Tlângval ruol tha inthak chu khêlzâwl ah an insawizawi ṭan a. A hrattak nina chang tumin nasatakin an insingsa a. An inkhingpuihai hnebân dân ding ngaituo zing pumin inrim takin an insawizawi a. A uor fâl deu hai lem chun goal an thun huna an 'celebrate' dân ding chen an lo thaw ta hlak.
Khawsûng ah chuonganga an inri mup mup ta chun tournament a hnai tah tina a nih.
Inkhel thiem tlangvâl ruol chu khêlzawla an hang lût a. An tum chu an khingpui hai hne ngei kha a nih. Chu puitlingna ding chun ṭhangruol thiem a pawimaw hle a. Mâni sin le mawphurna hne taka thaw seng kha a nih. Pakhat suksuolna leiin team ta dinga thil pawi tak an tlun thei a ni ti hrezingin fîmkhur takin an inkhêl hlak.
Inkhêl thiem bîk deu hai chu entu mipui mit fûkna anni hlak a. Goal an thun zet chun a ṭantu mipui an khek indur a. Nunghak ruolin, "I ke a mawi... " tiin an lo khek khum hlak a nih.
FIFA World Cup, 2022 chu ni 18, Mîmtukthla khan a lo ṭumṭiek tah a. Khawvel rambung hai football inelna lientak a khan ṭanbik ei nei seng ring a um. Kei khawm Argentina ṭantu ka nih. A ṭantu naran el nilo 'hardcore fan' inti ve ngat ka nih. Ka khaw hriet, football ka en anthawka Argentina hi ka ṭan ta anni a. Maradona inkhêl hmu phâk ve naw lang khawm, a hming inthangna lei hin a zûna ka lo intâng ve tawp chu a hawi.
Inkhêl ei en chun ṭanbîk hi ei nei tlangpui hlak a. Ei ṭanhai chun hratna chang ngei dingin ei ditsak hlak bawk. Ei ṭanhai an inkhêl tha naw a, beisei anga an inkhêl naw chun ei lungril a naa, ei zawi pha hiel hlak. Chau chu annawh, eptu pawlhai nuisaw le deusaw ei tuoka. Chir an mi thekhum rawp hlak. Kei, Manchester United ṭantu khawm hin ka tuok ngun ve ta hle. Khawvel Football club a chu Manchester United hi ka ṭan tak anni nghe nghe bawk. An ropui hun vawikhat chuoi deu a ni tah a. Player ropui hril mumal ding khawm an nei ta nawh. Kum iemani zat sûng hi chu mi nuisaw chu kan ni deu tak tah. Sienkhawm, Pu Fima Fimate ti dân takin, "Isu, ICI le Manchester United hi chu inphatsan ngai lo ding". Ka Amen pui hle!
Ka lo pehêl sâwt deu tah a, mi hrethiem ro. Ka hril nuom tak chu hi a nih.
Ringtuhai khawm hi khelzâwla inkhel zing ei ni a. Ei khingpui chu hrilloa chieng a nih. Ei hratnawna zawngin, position tina hin mi hne tumin setanin a mi bei hlaka. A châng chun goal ei insuo ṭhawt hun a um a. Ei suksuolna anthawk ei insiemrema. Ei se bat ei sût châng khawm a um rawp hlak.
Ei inkhêl tactic izirin hratna ei changin ei chang naw theia. Attacking game inkhel huna ei defensive rak chun hnawbet in ei um thei a. Chuleiin, game tactic nasataka man thiem a pawimaw a. A hun izir peia chetthiem a ṭul hle a nih. Chuonganga che thiem hai chun goal an thun hlak a. Mi thlîr bîk le mit fûkna khawm an ni tei hlak.
Amiruokchu, football inkhêlna hi 'team game' takmeu a ni a. Mi pakhatin a hma siel taka a hming ṭhatna ding chaua thaw a tum chun pâwl ta dinga hlawtlingna a um ngai naw ding a nih.
Abiktakin Krista ringtuhai, rawngbawlna chanvo chel mek tuhai khawm hi khelmuol pakhata inkhel tlâng. Ṭhangkawp seng ei ni a. Mimal hmasielna leia hmingṭhat hnawt ringawta goal thuntu ni tum phet phet dam hi team ta dinga sietna a ni thei lem leiin fîmkhur a ṭha. Goal thuntu ding bika sie 'Striker' hi midfielder haiin ball ṭha in an châwm naw chun goal thun ding an hmu bîk nawa. Khingpui hai hung nawr let lo dangtu pawl, defender le goal vengtu hai khawm goal thuntu anga pawimawi ve an nih. Hrâtna nomawi ei dawmtheina ding chun khêlzâwla um hai hi ei pawimaw seng a nih.
Suol le ṭha hrât lem inchuna khelzâwla ei lût tah a. Mi ṭantu tamtak an um a. Vân mihai chenin an mi lo thlîr zing a nih. Ei inkhêl fûk naw vei chun thleng ei ni hun um a ta. Ei sikin mi an lût ngei ding a nih. Annawleh, ei châng mawi naw leia hremna le, khêlzâwl anthawka hnawtsuokna chen ei tuok khawm um thei bawk a nih. Chuleiin, hi khelzâwla ei lût ta si hin chu ei theitawp suoin, thâtak sangin inkhel ei ta. Mi thlîrtu haiin "I ke a mawi..." tiin mi lo khêk khum an ta. A tawpa chun hnetuhai ta dinga siem lawmman ropuitak inhlânin ei la um ding a nih.
Riekmaw Cabin
19th Dec, 2022
Post a Comment
Post a Comment