Kum naupangte ka ni in ka pa'n a mi thi san a. Ka nu rawi chaua khawsak kan rêl kha tuhnung hin ka ngaituoa. Ka nu hi a lo tuorsel ngawt el. Pathienin hratna in an thuom ti naw ruol a ni nawh.
Ka pa thi lai kha ka la hrietzing. Kan khawtlâng chun tuiruonga ngaman dingin an insiema. An liem vawng tah a. Vairik nisa an ding âwr tah. Kei khawm ka puhai ina saihlum ka hruola. Ka ni chun a mi hung koa, ka Pa chu a chau thu a mi hung hrila. Kan in ka tlung chun an lo ṭap mer mur tâwl a. Hamhai tak hin ka um a. Ka Pa chu a hung meng ier ier a. A hung ṭawng suoka, "Ei khawvela hin ringnawtu tamtak an la um a, chuonghai ta ding chun ṭawngtairuolna nei ei tiu" a hung tih a. Ṭawngṭairuolna chu kan nei a. A mi liem san pei chu an tah.
Kan inhnemna tak ka pa chun a mi maksan tah a. Kei lekha inchûk nuom, inchûk thei ta lo dinga ka um el chu ka bei a dawnga. Ka hmakhuo an thim hle el. Lo sinthaw ringawta ka nu'n a mi chawm ding chu thil theilo a nih. Ka sanghai pahni hlak an la chîn si a. Hmeithai ta ding chun huphur umtak chu ni ngei a tih. Kum 2001 a hung inhersuoka. Tuithaphaiah kan chuongkai ve a. Tuibuonga kan uma. Ka Pi Zachawng haiin khawsak rêl dan ding an mi remruot puia. A thlâwnin an in an min hluo tir bawka. Ka nu chun sin ṭul ṭul a thaw a. Keiin Tuibuong bazaara hmeruo le mafu dâm ka zawr hlak a. Kan fâk ding tâwk chu Pathien zarin kan hmu ve hrâm hrâm hlak.
Hun sawtnawte hnunga chun mi ina uma a kumnawk school kai dingin an mi ti a. Tuibuonga ka nu hai maksanin Sielmat ah mi ina chun ka um tah a. Kei mi ṭawngnuom ve tak chu ka umna, ka pi le ka pu haiin an mi lâwm thei hle. Huon an neia. Thlai chi dang dang kan chînga. Chu huona chun sinthaw in ka enkawl hlaka. Huona sinthaw dinga ka fe hin naupang school fe ding tamtak hi kan tuok pui hlaka. Kan hnar thei hle el.
Kumtâwp a hung hnaia, ka nuhai chu kan khuo Hmar Mauliena Christmas le Kumthar hmanga fe dingin an insiem a. Ka puhai bula "Maulien an hawi naw, ka fe pei ta naw a hla si" ka lo ti hlak kha hre chang taloin ka nuhai ruol chun fe ka chak ve nâwk tah a. Ka nuhai an fe ding tûk tak chun ka puhai chu Doctor panin an suok a. Kei khawm remchanga la in ka thuomhnaw ka siema. Ka nuhai fena ding truck innghatna station tieng chu ka pan ve tah a.
Motora ka thuomhnaw leh ka kai hnung chun ka puhai nupa chun an mi hung hnawtzuia. Fe lo dingin an mi thlema. Ka nu le ka sanghai ka ngai leiin fe chu ka tum ṭal a. Ka pi chu a lung a ni ta nawh a. "I hung kirnawk khawma kan ina hunglut ta naw ti nih" a mi tih a. Lung nilo deuin kan inthe ta a nih.
Kumthara chun Mauliena chun khawsak rel dingin kan insiem nawk ta lem a. Kei khawm ka sanghai dawn malamin PMS Schoola pawl ruk kan chuk nawka. Ka nu chun nitin lo sin thaw in kan khawsa ve hlak. Nikhat chu lekhathawn a hung tlunga. Ka sang Lalchunghnung chu Mt Carmel School, Gilgal Orphanage Home a um thei dingin chawmna a hmu thu an hung hril a. Ka sang chu lekha inchûk dingin ka Nu'n a hang thak a. Hieng po po hi ka Pute Muonthang in a mi lo ngaituo pek a ni a. Kan lâwm hle el.
Kum 2005 a hung inher suoka. Kei khawm mi thahnem ngai thenkhatin lekha kan chuk thei dan ding an mi ngaituo pui a. Lamka, Tuithaphaia chun ka um a. Kum a laklaw ta leiin school kai loin ka uma. A kum nâwka kai dingin kan insiem ta lem a.
Ka umna chu ka ring nekin harsa ka ti khawp el a. In lientak, room ruok tam tak a um zing laia room chite inhnawk rama hin an min riek tir a. Zingkar khawvar hma in ka tho a. Sin ka thaw tan a, zâna ka zâl hi ka awl hun chu a ni deu tak. Ka sawl thei hle. Kei bu du ve tak chu bu hlak ka khawp tawk ka fak ngai nawa. Rimsik a na zuol hle el. Zankhat chu hieng hin kan ngaituoa. Hi ina hin ka um zing chun school kai lang khawm lekha tiemna hun nei thei tak tak naw ningah. Chuleiin, tlan suok ka ta. Ka sang umna "Gilgal Orphan Home" ah va lut tawp ka tih tiin lungril ka siema. Ka thuomhnaw tlawmte ka paia. Muolvaiphei tieng chu ka pan tah a.
Gilgal Orphan Home a chun zantieng naupang bu fak khawp hi tuola an lo inhnel mar mar lai a lo ni a. Gate lo nghaktu Doneithang Joute chun iem i ngaituoa, tum i hmu nuom tiin a min dawna. Pu Robul ka hmu nuom tiin ka dawn a. Pu Robul chun a mi ko a. "Sema kha i ni?" a mi ti a. "Aw, in schoola hin ka um nuom ve a nih" tiin mitthli thla deu kuong chun ka dawn a. (A mi hriet na san chu ka Pute Muonthang le lo inpawl hlak, ruoltha an ni a. Chuelkhelah, hi homea um ve dinga ka Pute Muonthangin a lo hrilpui hlak, seat umnaw lei chaua lut ve thei lo ka ni leia mi hrie a nih) Pu Robul chun, "Tuhin chu iengkhawm ka hril chieng thei naw a. Sielmata i pute Muonthang hai ina lo fe la. Zâna ka hung ṭin pha i pute le chun kan ina hung leng inla" tiin a min thla a. Sielmat tieng pan chun ka fe hnap hnap a. Ka pute Muonthang hai in ka tlung chun an thim hmuoi tah a. Ka nute Buongi chun, "Bawia, i hmel chu a va hlim naw de, iem i chang a?" tiin a min dawna. Ka chanchin chu ka hrila. Bu ka la fak naw bawk leiin bu fak malam chun kan ti ti tah a. Chuong lai tak chun ka tlansuok san Lamka a ka puhai nupa chu an hung a. An mi hung hnawtzui hi a lo ni a. Mi thuoikir nawk chu an tum nasa hle el. Anni hlak sawrkar milien an ni a. Kohran le kawtlanga mi inzakai anni bawk. Ka pute hai chun an inza man in "hang fe nawk phawt rawh" tiin an mi tir a. Rintak pum chun ka puhai chu Lamka tieng chun ka zui nawk tah a.
Chu zân chun imu ka hmu meu naw a. Ramtin ka ngaituoa. Fahra ni bawk, pasietna nun rinum zie dam chu ka ngaituoa. Ka tadingin khawêng hun hi um dingin ka ring thei ta nawh. Zingkhuo a hung vâr a. Sûna chun kan venghai lekha inchuka um mi pakhat hi ka Pute Muonthang in a hung tir a. "Harsa i ti hle chun thadeuin hril sien la, hung nawk el raw seh" tiin thu a hung incha a. Kei khawm chun lekhapuon ka lâk a. Hieng hin thu a ziek tah a.
"Ka pi le ka pu, in mi lunginsietna zarin hi chen hi in insung rawngbawlin ka um tah a. Amiruokchu, tuhin chu hi ina rawngbawl ding hin ka tlin ta naw a nih. Mi hrethiem inla, ka lo suok el an tah. Mi hung ngaisak ta naw ro"
Hi thu hi pentui sen ngeiin ka ziek a. Bufakna dawkan chunga chun ka sie a. Kir nawk ta lo dingin ka maksan tah a.
Sielmata ka Pute Muonthang hai kuoma chun iemani chen ka um a. Pu Robul hai chuon huon an inchawk thara. Nitin sin tul tul thawin ka fe hlaka. Nikhat chu huona ka sinthaw chu an nupa in an mi hung thawpui a. Kumthar hun ding dam an mi hril puia. Ka pu chun, "Keini khawm pasalte umpui ding kan mamaw tho a. Kan ina um la, Cycle inchawng ei ta. Kumthara cycle in school fe hlak i ta. Vawi zantieng bu hung fa malam nghal la" an mi ti a. Kei chun dawn dan ding khawm ka hriet naw a. Zantieng chun sinthaw zoin kan silfaia. Pu Robul hai intieng chun bu fa dingin ka fe phei nghal a.
A tawi zawngin, bu fâk a ka fe chu ka um sawng pei el chu an tah. Ka room ding inhawi takel an mi lo siemfel pek diem a. Bu le sa hlak chu dittawka fak ding a um bawka. Kei bu du ta ding lem chu lungawi a um hlie hlie el. Ka mamaw iengkim, thuomhnaw khawm ni sien mi hak ang ka hung hâk pha ve tah a mihai hák neka ṭha a ni lem hman hman a ni el nawm a nih. Ka puhai nupa chun an mi enkawl thiem em em a. Inthlierhranna umloa fak le dawn, sil le bil iengkim ka mamaw pek ka ni a. Keikhawm insung sin, huon sinthaw ni sien khawm ieng thaw khawm ka rin ngai nawh.
Ka hringnun ka ka dawn kir changin, Riekmaw va angin hringkhuoa hin ka thla anvai hlak a. Nun chawlna zawngin run tin ka lo bel hlak a. Sienkhawm ka hmu nawh, chawlna riek rûn. Tuhin chu ka hmu tah, ka chawlna thingthiang ngei chu tiin nun hadam takin ka pi le pu thlazâr hnuoia chun ka chawl hadam tah a.
Ka pi le ka pu, ka hmangai cheu!
#Riekmaw Cabin
28th Nov 2022
Post a Comment
Post a Comment