Ngai raw Bethlehem dar chu an ri,
Aw a ri a va mawi ngei.
Krismar dâr in lung a min len;
Bethlehem a min hriettir,
Mivar hai ruola fe dingin
Aw ka thla insiem ve raw.
Phalbi boruok in a mi hung del a, ṭieusum khawm a zîng chuoi taa. Tlângsâm hai khawma an pârmawina an insuo nâwk ṭan a. Khawhnâwma hai an pâr vul chuoi ta chun Krismas a hnai tah ti inhmai ruol a ni nawh. Naupang hun lai, "Hrisimasi (krismas) a hnai ta ie, tlângsâm pâr a vul chei chuoi" ti hlâ sak malama chîmbuk baw êng hun lai kha a min hrietsuok tir nawk hlak. Krismas dâr thangkhawkin lungril in hnung a keitho a, mivar hai ruola Bethlehema naute chibai bûk din an mi lo fiel ve ta zing el.
'Aw ka thla, nangkhawm insiem ve ta la...'
Awleh! tleirâwl ruol chun Krismas meipui ding thing an zâwn ṭan nawk ta a. Zântin deuthaw in khawhnâwma hai fe in thingṭâwl zâwnin an 'haw-haw' lai lai hlaka. Lengkhawm hall bâwlna ding bul lai chun thing an sie bûm rum ta a, Krismas le kumthar chu tûng a um zuol ta hle. Ruoi ngaituotu pawlhai khawmin khawrâl a mi sebâwng chal chu vêng an hung kei tlung ta bawk a. A thlukvûm ringawt khawm nauruol hme khawp ding ni mei a tih. Khawlaidunga chun an tlunga, khawtlâng ennuom a tling hiel. Pâpuitebawp ṭhenkhat chun nau puok malamin an hung en deu vet a, naupang ruol khawm phalbi zîng dei hnuoia buṭhing tlang dawm malamin an pûhai kut chelin tûk tin bâwngchal enin hun an hmang ṭan nawk tah. Vairik a hung ni a, Kohran upa inrawina hnuoia naupang hawn chun sebâwng chal chu daihnai tieng chula an zun thla a, bâwngchal a hung hel deu changa an tlansiet malama an khek indur vêl dâm kha hlimna ropui chu a va tling zo ngei de aw.
Krismas indên taka hmang an nuom leiin khaw mihai chun bu an sêkkhâwl hai chu vârṭien a'nthawk meiser sitin an thak tlut tluta. Nupui ṭhenkhatin chula pat an vê khâwma, hmarcha le sî hai lakhâwmin krismas khawrsaw phurhruk na dingin an zawr tâwl bawk a. Mikhuol thuomhnaw zawr hmel hmu ding an um deu zing ta bawk a, mitin el chu Krismas ding leiin an inphi buoi sup sup zing el tah. Tukhawm ina tha inzal taka zâl par hman an um nawh. Mivarhai ruola Naute chibai bûka fe hman ve an nuom lei chau a nih. A va hlu ngei deh!
Krismas thlai suongna ding thing phur dingin nunghak le tlangvâl ruol chu khawhnuoia hnâkhâr bila an inri thla hum huma. Ṭhalai ruol hlim ri chun vadung ruom a khawk thla rum ruma. Inhawi an ti in sâppui nun reng an ngai nawh. An khawvel chite sunga vânglai hun hlimtakin an chên a. Khawvel nun suolna haiin an ngaituona sungril a la chîmbuoi phak naw a. Nun kha a la thienghlim hle el a nih. Ṭhalai hai thing phur khâwm chu tuol zâwla lailên siemin an zar duoia, naupang hai ta dinga inhnelna hmun inhawi a
a hung ni nawk pei a, iengkim kha an rem fûk vêl vawng el chu a nih.
Lo sin khawm thâwkkhat inzo fel a ni taa. Urlâwk zantieng chun veng kil tina buman bei suk ri an ri tlut tlut a. Nunghak hai chun bei fûnna ding hnâchang hna hai chu sawngka le tlângbân a hai an zar duoi a. Lengkhawm ṭina mî-u hai le Î-daw bei inhnâk chap pet fân nar nar kha an ta dinga hun hlimum le nghakhlaum a tling ni ve ngei a tih.
Zîng khuo a hung var a, Lal pieng champha a hung inher suok zet chun vêng mawnga vawk a khêk chul ruoi ruoi taa. Bâwngchal khawm chu a vun khuong dingin an lo kei mar pang hman tah. Ṭawng inringna a inthawk chun nunghak ruol tui chawi ding an hung puong zing a. Naupang ṭhenkhatin khawlaidunga vawk zun-phîng an lo pêt lai lai zing bawk. Hlimna kha a van sâng ngei deh! Leh, inkhâwm a hung hun chun rêl mawnga thuomhnaw thar an sie ṭha hai chu an kei dawk tâwl sap sap a, a thar rim innam hieu chu hâkin mitin el chu hlimtakin an innui sieu a. Krismas Dâr a hung inri keng keng chun Naute chibai bûk dingin hlimtakin Biekin tieng an pan tâwl seng tah a...
Krismas programme fe lai zing chun sapêl mi haiin an hlawtling a ni ti inentirna'n tlâng an hung tlir a. Kohran mipuiin khuongte, parṭhi hai le tinhmuna ramvachal hai an lo hmuok dâm kha, 'Hlimna Krismas' suk 'Krismas' tu pakhat a va ni ngei deh!
Lal piengchampha lawmna ri chun khawtlâng a nghawr a. Kohran laia hlimna tlung leiin khuongpui khawm an vuok siet der taa, Krismas a tâwp el ding angin an lang tah. Hunpui a zuk liem el ding chu ṭhalai ruol ta ding chun inpâm um a tling a. Lengkhâwm tâwp zai hrim an rêl nawh. Sienkhawm, Pastor Thangngurin a lo inzawt angin, hunpui hlimum tak khawm chun kumpui thlangtla ding chu zui naw thei anni bîk naw a.
"La châm rawh, la châm rawh"
tia nunghak tlangval ruolin a bân chela an ngen mawl mawl khawm chun hnungtieng an nghat lem ta si.
"Ka hung invêl nawk tieng lan hmu nawk ngei dingin. Damtakin Chibai!"
tiin phalloten an inthla liem ta lem a. Zîng khuo khawm a hung var ta leiin ṭhalai hai khawm chun ṭinzai an rêl ve tah a...
Aw, Krismas! Chulram fang châng ni hin lunglên i kei tho ie...
#Riekmaw_Cabin!
Rongtheang
14th Dec 2020
Khawsawt a um riei riei ie..
ReplyDelete