei a ta, beiseinain kum 2030 (1930-2030) khin Kohran Centenary lawm hmabâk el ei ni tah. Hi hun chen bêk hi mi la hmangpui thei hai sien chu tiin duthu ka lo sâm hlaka. Sienkhawm, ei thuring Bible in mihriem damsûng kumbi a mi thliek pêk an lo hraw zo ve ta leiin, nikhat dang châmtheina pek anni ta naw a. Chungtienga remruottu hlak chun; Kohran haiin an la thlakhla em el, lal Hezekia angin an damsûng kum, kum 15 dang la belsa pêk ka ti hlak a mi ti pek dêr si nawh. Aw, mihrâng fam zûn ana ie...
Hnuoi dan in thlân thima zâl in,
Dâwlung rem ta inla khawm.
Hringkhuo kan châm sung hin,
An sulhnu le nunzie mawi.
Independent Kohran di’n,
Nghilni um thei a ti’m?
Riekmaw Cabin
29th July 2018
Post a Comment
Post a Comment