KA ṬAWNGṬAINA NGHIL AM AN TA?

Lalpa chu ka ta dingin berampu a nih. Tlasam naw ning. Ama chun hlohna hringdup hmuna hai a min bawktir hlaka. Chawlna tuipangahai a mi ṭhuoi hlak. 

Inpâkna Hlabu 23:1-2

Thlaphal 6, 2022 a ni a. Favâng nisa  khawm a sen deu hmiei tah a. A boruok khawm an thieng vâk tah. Keini hai ang a fûr a ṭhâl a lunglêng hlak mi ta ding lem chun lunglêng a na ṭan nâwk ta hle el. Chuongang boruok kâra chun kohran programme induongsa suk puitling dingin ka station maksanin Langmeklu tieng ka pan hnap hnap a. Ka zuk tlunga, rawngbawlpui Evan. Ramfangzau hai nupa chun lâwmtakin an mi lo chibai a. Evan Ramfangzau a nuhmei, Evan (Rtrd) Lalthiengzo (Ei hriet thei dan ding chun Rev. Lalngaisang a sangnu. Pathien thu tienga ka pûr phurna a ni rawp hlak) le chun hun danga kan thaw dân ang bawkin kan titi ta mawl mawl nghâl a. Hringnun khawvêl a'nthawk Pathien hmangaina thu chu kan hung hril kai pei a. Kan inhnik hle el. Chuonga kan titi lai zing chun hi hla hi ka lungrila a hung inlanga. Hi thusep hi ka hung ziek suok a nih. 

Ka nunram ka thlîra, hi hla hin a mi hne a, a mi hne chau niloin a mi'n chie zawp a ni tak el awm ie. A hla ṭobul le khuntaka a umzie hrilfie khawm ka tum chuong nawa. Ka hrietna le thiemna khawmin a phâk naw bawk. Amiruokchu,  ka nuna ka lâklût dân ang peiin ka hung ziek tum lem a nih. 

A hmangainaa ka châwlin

Ka Pa'n a mi hriet;

Thil ṭhatak a lo ni rawp hlak,

Ka pa remruot chu,

A lungrila a ruotna chu,

Keima ṭhatna ding;

Lungngaina le lawmna hmunah,

Hmangaina ka hmu.

Mihriemin a mihriem chanpui chunga a pek thei ropuitak chu hmangaina hi a nih. Hmangaina hin lungril kawidar neng ta hnung khawm a tuomdam thei a. Beiseina nei talo anga hringnun hmang mêk hai khawm hmangaina hi beiseina petu a ni rawp hlak. Nunghâk le tlangvâl in ngaizawngna a khawm hin hmangaina hi a laimu tak chu a nih. Chu hmangaina chun mi tamtak a suk hlima, tamtak a sukhliemin  mitthli an tlâk tir rawp hlak bawk. Bible in, hmangaina hi tâwpchin neilo a ni ti sien khawm mihriem inhmangaina hin chu tâwpchin a nei châng a um a hawi ie.

Mihriemin ei mihriem chanpui anthawk hmangaina ei dawng hlak hai: sung le kuo inhmangaina, unau inhmangaina, ruolṭha inhmangaina nunghâk- tlangvâl inhmangaina le hmangaina dang dang hai hi ei dawng ta naw nia inhrietna a um hlak a. Hmangaina po po a tâwp râwt ta'm a ni aw ei ti a beidawnga ei indawmkûn el lai khawmin vân tieng ei hang tang a. Pathien hmangaina chu a la pangngai zing a ni ti a min hmutir nawk hlak a. Chu hmangaina chu a ni ei châwl hadamna chu. 

Mihriem ngaia hmangaitu haiin an mi ṭinsan a. Hnemtu ni hlak kha hliemtu'n an inchang lem a. Hrietthiem chu a'ntak hlak a nih. Amiruokchu, maksana ei umna nun kha ei ta dinga Pathien remruotna ṭhalem inlangna ding a lo ni lem hlak. Hliem tuora nun chau  taka ei inrûm lai khawmin ama chun a mi maksan ve ngai naw a. A hmangaina ropui zie a mi'n hmutir a, beiseina thar a mi pek nawk hlak. Pathien hmangaina, a ropui ngawt el!

Ka Pain ka ngaituo a hriet,

A nau a enkawl;

A kuom tieng a min pan hnai tir,

Thlipui hrâng laiin,

Ka hnuoi beiseina inhningin,

Mitthli tla sienkhawm;

Ama chu kan hnemna a nih,

Iengkima iengkim.

Mihriemin ei hmatieng hun ding ei ngaituo a. Beiseina le ei thlîr zinga. Chuonglai chun, beiseinaw tieng takin eurokuilo thli a hung hranga. Hnuoia ei beiseina le innghatna po po chu a mi sukthlawng pek vawnga. Beidawngna leiin nun hi a ngûi zo tah a. Pindan sûngrila mitthli hruk fat fat châng a bo nawh. Sienkhawm, chuongang lungngai huna khawm chun ama chun a mi hriet zing a. "Ka nau hung rawh!" tiin a hmangaina vakam tieng a min pan hnai tir hlak hi a lo nih. Ama chu kan hnêmna. Ka lungril ngaituona po po hretu. Ka iengkima iengkim. Ka Pa, ka Pathien ni awm hrim a lo nih. 

Aw ama chu ring tlat dingin,

Ringna mawl takin;

Pa hmangaina lawmumtak chun, 

Lungril a thlamuon

Ka lampui chu a châwlna tieng, 

A fe ti ka hriet;

Lungawitaka ama zui chu, 

A ṭhatak a nih.

Mihriem hisapna, beiseina le hmatieng thil ding ngaituona po po chu a tâwp vawng tah a. Ka khawvêl, kan hnêmna ei lo ti hlak hai khawm lâk hmangin a um vawng tah. Chu huna khawm chun a hmangaina hmêlmâwi a min hmutir a. Hringnun lampui ei lo induong sa chu sukpingin, a ma remruotna lampuia chun a mi ṭhuoi lem tah. Ama mi ṭhuoidân ang peia lungawitaka fe pei dinga insiem hi ei ta dinga thil ṭhatak a lo ni lem. A hmangaina thlazâr hnuoi ah chun châwlna a um si a. 

Chu lampuia chun hmangaina tâwploin a mi ṭhuoia, hadamna tlâng ah a min chêng tir a. A ringum ropuizie a min hmu fie tir pei a. Ei chunga a remruot dâna hrietthiem harsa ei ti a, pawmthiem intak ei lo ti hlak hai kha ei hung man thiem pei tah. Chierna nun bânsanin, lungawitaka ama hnungzui hi hadamna tluontling a ni ti a mi namnghet pek ta si a.  

Khawvêl mihriem hai hi châwlna ding zawngin ei invâk ei invâk a. Nun hadamna ding ei zawnga. Hausakna dam, nun inhawitirna le inruithei thila hai châwlna ei zawnga. Nunghâk  le tlangvâl inhmangaina ah khawm hadam tumin ei inphi buoi rawp hlak. Amiruokchu, chuonghai khawm chu hmu inla khawm hadamna tluontling, châwlna tak tak a um chuong nawh. A tâwpa chun beidawngna chau a ni nâwk hlak. Chuleiin, Pa in nau a enkawl nêk hmana hmangaina nasa lema mi enkawltu, hlohna hring dup hmuna mi ṭhuoia, châwlna tuipanga mi'n hadam tir hlaktu Pathien hmangaina ah hin châwl ve dingin insiem ei tiu. A'nhawiin a hadam lem si a... Amen!

Riekmaw Cabin

8th Nov. 2022