KA ṬAWNGṬAINA NGHIL AM AN TA?

Mihriem duthusam, inhawi dinga ei ring le beisei chu inang vawng kher naw ni a. Amiruokchu, taksa khawsakna lungkham ding umlo, in le lo det le sungkuo bulnghet taka khawsak hi ei duthusam le beisei pakhat chu a ni ngei ring a um. Chu nun chu inhawi dingin ei suongtuo rawp hlak khawm ring a um bawk. Chuongang sungkuoa seilien le khawsa khawm chu hmu ding an um bawk a. Sienkhawm an khawsakna a chun an lung a awi chuong nawa. An hlim tak tak bîk chuong nawh. A neka inhawi lem nun zawngin an tlân kuol vel a. Nun inhawitirna ding zawngin an nun a buoi zing zing ve hlak tho chu a nih. Lal Hezekia in, "Pelêu amanih, vakâwl amanih angin kan hrâm kân hrâm a, Vaṭhu angin kân rûm kân rûm a, chungtieng thlirna in ka mit an vai zo tah." a ti ang el khan mihriem hai hi nun châwlna ding zawngin ei inrûm rawp hlak chu a ni hi. 

Khawpui kawtthlêra hai ei lenga, hmun mâwi le mit la tak tak ei hmu a. "Anhawi hmel de aw..."  tiin ei thlîr vawng vawng a. Chu taka chêng ve chu ei inhâwk a. Inhawi bîk rieu dingin ei ngai hlak. Chu hmun mawi le inhawi êm êm dinga ei ringa chun nikhat chu ei va lêng ve ta ngei a. Sienkhawm, a lo inhawi tak tak bîk chuong nawh. A hmuna chenghai khawmin inhawi ti hmel chu an put tak tak chuong naw a hawi. 

In ṭha le mâwi ei hmu chângin, "An in chu an hawi hmêl de aw"  tiin lungrila inhnar rûkna a hung pienga.  Kan in ni sien chu tiin ruolhai le ei khawsak dân ding chen ei suongtuo hlak. Sienkhawm a sûnga chenghai ta ding chun in inhawi, hlimna a lo tlingzo tak tak chuong kher nawh. In chu a puotienga inthawka ei zuk thlîr hin inhawi hmel takin inlang hlak sien khawm, a sûng chu a re deu ruoi a, ruokna tak neiin an lang hlak. 

Ruolhawn hlim le lawm hmêl taka lêng vêl a, tlâksamna hrim neilo hai anga nunkhuo phâm hai khawmin nun hi an hmang inhawi tak tak bîk chuong vawng nawh. Thlîrtuhai chun, "Inhawi an va ti mei mei de aw" an ti el rawi mawh. Sienkhawm, hun sawtnawte sûnga ding chau a nih. Ruolhawna hlimlaini hai chu a hung liema. Mal taka nun hmang hun a hung um huna chun beidawngin an indawmkûn ve hlak tho hi a lo nih. Mihriem hi inhnar bîk taluo ding hi ei lo um naw tawp el. Lungkham hrim neilo anga lêngvêl hai khawm hi pindan sûngrila chun mithli hruk an bâng bîk chuong nawh. In ropui le nal tak sûnga khawm mitthli tlâk in bâng zai a rel chuong naw a. Motor man to le mawi hai hin nun ruokna a hnawbit thei tak tak chuong naw chu a ni hih. 

Nunghâk le tlangvâl inngai hmel taka lêng hlak hai khawm hi thlîrtuhai ta ding chun inhawi ti hmel an put a. Khawvel khawm an suk mawi deuin an lang hlak. Sienkhawm, hlim hmel puta inhawi ti taka leng vêl ei sawn hai khawm hin inhawi chu an lo ti zing bîk vawng naw chu a ang. 

Ka ruolpa chun a ti annawm, Meghalaya boruok inhawi takel, sûm in a bâwm vel chuoi kara ni zung in tlâng dung a hung khaw êng deui ruoi a. Royal Enfield ei sir hringa, a ram leilung mawina thlîr zing pumin ruom khawk rui ruiin Laitlum Canyon panin duotlai Sieli le ei hang inphur liem a. Savun pheikhawk (boot) le tarmit dum paw kangin, nunghak sam inphu hlap hlap in lampuia ei zuk inrûm dur dur chu mi enzui ei hlaw a, mi hmutuhai chun, "Inhawi an va ti hmel de'h! " mi ti zui ngei an tih. Amiruokchu, a zing nawk inṭhe el ding, "zingkhuo la vâr naw hrâm la"  ti a Joshua Buhril anga khawvar ding huphur êm êm ei ni ti kha an mi hriet zui ta nawa. Khawsawt le nun beidawng taka ei inrûmna lem chu an mi hriet teu teu ta nawh. "Inhawi an ti de aw" an mi ti khan nun hi a tawp el chuong si nawa a ti annawm. Indik hle dingin ka ring. 

Social media khawvela chêng ei ni ta leiin ei khawvêl khawm hi a chîn tah a. Hmun hlatak taka mihai chanchin le khawsak dân khawm awlsam takin ei hriet pei tah. Hmun mawi le inhawi ni dinga ei ringhai khawm awlsamtaka zawng suok thei vawngin a um ta bawk. Chuongang hmun inhawi le hming inthang, ram mawi tak taka va zuon hai lim ei lo hmu hin "Anhawi hmel de aw" tiin fe chák ve in chilthli ei lo lem khuot khuot châng um hlak a tih. Amiruokchu, thil pakhat ei ngaituo ve mei mei ding chu, social media khawvela hin mihaiin an nun hlimna le lawmna, inhawi ti taka nun an hmangna bâk hi an pholang ngai kher nawa. Mi hriet loa an rinum tuorna, zan imu intuo loa an lungngaina hai lem chu hmu ding a um ngai nawh. 

Chuleiin, social media khawvela mihai nun i hmu, 'anhawi hmel' i ti kha inhnarin hun hmang naw la. I nun khawm kha mi tam tak inhnarin i hmang thei anih. Nun hlim ding hin in ropui le hmun mawi am a nih, hmun changkang tak tak a ṭul kher chuong nawh. Nunram khaikhinna hi tawpsan la. Ei phâk tawk ang peia nun inhawi taka leng thei a lo nih. 

Kei khawm hi mihriem suongtuona rama hin ka leng rawp hlaka. Colarado lai vel khun khawsa lang. Zantieng ni kâwla liem ding thlîr malamin ruolhai le Harley Davidson khalin   hei inrûm dur dur hlak inla chu lung lawm kim hle dingin ka ring hlak.

Lungril rik tak phura kan rûm lai chun, hmun thawveng le fienriel tu mi chimbuoi phaknawna a um chu inhawi dingin ka ring nawk a. Ka suongtuona rama chun Mont Blanc phaizawla lengin, leilung mawina hai thlîrin, suongtuona ram inpawlpui chu nun inhawi le hadam dingin ka ring rawp hlak. Chu chau chu an nawh, zan thla a hung eng ruoia. Lunglênna in a mi chenchil huna chun lunglênna thu inzawtpui ding ruol ka ngaia. Tlangrâm ah, châwrsawng indaw vêk vâwka ruolhai le zan thla inawia hlasak hai dam hi inhawi hle dingin ka ring.  Sienkhawm, "khawvela lâwmna a kim thei si nawh" ti nun hi hre chieng ve thawkhat in kan ngai tah a. Tuhin chu chuong thilhai khawm chu ka thlakhla chuong bîk ta nawh. Phun le sie ka nina hmun peia hin lungawitaka nun siemrem hi ka'n chuk ve ta a nih. 

Tlângrama chenghaiin phairam in le lo det neia, motorhai le insukhupa nitin office kai chu inhawi dingin ei ringa. Ei inhnar hlak. Phairam papui thenkhat chun tlangram nun hai kha inhawi an ti in an khawsawt thu an inzawt rawp hlak. Ei chêng ve nawna muol hi ei hmu inhawi bik a, ei inhnartuo vel mei mei hi a lo nih. 

A ni ngei, mihriem hin nun inhawitirna le hadamna zawngin ei invâk vêl a. Ei nun nekin mi hai nun chu hlim le inhawi lem dingin ei ringa. Ei phâk lo le ei chêng ve nawna khawvel letliem tieng chu hadam le inhawi lem dingin ei suongtuo rawp hlak. Chu ram chu lungkhamin ei insukbuoia. James Hilton Shangri-La ah khawvel rem ei tum a. An hril El-Dorado rama nunkhuo phám din duthu ei sâm a. Sienkhawm, ei chengna hnuoiram hi 'Pa' ṭawngsephur ram a lo ni lem si. Chuleiin, "Ka Pa Khuma" angin ei phak tawk peia hin lungawi inchûk ei tiu maw... 

Riekmaw Cabin

26th July, 2022