Vairik nisa an kâng awk tah. Hamrena inthawka Lanka pan dingin kan siema. A ṭul chun Hojai chen fe pei dinga insiem ka nih. Kan hnu met ta leiin tlâng lampuia fe loin kawitan tieng ka fe. Motor a tlawm bawk leiin inhawi khawm ka ti lema. Hamren suoksanin sanghal ram tlat thawin, ka khât chau chun dam te'n kan tâwl liem taa.
Ronghidi tlângdung a chun hadam takin ka tlan peia. A tlângdung ka hei thlîr vel a. Lunglengna ding ka hmu rawn hle el. Tlângram nun a min hrietsuok tira. Fûr khawthieng kâra chun hmârtieng tlângdung chu ka zuk thlîra. Râlkhinga a chun muoldung sei deuin anzam zura. Ngawpui tak meu a la nih. Tuizâng panga Vangchawm ramngaw dam a min hrietfuk tir rum rum el. Simtieng ka hei thlîr nawka. Jengkha phaizawl an cham duoia. Luongmuong le hadam takin kan tawl pei taa.
Tlangram nun, chinlai hun dam chu ngaituona ah an hung inlang zut zuta. Chulhnung ramre fang ang deua inngaina ka neia. Lungleng hla chu lungrila sak zing pum chun râlkhing tienga ṭieusûmin a ibâwm tlang hai chu ka thlîr kuol vel a. Khawsâwt a na ngawt el!
Lunglêngna in a mi ṭinsan am an ta aw ka lo ti hlak kha sungrila an hung thar nâwk zut zut a. Hieng el nêk hin chu tiin Independent hla ka dit dit zuol hai ka sak pei a.
"Hun fe peihai Lalpa loin
KhawlaI am an tlung zo tah a?
Kîr ruol lovin muol an liem tah,
Hun la umhai iengtin am hmang ka ta?"
ti hla sak a lungmuong taka ka tlan zing lai chun lamkawia chun truck lien kan tuok pui thut el tah a. Lam a chîn bawk leiin inringhman na hun ka nei ta nawh. Lamtlanga chun ka tlan thla a. Khura chun kan ṭhut bawra. Pathien zâr chauin ieng chu ka ti em nawh. Ka motor kan keidawk hnung chun kan inṭhatṭhea, ka tum ram panin ka tlan zawm nawk ta pei a. Lampuia chun ka ngaituo pei a. Thlazing ni 4, 2025 khan mi thawsuol leiin tuoksiet ka tuoka. Vawisun thlazing 30, 2025 khawm hin mi fimkhur zo naw lei bawkin harsatna ka tuok nawk ana ka ti a.
Lanka ka tlunga, ka motor chu a sietna neu neu a um leiin kan siem tira. Chuonga ka motor siem ka nghâk lai chun ramtin ka ngaituo a.
Ei fimkhur naw leiin mihaiin harsatna an tuok hlaka. Ei ṭawngbau fimkhur naw lei dam, ei nundân fimkhur naw lei dam, ei duâm lei dam le ei dâwntâwi lei damin mi tamtakin natna an lo tuok hlak a. Ei fimkhurnaw pei chun eini leiin mihaiin iengchen am harsatna la tuok an ta? Nundân khal khawm hi fimkhur a lo va ṭul de eh!
Khawvela hin ei thiemna ah khawm thiemnaw inchangin um hlak ei ta. Ei suksuol nawna thila khawm suksuol lem anga ei um châng um a tih. Eini suol leiin mi tha tamtakin an tuor hun khawm tamtak la um ngei a tih. A ni ngei, hnuoi mihriem hai suolna leiin ei Lalpa Isu meu khawm khan a tuor a ni si a maw...
Thilmak tak pakhat chu, tuta ka thil tuoka hin lungsenna na hrim ka nei nawa. Lungsen hmel khawm ka put nawh. Ni dang ang ni sien chu ka kuttum fûn pumin, a khem in meng ka ta. Ka lung sen rek hleng a tih.
Kei Sema Faihriem, pa lung inrawm le thinsie, nûpui ṭhenkhatin an nauhai inṭhinaa an mi hmang hlak. Mi lulul le nêl umlo zet el. Mi'n motor an mi tlân pel khawma ka lekhêl hmakhat thangtlawma hnawt char char hlak pa khan lungsenna hrim ka nei ta naw a. Kum 5/6 liemta lai Umrangso truck driver haiin lam an min ken nuom naw lei ringawta a khema ena insuol ngama lampuia ngir el hlak pa kha ka van nem ta ngei deh! Hmangaina râwl nêmin, "U Sem...," tia an mi ko hlak chu a ni si nawh.
Lengṭul nunnem am a nih, tlangvâl nunnem an ti hlak ang hun kha ka ni ve el am an ta aw ka ti a. Kei ngei khawm mak kan tih. Sienkhawm ka hrietsuok tah. Ieng dang a ni nawh. Chanchinṭha lei chau a nih. Zani zân liem ta khan, "Nangmaa chun I mihai an hlim theina dingin, I mi sukhar nawk naw ding am a nih?" ti le "Sandam mêk hai le, bohmang mêk haia chun, Pathien ta dingin Krista riminhnik kan ni si a" ti thu hmangin rawngbawlpui hai lai ka lo sermon a ni kha tie. Chanchinṭha hi chu a lo va ṭha ngei de aw...
Kei ngei khawm hi hun sawttak ka lo in-innghilna anthawk nawt har a umin. Bohmang mêk hai ta dinga ka riminhnikna da ta khan dâwn thar la in hung pâr vul pei sien. Chanchinṭha rimtui inlêng sien, lungdamin leng tlâng inla. Krista chanchintha hi inthang mawi pei sien. Chu zâra chun dawtheina dam, thuhnuoirawlna dam, zainêmna dam, hmangaina dam hi hnuoi mihriem lai hin pâr ang hung vul pei sien nuom a va um ngei deh!
Riekmaw Cabin
30 Aug 2025
Post a Comment
Post a Comment