Ṭûlna leiin zîngbu fâk hma in Hamren anthawk kan inthawk suoka. Dârkâr khat chuong met kan tlân hnung chun ka thirsakawr chun a mi nuor san tah a. Thaw dân ding a vâng hle el. Nunghâk nuor chu thlêm a lan hawi a. Thirsakawr nuor ruok chu kei pa lungmawl hin thlêm dân ka va thiem ta naw ngei de'h!
Ka ruolpa, U Nelson Hrangchal (Sawrkar sinthawa Hamrena posting) chu an vêng Hmarkhawlien tieng pan ding, Lankaa motor zuk man tum a ni a. Inhnu el thei ding a ni leiin mi lo fe san el raw tiin kan inṭhatṭhe a. Ka thirsakawr khawm chu Jengkha ka tlungpui thei hrâm a.
Jengkha lam ṭhuoma chun châwl hadam malamin ka ṭhung a. Pâpui târ tieng hmel put tah, kum 60 vel hmel put hi bike ṭha lo te hin a hung tlan tar tara. Lamsîra SUV car châwl chun kawtkhar a hung hawng thuta. Bike a hung tlân pa chun a bawa, ama le a motor chu lamliena chun an inthal dêr a. Car neitu chu pa thau, ngo vur el hi a ni a. Putar bula chun, "I hung tlan hrat a ni kha. I mi hmu naw maw? " tiin a zuk vin deu thur a. Putar pa chu to ṭawkin a tlûkna hmuna inthawk chun a tho a.
Mihriem mita motor hmusitum ve tak khala, thuomṭha an bel thei naw lei el khan car neitu khan a zuk zuom chu ni ngei a tih. Kan sûm zo ta naw a, Karbi ṭawng ka thiem ang ang chu hmangin ka hei hril a. "Pu, i thaw suol a ni kha! Kawtkhar i hawng ding chun mi an hung am ti khawm i en ding annawm. I motor siena khawm andik naw a ni kha!" ka hang ti dêk dêk a. Ka âwma a mi hung ṭhâma, "Khawlai mi am i nih? Kan ram a ni hi!" tiin a mi rau thur thura. A râwl an ring ta hle el. A sum nei leia mi ṭhenkhat anga chapo taka nun hmang ve hlak ni ngei dingin ka ring. A sie lem a tlung hman hma in kan bul vêla umhai zâr chun kan inkeidei thei hrâm a.
Kha thil tlung lei khan ka thisen an tlawka. Ka thang chu a tlawm ve hle el. Thaw thei hlak ka nei si nawh. Vêng a ni naw khawma Umrangso lai bêk ni sien chu ka zawlpa LR Joy Tuolor hai unau zuk ko ka ta. Ka tupa Eliazar Joute chu lungsen inthim el in hung tlân tlung nghal bawk a ta. Bu chîl takin kân chîl let el ding a na. Kan sawp huntawk ta maw ti vela khan Zâra Famhoite, Joseph Hanse le Markos Teron hai khawm hung tlung hman tâng an ta. Inthlahrungtak pumin, "A hun ta kha Sir, a hun tah! Dittawk ta ro" tiin mi lo dang tâwl an ta tiin duthu ka sâm ta ringawt a.
Putar chu a bike kan keitho puia, a kut le ke a hliem met bawka. Iengkhawm hril loin a fe liem tah a. Kha papui khan a thiemthu hril ding tamtak chu nei ve ngei a tih. Nisienlakhawm, vawikhat khawm a thiemthu hril tumin a bau a phawng naw a. A thiemthu hril ni sien khawm a tienga ṭhang ngam an um ring a um nawh. Asanchu, a hmel en khawmin mi umthei sungkuoa seilien a ni naw a. A inkhingpuipa anga mi neinung a ni naw ti chu a hmutu hai mita chun hril ngailoa fie a nih.
Hieng hin ka ngaituo a, pasietna hi chu a va sie lawm lawm ngei deh! Mihriem dikphung khawm a min humtir zo ta naw a. Hum ngam ding khawmin huoisenna a um ta nawh. Mi hnuoihnung le pasie hai chun an sika ṭawng ding khawm an nei ve naw a. Hnengdena le hmusitna chu an tienga ṭhang um sun a ni ta el awm. Ei khawvêl tak hi chu aw...! Mihriemin a mihriem chanpui chunga a suklang ding thil hai; hmangaina dâm, lunginsietna dâm, sawmdawlna le hrietthiemna hai hin hmun an chang zo ta naw a. Thudik chu kawtthlera a tlu a. Ringumna a ringum zo thei ta naw a. Felna le ṭhatna dânhai khawm chu khawhnâwm tieng hnâwlhmangin a um zo tah!
Lung nilo tak pum chun Jengkha phaizawla chun ka tlan det det a. Mi rilo-thilthawthei hai leia mi nâwlpui harsatna dâm chu ka ngaituo zawm ta pei a. Ama, Pu Solomon V. Hmar in, 'Hringnun hi Krista le a fair naw a um naw' a lo ti a. A ni ngei, Krista rorelna hun a la tlung naw leiin kei chun hi khawvêl hringnun hi chu a 'fair' ka ti thei ve ta naw a. Ei Lal Krista chunga ngei khawm ro fel in an rêl nuom naw a, Pathien naupa meu khawm thiemnaw an inchang nuomna rama hin ieng hi'm a 'fair' chuonga?
#Riekmaw Cabin
27th Sept, 2025
Post a Comment
Post a Comment