Zân dang ang bawkin kan inhmukhawmna hlak hmuna chun kan ruolhawn chu kan kim nawk ṭhap tah. Hun liem ta hnung le, kan chetsietnahai hrilin kan innui dar dar a. Kan ruolpa chun a pherkhuong a kuo rên râwn a. Hla kan hang sak nawk dap dap
ṭan a. Inhawi kan ti hle el. Sâwt an nawh, kan ruolpa chu a ṭhang zo ta naw a. Ama an hnîk a, a perkhuong an hnîk tir bawk. Nunhlui lungleng pûrdo ni ngei a tih. Hlasak thei ding ziezâng kan ni ta nawh.
A chanchin lungsietthlak tak el, ngainuomum tak, ngai ngam um si lo chu hieng hin a hang inzâwt tah a.
Khuolrâla ngai ei nei a. Iengtikam aw kan inhmu thei ding? Iengtinam tiin ni le thla tiemna (calender) uluk takin ei hang bi veng veng a. Hunbi ei hang thliek a. Lêngi tuol lengna vângkhuo panin ei hang inthawk dawka. Phûr a um in tha a fân hle el. Pheikhai khawm a zâng nuom vat vat hle. Amiruokchu, châm sawng thei ding ei ni naw leiin kir nâwk hun ding ei ngaituo châng chu ngaituona hi a buoi ram ram hlak a nih.
Ei hang tlunga, zân boruok inthieng tak kara chun arasi an de tier a. Thlasik lam khawm an zâm chiei tah. Phalbi boruok innam hlet hlet kara chun an ina leng dingin ei hang inthawk suoka. School tlâng anthawk an in ei zuk thlir a, mei a de kang kang a. Râwl khâwng malam chun an in ei zuk lût a. Sûng le kuo hai leh ei hang in chibai nghien nghien a. Nu le pahai khawm chun sawt niloin an mi zâl san a.
Chuphing leh, châwrtieng namthlâka ṭhunghmun ei hang rem ṭha a. Zân thla a eng deu ruoi bawka. Hril nuom tamtak nei siin, hril el theiloin ei hang um khawtlai te te a. Sienkhawm, ei um dan in thu tamtak chu a lo hril hman ta hlak.
Lêngi chun thingpui sen a hung thlit a. Thingpui lumin bau ei hang ṭhuoa. Hnuk hrui a hung lum zet chun ei ṭawng suok ṭan tah. A va'n hawi thei ngei de aw...!
Ni tam tak châmtheina pek ei ni si naw a. Hun chu a liem hrat hle el.
Zân nuhnungtak na ding chu an tah. School tlânga lungpui chunga chun ṭhunghmun ei hang rema. Veng mawng tienga naupang ruol inhnel ri khawm hriet liet liet theiin a um. Thutin hrilin âm takin hun ei hmanga. Sienkhawm, a boruok chun rik na tak a nei. Zîngkhuo vara inṭhe el ta ding eini lei ni ngei a tih.
Ama zaipu, Joshua Buhril iengin, "Zingkhuo la var naw hrâm la..." tiin chel tum inla khawm chelthei ruol ding a ni si nawh.
Khuo a hung vâr a, bus chawlhmun tieng panin ei hang inthawk suoka. Tha chu a fân naw hle el. "La chám el ta la... " ti a tlo na ri hlak an ring deu deu. Sienkhawm, hun le tuiluongin mi a nghâk si nawh. Aw khawvel!
Bus chawlhmun ei hang tlunga, hlim êm êm a inhmu kha hmel thûm deu burin ei hei inmel hrek hrek tah a. Inhnâm inmel a ni nawh! A tu tu khawm ei inen ṭha ngam naw a. Mitthli a hnai ti chu hrilloa chieng a nih. Bus a hung inri vung vunga, a sûnga ei hang lût a. Mit meng mawi tak ni hlak Lêngi mit meng a mawi zo ta nawh. Bus an sawn ṭhut thut a, ei hang tlân liem zet chu patling lungphu a buoi nuoia. Ei khawhmu a fie zo ta ngai nawh.
Kharhlaa D nei chu lunglêng a naa. Inhmu hun a tawi si a. Hun tamlem hi khawsâwtna in ei hmang zo chu a ni tak. A pawi tak chu, ringumna a ringum zo ta naw hi a nih, tiin a suktâwp tah a.
Ka ruolhai hi an vangduoi am an vangnei ka ti ding, khuo hmuna ngaizawng nei an um meu nawa. Sinthawna le inchukna lei damin tlâng khata lêng tlâng hun an nei ngai meu nawh. Kan ruolpa pakhat chun hieng hin a tawnhriet a hang inzâwt ve nâwk a.
Sûm ibâwm ram tieng panin thafan takin ei hang inthawk dawk a. Shillong khawpui le a sevêl mawina hai ei fang vêl a. An hril Ward's Lake, Shillong Peak, Laitlum Canyon, Cherrapunjee le a dang dang dang haia ei lêng kuol a. Nun kha chu a hlim annawm. Sienkhawm, khuo hmuna lenglo chun inṭhe a hung ṭul nawk tah a.
Thirsakawr ei hang sir hringa, an rûm dur dur tah. Zantieng ni tlâk tawmin Umiam Lake (Barapani) pheia ei hang tlân zuoi zuoi a. Ni chun tui a hung em thle vura. A mawi kher el! Tui panga far thing kara chun ni zung a hun inkhaw eng sieu bawka. Sieli chun det tak hin a mi hung kuo ngei a. Ei phîng vun a hung sik malam chun, "Ngai hi chu i um annawm..." a hung ti dam deu sat a. A fiemthu a ni nawh, lungril liṭuonga inthawka suok a nih.
Highwaya motor intlan pel zut zut kara chun lungril chu an suol buoi a. Thirsakawr chu ei hang inrum tir vung vunga. Patling remruotna a buoi nawk tah. Sin ṭul pawimaw tak in a mi nghak zing bawk. Hun siem thiem an tak ngei ie...
"U... , Iem ti i to ṭawk ṭawka? ", ti malam chun phing vun chu a hung hmer nawk deu zawt a. "I sâwl taluo ding annawm. Vawizân la riek la, zinga hadam in kir de ti nih" tiin tlona thu a hung inri nâwka. Iengkhawm ei hril hman hma'n, "Ka thlai suong khawm la fa lo che a, i fâk châk annaw? Chun, zana i movie ti kha ei en ding... " tia nu'n naupang a thlem ang taka an mi hei thlem zet chu ṭhanghmun an phet duoi nâwk hlak a nih.
Aw... a samzai pakhat chaua a mi tlung ni sien khawm intâl suok zo naw ning. Hmangai hai bula um chu thlakhla a um a, a hadam em annawm. Mi dem naw ti niu maw...?
Ngai mana in chel sawng thei ding ei ni si nawh. Zîngkhuo a hung var a. Motor ngirhmun ei hang en fel a, phur ei hang siem zet chu tha hi a fân naw nasa thei kher el. Zing ruo a tla chep chep bawk. Feiin sûr law law sien chu aw ti a duthu sâm vawng vawng châng a bo nawh.
Ni khat dang châmtheina pek ei ni ta si nawh. Thirsakawr chu ei hang inrûm tir a. Kawtkhâr bieng chel malam chun innui sieuin a mi hang en a, a sûngril chu a ṭap a ni ti hmutheiin a um. A bân vei malam chun, "Ṭap naw raw uo..." tiin an mi hang thla liem dam kha chu aw...
A chanchin a hril zo chun chawmkhat chu vântieng a en vang vanga, a chil a lem khau a. A hang inthuok deu hlap a. An thawnthu tâwp dân kha pawmthiem harsa a ti ni ngei dingin ka ring. A ni ngei, tu hin chu khang hlimlai hun kha a liem tah a. Lung se takin a tâwp a. Tienthu an chang zo ta a nih. Khawvela thil tamtak hi theinghil ni um hlak sien khawm, hi hrietzingna hin a theinghil ve ngai lo hi, lunglên zuol chângin thla êng hnuoia la'n hril nâwk ei tiu maw ruolhai?
"Hmangaina hi chu a 'na' po ei chang a, 'hmangai' ei chang zo ve naw a ni hi maw...?" tiin ṭinzai kan rêl tah a...
#Riekmaw Cabin
14th Jan. 2023
❤️🩹
ReplyDelete