Khawtlânga mithi an um chun sûng le kuo, laina le ruoltha, hmangaihai khuol rala um hai chen inhriettir anni hlaka. Chu thina thu hrietuhai, a ngai pawimawtuhai chun sin ṭul hai mâksan in mithi sûn dingin lusûn in an pan hlak a, mithi sûnin ruong an ṭa a, a thenin ṭaphla an inzawt zing bawka, hla sakin Pathien thua inthlamuongna hun hai hmang a ni tlangpui hlak.
Vawisûn hin ei Lalpa Krista chu rinum tinreng tuor zoin, misuolhai leiin Kraws ah hemde in a uma. "A kin tah!" tiin a thi thu khawvela puong dar a nih. Chu thina rapthlâk chu hretu taphawt hai chun Vawisun ang hin niser pawimaw Good Friday chu khawvel hmuntina inser a nih.
Hnuoi mihriemhai chu thuawina ei tlasam lei dâmin natna dang dangin in a mi bâwm a, ei lulul lei damin hripui in a mi tuom a, thina kut deiin mi tam tak a man hlak. Mihriem ngaia vangduoina tâwpkhâwk 'thina' ei tuok chun sûnpuitu tamtak an pungkhâwm hlak bawk. Sienkhawm ei Lalpa thi dân ruok hi Pa thuawina lei chauin a nih. 'Thi khawp raua thu zâwmin' ti ziek a ni kha! Chu chau chu a ni nawh, a thina kha tlanna sin thaw a nih. Thi naran el annawh. Chu tlanna chu misuol, eini hai ta ding a nih. 'A thlan thisen anga far kha!' Ei damna dingin a thi a nih. Hmangaina a khawm a va tawpkhawk ngei deh!
Awleh, Kalvari tlânga ei Lalpa thina chu inhriettirin ei um tah a, a thina Kalvari tlângin lung a a min len tawl am ie? Ei Lal Krista sûn dingin tu'm Kalvari tlang tieng pan? Mihrang fam tah Pastor Thangngur chun, Van Lal nau lungngaina chu a hmu fie hle el. Gethsemani huona inthawk ṭanin, thiempu Lal ina a chungthu an relna tieng a zui pei a. Chu lungngaina ram a fangna chu hieng hin a hung inzâwt suok hlawl el a nih.
Gethsemani huonah,
Ei Lal Isu a ṭawngṭai lai;
Mipui an hung inkhawm ei Lalpa chu manin,
A chungthu rêlin an ngaithiem nawh ie,
Thiempu lal insûngah a thina an rêl.
Lungngai sum a zing (2)
Ei Lalpa an hung bâwm Kalvari tlâng chungah;
Hlinglukhum le maw thing ṭawngsephur naw
Chu bêl ding a nei naw maw ei Lalpa chun.
Kalvari tlâng chu a hei thlir pei a. Isu an cheksawl dân; thisen kai hneng hnuonga hliempui a tuor dâm, vuok thiduk a tuor le ṭhangpuitu ding neiloa thla invai taka, "Mi maksan naw rawh Pa" tia a Pa a kona tlaphang khekrawl kha a hriet fie em em a nih. Krista tuorna natzie chu a en in, a lung a dam thei naw a. Ei suolhai intlanna dinga vân Lalnau thi ni chun leilung dân khawm hung danglam dingin a ti hiel el a nih.
"Nuom le simlei inhning rawse
A chunga tuorni khawm khi hung inthim rawse.
A siemtu van Lalnau thla a fam ni hin chu"
Khawvêl milien-milalhai thi ni chun sûnpuitu tam tak an pung khâwm hlaka, sienkhawm ei Lalpa chun âwitu ding an vai a, a thi dân lungnat umzie chu Pastor V. T Kappu'n hieng hin a lo inzawt ve a,
"Angûr an thi'n awitu an nei,
Vân Lal thi an awi nawh;
Thina'n nau ang an awi ei Lal lungsietumpa".
Krista thi dân lungnatum tak chu a hmu in. "Ka dang a char ie" tia Isu a khek râwl chu a ngai ngam naw ni ngei a tih. Kidron vadung kuoma chun hieng hin a ti hlawl a nih.
Kidron vadung, nangkhawm tho la aw,
I Lalpa dangchâr chu vân dâwn rawh;
Zuthûrin a dangchâr bo naw nih.,
Fe la a hmûr thienghlim hnuoia sawn,
Innem chiei chiein va luongpek rawh.
A ni ngei, Isu thina kha kum zabi tam tak a lo liem tah, mihrâng lo fe hmasahai (ei hlaphuoktu hai) Pastor Thangngur, Pastor V. T Kappu, Pastor Thanglêr, Upa Ngama, Pi Runchawng le a dang dang hai khawm Isu thi lai hmêl hmu phak an um nawh. Sienkhawm Vân Thangko in an hriettir a, ringna in Kalvari tlânga an lênga, ṭhangthar chena ngainuomum le sak inhawi hla thu an hung ziek suok ta a nih. A ropui ngawt el!
Vawisun hin vânlaizawlah suol hnena dâr an ri a, ei lungril thim kulpui chu thisen a thiek in, suol chu hne a ni tah. Chuong chun, suol isâwr hlum ei Lalpa thi ni hin Kalvari tlângin lung min len sien, Van Lal nau sûn dingin insiem ei ta. Mihrang fe hmasahai angin, Vân thangkoin a thina Kalvari tlâng min fang tir mawl raw seh!
Riekmaw Cabin
April 10, 2020
Rongtheang
Post a Comment
Post a Comment