Rev & Mrs Richard Wurmbrand hai nupa hi Romania rama chanchinṭha hrilin thlarau bohmang hai Lal Isu kuoma thuoina sin nasatakin an thaw a. Sienkhawm an rawngbawlna dâltu dingin Communist sawrkâr chu a hung lien tuol tuol a. Kristien hai chu nasataka hnawchêp in an uma, sukrinumna nasatak an tuor hlak. Rev & Mrs Richard Wurmbrand hai khawm intangna ina khumin an um a, chanchinṭha an hril lei chun nasataka suk rinumin an um hlak.
Ṭumkhat chu Communist sawrkar chun Romania rama Kohran hai chu inchalrempuia thiem taka hmangruoa hmang a tum a. Sawrkar chun Kohran ṭhuoitu hai chu ko khawmin, 'Congress of Christians Churches' pâwl an indin a. An president dingin Russia rama Communist ṭhuoitu hlun Joseph Stalin an ruot bawk. Chu inkhawmpuia chun puithiem le Pastor 4000 chuong an pung khwm ve a. Puithiem le Pastor tam takin kristienna le communist sawrkar chu thil inmil a ni zie le a tu tu khawm indîp loa fe thei a ni zie an hril a, communist sawrkar ṭhatzie uortakin an hril bawk.
Chuonga an pungkhâwm lai chun Pi Sabina Wurmbrand chun a pasal kuoma, "Ngir suok la, Krista hmaia hieng mi tamtakin chil an sâk le inzakum taka Krista an siem hi hang hrufai pêk raw khai" a ti a. Rev Richard Wurmbrand chun, "Chuonga ka thaw chun i pasal hi i chân nghâl el ding an sawn naw" tiin a dawn a. Pi Sabina chun, "Mi dawizep pasala neitu ni nêk chun pasal huoisen neia kumkhuoa hmeithai ni ka thlang lem" tiin a pasal chu a dawn ṭhuoi el ta a. Chuphing leh, Rev Richard Wumbrand chu a ngir suok a, "Krista le Pathien kuoma ei ringumna pe hmasa phawt ei tiu" tiin chanchinṭha chu a puong ta a. Hi ṭuma an rorelna a an thuhril hi puotieng hmun tin anthawk mitinin an lo ngaithlak theina dingin ṭawng inringna a lâk suok vawng a ni a. A ram pum puiin Rev Richard thuhril chu an lo ngai ta a nih.
Krista a ṭan ngamna leiin nasataka sawisak a ni a. Chanchinṭha chu hril nawk ta ngai lo dinga vau a ni a. Sienkhawm a tâwp san chuong naw a. A hringna in a tuorhla ding ni sien khawm chanchinṭha hril a ma nawh. Tuorna hmuna khawm Krista thu huoi taka a hril pei leiin vawisun chen hin khawvelin a hming a lam rawp hlak a nih. A ropui ngawt el!
Post a Comment
Post a Comment