Zântieng nisa thlak tawm kâwlbul sen deu ruoi thlir puma ruolhai leh inhawi ti taka kan titi lai chun; Biekin inkhawmna dar a hung inri a, inkhawma insiem dinga kan inṭhe tâwm chun ruol ṭhenkhat hai chu an inkhawm ding am ti’n ka zuk indawn a. Anni chun, Biekna hmu ding an nei naw leia an inkhawm thei ve naw ding thu an mi hril a, mak ka ti deu. Kei khawm hmu ding ka nei leia inkhawm fe tum kan naw thu ka hril khawm chun an mi dawnsak chuong nawh. Lung ni naw tak pum chun ka fe taa.
Ramtin ka ngaituo zui ta pei a. Nu le pa hin nauhai hi ei thunun hne tawk naw mani aw ka ti a. Kha ka ruolhai kha khawlai nau hlak an ni bawk si nawh. Inchuktirna ṭha le thununna an dawng ngai naw mani ka ti ding hlak chun, nu le pa mit meng ker
kur an la nei bawk si. Nu le pa chun nau chu thu ṭha an hril ding chu a chieng sa a nih. An nu le pahai thu
hril khawm dawn sak lo kei ka ṭawng lem kha chu ienga ngainaw âwm hrim an nih ka ti ta lema.
Tulai ṭhalai tamtak fe suolna hi ngaituo tham a tling a nih. Tu thawsuol lem am ti ruok chu hriet
a harsa hle. Nu le pa tamtak chun lekha inchuk dingin vairam tieng dam ei nauhai ei tir liem tawp a . Beiseina insang tak le thlumte thlir a ei thlir lai beisei naw tieng tak thil a hung in her chu ei hmai a mawk naw thei ngai nawh. A ni ngei, lekha inchuk dinga an fe tawm khan darkar iengza'm khawvel suolna a inhnel lo dingin thununna ei pek ti ruok chu ngaituo tham a tling a nih. Nauhai ta châwk chu intiemna lo in
nei tir in loa khawm chawina a um naw ding vei leh. Ei hnam Pa Mahatma Gandhi meu khawm kha Londona Bâr (Dân) inchûk dinga fe a tum khan a nu chun a phal naw phiengsen el ani kha. A san chu Londona fe tamtakhai umdan ṭhanaw a hriet lei a nih. Gandhi a ni leia chuong suolna a’nthawka fihlim bik dingin a ring thei nawh. Nisienlakhawm thiempu hmaa intiemna feltak a nei zet hnung chun a nu’n a rem ti ve chau a nih.
Ṭhalai hai khawm pawl 12 ei passed ta lem hin chu ei nu le pa mi control phak naw na hmun a um ei nuom a. Ei Percent hmu kha University changkang le ṭha met zawm theina dingin a hun tawk
am ti khawm ei ngaituo ngai nawh. Khawpuia ei um a, ringnawtuhai nundân ṭhanaw tamtak ei zu'n chûk saa. Nun a zalen leiin ei inhawi ti zawng takin ei khawsa ta lem a. Lekha tiema hun hmang ding ni siin ṭhenkhatin zu le sa chen na’n hun tam lem ei hmang pei bawk. Nuhmei ṭhenkhat lem chu an inchei nuomdan a hung danga, lekha nêk hmanin inchei dân an hung thiem lem a. Awlsam taka sum lamsuok dan khawm an hung inchuk sa pei tah. Ṭhenkhat chu in tieng nu le pa'n iengtinam sum an lamsuok ti ngaituo phak ṭhak lova pawisa demand la hrat vieu nawk
nghal. Iengkim parents paid vawng ni si. Inphalamna châng hlak an hriet si nawh. Nundân le incheina kawnga hnâm insâng lem hai ei copy khawmin a âwmtawk hi
hriet a ṭha. Hnam changkang hai khawsak dan le an inchei dan ei copy a chu a fuk thei tak tak chuong nawh. Ei figure hi tribal figure ani tlat annawm.
Leh, nipui châwl hmang dingin veng tieng an hung suoka, khawpuia an inchei dan an hung sawm a. Biekina fe ding khawm in club hall a fe ding ang el in an inchei a. Ṭhalai pawl hlasakna a an ṭhang chu thukhat, thawlâwm an la hang dawl nawk lem lem chu cheng sawm thlak tum kha chengkhat thlak ei nuom ruoi el. Hieng ang hi ei ngir hmun ani tak leiin tienlai ei pi le puhai thusim, “Hna hlui chu hna thar thar in a thlak hlak” ti dam hi ei tulai khawvel a ding chun beiseium thil an ta naw niin an lang. Nisienlakhawm ei hmatieng inthim tak suk var nawk thei tu chu ṭhangthar hai hi ei nih. Ei thilthaw na phawta Pathien hre zing ei ta, "Thununna hlaw lo khawlai nau" ang chu ni tum naw seng ei tiu.
August 1, 2010
NB: Hi thuziek hi i thlawpnaw tam tak a um el thei, amiruokchu a ziekhun hi i en chun; "E... ni thei awm in an lang" i ti ngei ka ring. Haha
Post a Comment
Post a Comment