Chulrama chun ri hriet ding meu a um naw a, a re in a re thlawk thlawk el hlak. Bu sîk hun laia zaupui so veng vung el hlak kha rausan in a um taa. Buor kara chun manta le hmarcha kung inrieu bamin an la um pheu pheu a. Singzuor khawm a la um zeu zeu. Ṭu, ṭâwp tieng pan mek ta chu ei zuk thlîr a, 'I lung ka dum zo ta si naw maw mî u...' ti ni awm takin ṭu inhna hai chu thli'n a hung mût sawi deu bat bat a. Ṭu sawrdâwk a vâṭhu nupa khawm chu vairik nilum intawiin an indi riel a. Lo mawnga thingdawl inrieu bum kûnga chun vaiva hawn an fu tlar tier bawk a. Va kâwl lengruol thla khawng ri hriet lem chun lungleng a na zuol ie.
Ṭu tuola pârte chi dang dang kâra kumtluong pâr le chuoilo pârhai khawm an lo chul zo taa. 'Aw..., kumtluong pâr khawmin kumtluong a dai zo naw a. Chuoilo pâr khawm a chuoi nawk rawp hlakna hnuoi ram tak el hi chu!' ti thâwpsat pumin ṭu sûng a chun ei zuk lût a. Kilkhata hin maibal le bâl a lo inbûm rama. Mai hmin khawm iemani zat a la um. Tuiûm tîng tuoitea uluk taka phan ngei chu mal takin ṭuonga hin a lo inlet biel a. Namthlâk a inthawk chun dumziel ziel malamin chulram chang mek chu ei zuk thlîr vêl a. Iengkim hi a re vawng vawng a ni tak.
Aw hlimlaini hai muol an liem ta maw?
Ngaiin ka ko dawntu reng umlo,
Sulhnung ramrea lungleng a zuol ie...
Chuonga namthlâka inṭhung malam chun kumpui liemta kha ei zuk sui kîr a. Nunhlui liemta hai chu a bat batin lungril hlimthlaa an hung inlang zut zut a. Lâwmnu hai le lo lamtluonga a ṭhiengtea insawm lai hun dam. Hlo hram thlo hun laia ruom khawk rui ruia innui ri hai kha tu hin chu a re riep tah. Aw! khang lai hun kha; sun châwla lawmnu in behna sithu hme inri thlawkin a hung bun dawka, hnathiel hna chunga ngei inhmatuoa sûnbu fak hun lai dam kha ngai a um hlak ie. Bu fâkkhawp in ṭu namthlâka bâk thal zâl ei hang thawa. Hnâwm a chun saha an hung inhrâm a. Râl hlataka ramngawpui dum ngûk kara chun ṭen tuikhawthlak zuk hmu theiin a um bawk a. Fûr khawthieng changin Vânkisawng le Kailâm tlâng khawm hla taka ei zuk hmu deu ruoi hlak. Bupui sîk hun lai lem kha chu aw...
Ama, P.B Shelly'n, "Our Sweetest songs are those that tell of saddest thought" a lo ti ang in. Hringnuna hin ei hlimpui em em hun hai kha a hnunga ei lungngaina intluntu an lo ni hlaka. Lungngai taka mitthli puma ei tuorna hai kha ei lawmna a lo ni lem hlau hlak. Chu hringnun suonkuola chun ei invir ngat ngat hlaka. Hlimna tlângsânga ei lâwn châng in nun iengkim hi a mawiin a hlimum hlak a. Hieng hlimlai nihai hi nakie hnunga ṭap khuo sukseitu ding a ni ti hrim ei dâwn phâk ngai nawh. Ei hnuoi lâwmna le hlimna hai chu an hung chuoi ṭan a. Lung ei inruolpui ruolṭha hai khawm an hlimthla hrim hmu ding a um ta naw a. 'Thina chau naw chun...' tia ei intiempui, hmangaitua ei ngai hai meu khawma an mi ṭin san meu chun nun hi a ruok a, chulrama leng angin a re vawng vawng el hlak chu a nih.
Khawvel ram zau taka hin makhât chaua lêng anga ingaina hiel ei nei hlaka. Chuonga damte tea ei intei rek rek lai chun favâng ni a hung suok ṭan nâwk taa. Phalbi boruok in a mi hung del ṭan mek ta bawk. Chuong ang boruok kara chun a nih, lung lairila lo innghil tah, nunhlui hai chun a mi hung kan nawl chang a um nâwk tei hlak. Chu huna chun annawm, hrietzingna in a theinghil ta'm a ni ei ti hai kha fietakin an hung inlang uor uor a. Lunglêngna in a mi chên chil a. Nuomthu reng khawm niloin biengah mitthli a hung luonga. Ngaituona kiltin a fang suok a. Hnemtu ngaiin kawla ni liem ding ei thlir vawng vawng el hlak chu a nih. Chuong ang ngirhmun chu mihriem ṭawnga hrilfie thiem a'ntak a, Hmangai Lalṭanpuia Tochhawng a hla hin a hrilfie hnai tak el âwm ie.
"Aw suihlung han len zual leh deu seh chuan aw,
Ka nunna hian a tlin tawh lo'ng."
A ni ngei, zaipu Lalṭanpuia hin a lungleng thu hla bawka a lo inzawt ang deuin, kei khawm,
"Aw kan hotupa, mi hrethiem hram rawh"
"Lal ram ta dingin ka thei tawk chu, Lungdit hai lêngna vângkhawzawla khawm hin a um ve tho naw'm a nih?"
ti ve nuom châng a um hiel hlak. Sienkhawm, kei iengkim el a lunglêng hlak mî hi, hnuoi rama ka châm sung hin chu bo ni um naw ni a. Bo el ding khawm chun ka phal bîk chuong nawh. Thina in ka mit a sîn hma khat chun; um khawsawt zuol châng ni hin, nun chulram la fang pei lem ka tih.
Riekmaw Cabin
22nd October, 2021
Post a Comment
Post a Comment