KA ṬAWNGṬAINA NGHIL AM AN TA?

Kea lâwn mihai le in tlân a, an suksâwl hle che chun, sakawrhai le chun iengtinam inel thei i ta? Muongna rama hman i tlu chun, Jordan ramngawa chun iengtinam thâwng i ta?" Jeremia 12:5

Mîmtukthla ni 25, 2021 khan khawvel hmun tinah ei Sandamtu piengchampha 'Krismas' ei lâwm a. Ei ram tieng lem chu lâwmna khuong le dâr kiltina a'nthang khâwk vêl a. Ei khawtuola ngei hârmei inkhûk meuin, lungmuong le zalên takin hun hlimum tak ei hmang a ni kha! Eini ang bawkin Pu Chunglenlal Singsit khawm a rawngbawlna hlak Kathua District, Jammu & Kashmir ah, a lallukhawm  sukmawitu ding hai le hlimtakin hi hunpui hi an lo hmang ve a. Hun hlimum tak hmang zoa an kîr tieng chun chanchin lungsietthlâk tak el an tuok ta hlau el. A pawi am lawmum ka ti lem ding? Tu chena ka buktawn thiemlo a la ni zing. 

Hindu kulmût haiin Pu Chunglenlal Singsit le a rawihai kir tieng chu lo dangin, 'Jai Shri Ram!' ti a khêksuok dingin an lo inṭhiṭhai a. Nisienlakhawm, "Iengkhawmin i dawn naw maw? Hienghaiin an hêkna che hi ieng tizie am a na?" ti a Thiempu laltakin Isu an dawn khan, 'Isu ruok chu a to zinga a' (Mathai 26:62) ti ang el khan ringnawmihai pathien ropuina dingin a bau a phawng nuom hlek nawh. A va ropui ngei deh! Isu hming mawi chu a hming leia tuor ngamtuhai zarin inthang zuol pei raw se. Amen!

India rama hin ringlo mihai suknawmnatna tuortuhai chanchin tamtak ei hriet ta hlak a. Amiruokchu Pu Chunglenlal Singsit, T. Gamnom Village Saikul, Kangpokpi District a um hlak, Friends Missionary Prayer Band (FMPB) hai rawngbawlnaa ṭhang ve, ei suopui unau ngeiin khâng ang thil a tuok ei hang hmu meu chu lung hi a na vawng vawnga. Lungsietna mitthli a tla naw thei nawh. Lainat a va um ngei deh! Nisienlakhawm, lawmna ka nei tlat el...

Khânga an vaua, a chunga kutthlak nuomtuhaiin an ngîr ngha ṭhup khawm khan, 'Jai Shri Ram' zuk ti zaua tuorna pumpel theina ding lampui a zawng chuong nawh. A video ei hang en a, zâm hmel chu a put annawm. Khuo le veng le mani chipui hai hmu phâk lona ram hlataka um a, santu ding ko phâk nawna rama um chun tu am ṭi lo ding? Amiruokchu maw, "I ta dingin zâm hmel put lang khawm. Dotu ta dinga Lallukhum i tiem kha mi hung hril nawn nâwk rawh!" ti a mi tamtak hai hmaa ṭanna ṭha ṭan a, thu lo tiem tah a ni leiin huoisen takin a hmasuon ngam chau a nih. Thlamuongtu Pathien chun a hminga tuor ngamtuhai tuorna a ensan ngai nawh. 'Goshen innghil theinaw tu chen hin...!'

Hi thil tlung hin ka lungril a lâk bek bek a. Ka ngaituona an vâk vêl a. Ei chengna 'Hmara Desh Bharat' hlak chu a sûnga roreltuhai le anni thlawptu ṭhangruol pâwl haiin 'Hindustan' ti hming pêk dingin ro an phierrûk zing bawk. Sakhuo zalênna'n hmun a chang zo ta naw a. Sâkhuo tlawm lem hai chîmral le hnawchêp dingin kut an infûn ru a. An inchophâw5k zing ta bawk. Sawrkar thahratna hmangin an ril rem zawngin dân an siem a. Mi hrêkbet tuma inpei sa diem anni tah. Chuonglaizing chun eini hlak chu an pâwl uichal ni tumin an hnuoia dawvân ei kaia, an bawia ei intuklut a, an ringkawl ei bât ve pei ta bawk. Rorelna hmawl ei chel theina ding le, hlâwkna ei intêl theina ding a ni phawt chun ei thuring chel khawm ei inthla phal ni sien a hawi. Ei va depde ngei deh! Suol doa thisen suok le chu an hlat ta ngawt el. Hlimtaka a piengchampha ei ilawm hlak Lal hin iengtinam mi ngai a ta? "Et tu, Brute!" (Nang chen khawmin maw, Brutus!) tiin um ve pal ei tih ti inlau a um ngawt el.

Hieng ang khawvel, sakhuo zalênna in hmun a chang zo ta nawna rama hin iengtinam thaw tang ei ta? India Hmarsaka cheng Krista ringtuhai khawm hin iengtik ni am a ni chu Krista ei ringna leia tuorna tuok thei zing ei ni tah. Hieng suknawnatna hai ei tuok hma khawm hin mi tamtak chu ei tlu zing tah a.Tho nâwk tuma ṭhang la a, anni hai le inel nekin ei zui ta lem a, a tlâwm lema ei ṭhang mêk ta niin an lang. Ringnaa mi hmasahai le, chanchin tamtak ei lo hriet tahaiin, Krista hming leia an lo tuornahai ngaituo chun eini chu tu hri a ding chun muongna rama la um ei nih. Amiruokchu, hi muongna rama hman ṭhang khaw hman loa ei tlu zing el chun, Jordan ramngawa chun iengtinam suol râl ngam thei ei ta? Iengtinam thaw tâng ei ta? Aw Kristien...! 'Ei ibuonhai hi taksa le thisen an ni si naw a; inlalnahai le thuneinahai le, hi inthim chunga khawvêl rorêltuhai le, vân hmunhaia thlarau suol umhai chu an ni lem.' (Ephesi 6:12, BSI Golden Jubillee Edition)

Riekmaw Cabin

30th Dec, 2021