Vawikhat tleirâwl suok khan ka piengna hmun hi indik in ka hriet thei naw a. America rama pieng ding India Hmarsak ram kilkhawra ka lo pieng hi pawm thiem harsa ka ti thei hle. Hieng hin kan ngaituo hlak a, kan thlatu bul hai kha Mayflower lawnga chuongin America ramṭha lo pan hai sien chu; kei chu California ram lai vel chêng ka ta, Tupac Shakur, Ice Cube, Snoop Dog hai rawi le 'California Love' hlaa inawiin kawthlêr fang vêl kan ta. Zântieng ninem ah ruolhai le Harley Davidson inrûm dur dur in Colarado vadung kama lêngin, kâwlbula ni liem ding thlîr liemin hun intâwi ding kan na ti hai chu ka suongtuona a lo ni hlak. Sienkhawm, khâng hai kha ngaituona mâwlmang tak el, boruoka in bâwl tum ang cho a lo nih. Tuhin chu khawpui tlêp tuor le sun-zân châwl loa so veng vung sûnga cheng ve châkna nun kha a bo tah a, thlâkhlâna hrim ka nei ta nawh. Khawpui nun buoi taka hun hmang nek chun mal tea sanghal ram tlât nun chu ka tlang lem taa. Nun a hâdamin inhawi khawm ka ti lem tah
Khawpui nun buoina le suolna ṭi um haiin a chawkbuoi phak nawna ramre a chun tu ihriet phâk loin ka mal tla taa. Ka hringnun thawnthu po po ka bunsuokna le, ka sâwl hadamna hmun chu 'Riekmaw Cabin' ngei hi a nih. Chu hmun chu ka luongliemna, intîmna um derloa ka lungril ka phawrsuokna, ka ngaituona kan pawlpui rawpna le, ka hnuoi lungngaina hai chungtieng 'Pa' kuoma kan zâwt rawpna hmun ngei chu a nih. A ram a re in an thienga, mi chîmbuoitu ding thil hrim an um ve ngai nawh.
Nipui boruok lum chun inkieng zâi a la rêl chuong naw a. Zâna chun thawveng takin Riekmaw Cabin a hin riek rûn ka rem hlak a. A vêltuoka kawt namthlâka siem a ni leiin an hawng huou a. Thlifim khawm a dawng ṭha hle. Thla lir zân lem chu aw...
Sawrthla êng lengtin lung lawmna,
Thlir ka ti'm suilungleng val hin.
Nunhlui zamuol liem hnung hai kha,
A min ngai tir chung sawrthla khin.
ti a indawmkun thlawk thlawk chang a bo nawh. Lunglênna hi 'sweet sorrow' a lo ni takzet el. A mi va rûn ngei deh! Sienkhawm a mi zêm vel hi inhawi ka ti a. A mi ṭin san ding chu ka phal lul nawh. A zûn in a mi man ta laklaw tlat annawm. E khai! ka lo pehêl sawt deu an ta chu tie, mi hrethiem ro.
Afghanistan khawpui Kabul a chun mi tamtakin hringna an chan taa. Sâng tam tak zân imu intuo loa sahimna ding zawnga thlaphanga an khêk lawm lawm lai chun, ka dân pangngai in imu inhnik takin darkar 4 vel zet ding ka lo in innghil nawk dêr hman tah. Zânril imu inhnik taka bullet ka khal ri bur bur lai chun ka riek rûn hung inri rawk rawk chun a mi suk ṭhang a. Ui hung lêng lût ni dingin ka ringa. Ka imu inhai phul chun hâwl tumin 'Siihh! ti malamin ka thosilen chu ka zuk suk châng a. Sei... chu zet chun leh! In zupui le rûl chu ka thosilen sûnga an hung inhnawt lût taa. Iengtik kâr khan am tuol ka tlung ka hriet hman nawh. Pasal inti pâ ve tak hlak kha Eden hmelma hmaa chun ka tlansie a, ṭhanghmun ka rem hman nawh. Ka kungfu thiemna po po khawm chun umzie a nei ta naw a, invenghimna nekin ka tlansietna ah khan ka ṭangkai pui lem ta niin ka hriet. Ka kukri khawmin a mi suk muong zo ta naw a, sa channa ding chauin a ṭangkai tah. Ka va pui naw ham ham ngei.
Thlazing 27, 2021 zân hi ka ta ding chun zân thlavaium a lo ni ta zing el. Rûl phingṭam in mazu fâk tuma a hnawt vel chun kei an pawi tâwk lo khawm phâwklêk takin ka um pha a. Zân imu inhnik taka ka zal lai chu thlaphângin a mi siem ta a nih. Taliban hai khawm an phîngṭamna sukkhawpna dingin thuneina an hnawt a, pawi tawklo mi tam tak an thi zinga, nu-nau tamtak thlabâr in an siem pha a. Thla invai takin an um pha ta a nih. Khawvel chanchin liemta hai ei en a, rambung thuneitu hai inghirnghona hi mipui tamtakin ei lo tuor ta, ei la tuor pei ding chu a ni hi. Hnuoiram tak hi chu aw, muongna hrim a lo um nawh!
Ka lungphu, a dân pangngai nêka a lêt sari a inranga inphu khawm chu tlawmin a zie hung um deu taa. Ka phone ka zuk en a. Zing dâr 1:00 a lo pel tah. Ruol ṭhenkhat chun an whatsapp status an lo la update piet piet a. Groupa gâwp pâwl hai khawm chun tâwp el an la tum naw a hawi. Aw... "Anni chu zân zalhmuna lêng ding an nei a ni âwm hi. Kei chu meng sâwtna ding san ka nei ve nawh", tiin zâlhmun chu ka hang rem ṭan nâwk taa.
Ka zâlhmuna chun ramtin ka ngaituo a. Hi hnuoi rama hin châwlna tak tak chu a lo va um naw ngêi. Hlimna ei ti hai khawm hi hlimthla inlang zawk sawtnawte kâra bo nâwk el ang hi a nih. Ka nun sâwl hâdamna hmun; ka RIEKMAW CABIN ngei khawm chu za râl rêlna hmun a lo chang tah.
"Ka ralthuomna ka sie ngam nawh.
Aw, ka chengna râl ṭitna hmun".
ti hla kha a min hrietdawk tir vawng vawng el.
#Riekmaw Cabin
30th August, 2021
Post a Comment
Post a Comment