KA ṬAWNGṬAINA NGHIL AM AN TA?

Inneina hi mihriem hringnun suk famkimtu pakhat a ni leiin ei lâk ursûn hle. Naupang chîte eini a’nthawk ei nu le pa ha’n nundân ṭha tamtak an mi’n chuktir hlak. Kum sawm pathum ei tling ta lem hin chu nuhmei pasal thila fimkhur dingin an mi hril nasa thei hle, mi tamtak thawsuolna khawm a ni hrim bawk a nih. Hieng anga inchuktirna le thununna ei dawng nasan chu, Nu le pa’n an remtina ngeia Kohran dân thienghlima nuhmei pasal nei an mi nuompui lei a nih. Mi tamtak chun an remtinain an nei ngeia, ṭhenkhat ruok chun zawm harsa ei ti deu hlak.

Ṭhalai tamtak Kohran dâna innei ei pung peia lawm a um, sunzawm pei bawk ei tiu. Pathien le Kohran mipui hai hmaa kut insui hi a mawia, ei sakhuona le khawm an hme hle a nih. Amiruokchu, mi ṭhênkhat hin chu Kohran dân thienghlima inneina khawm hi ei pâwl nêl ta hle ni’n an lang. Kohran dan anga innei inṭhe nâwk hmu ding an um zeu zeu. Nu le pa, kohran ṭhuoitu le mipuihai hmaa a thlum a al, harsa le rinum khawm nisien kumtluonga tuor tlang dinga intiem, nau le te khawm nei tah, inṭhe nawk el hmu ding an pung pei hi a pawi hle. An

kumtluong chu a tawi nuom sawt ngawt el. Inneina programme kha video dam an lo lak pal lem chun a dang an lo en pei naw khawma infuina thucha le nu le pa ni dinga an intiemna bek kha chu zuk ennawn hai sien chu nuom a um hle. Inneina hi incheina ang chau an suk hawi tah. Ṭhenkhat chu mo lâwmna sabêl khawm an

sawpfai hmaa suok nawk el khawm awlsam an tih. Chun, vangduoina leia Nupa ṭangṭhe tuok khawm ni lo, thupui um rak lova inṭhea intuoi thar nawk khawm an um nuol. Hieng ang mihai hin a remchang hun hmasatak biekinah a dum

sût le vâr sût in an inthuoma, hmai ṭim ṭhak lovin kutsebi an inbuntir nawk zut el hlak. Kutsebi (wedding ring) le certificate hau tak record siem tum khawm an hawi. 

Hieng ang inneina hi ei kohran lai hin a mikhuol ta naw hle. Kohran dan thienghlim a sukda thei ding ni'n an lang. Kohran ṭhuoituhai hin hang bi chieng nawk zuol inla nuom a um khawp el. A ṭul phawt chun kut khawm phar el inla a pawina a um dingin ka ring nawh. Tuta ṭhalai tamtak hai khawm inneina nikhat chu ei chunga a tlung ve ngei ding a nih. Chuleiin ei nundân hai vawng thienghlim zing ei ta. Kohran thuring (Doctrine) zâwmin Kohran dân thienghlim ngeia innei tum seng ei tiu.

### Hi thusep tawite hi ka thusep ziek hmasatak a ni a, khawsawt um khawm ka tih. Kum 2010, April 11  khan hi thusep hi Ṭhalai Weekly a insuo a lo ni tah.Thalai Weekly Editor hai felna zarin kum 10 hnunga copy hmu nawk theia um hi ka lawm hle.