Krismas urlâwk zân a lo ni ta zing el. Hospital insâwnga chun ka khât chauin ka nu damnaw chu ka nghâka. Thalai ruol chun, 'Zânril laia berampu' tiin kawthlera chun hlapâwl an hung rem dup dup a. Ka ṭhungna chu kei hêmin tukvera inthawk chun ka zuk thlîr a. Kan thuok deu sap a. Ka nu khumbeta zal zing chu ka hei en nâwka. A damdawi khai chu damte'n a far kak kak a. Ṭhalai ruol chun, 'chu zân phalbi, vur dei lai tak hnuoia' tiin hlapawl mâwitak an hung rem nâwka. An râwl thangkawk ri chu kawi an liem hnung chen khawm chun na ah a la thang liet liet a. Ka nu chu a hung meng ier iera, "Bawia, kum nawk chu Pathien zarin dam ei ta, hlimtakin anni hai lai ei ṭhang ve ding annawm" ti malam chun ka kut a hung chela. A bienga mitthli a hung luonga. Ka nu hmel chu ka en ngam ta nawh. Ka tho a, tukver bieng innghai malam chun khawpui var tlêp tuor chu ka thlir vawng vawng tah a..., tiin a chanchin lungsietthlak tak chu a mi hril a.
A hung tang suok a, a râwl chul deu riei in, 'Ruola,' tiin a ka mal chu a hung ben deu that a. Kei chun chiengtakin ka lo en a, a mit a meng khup dâk a. A nu ṭhang ve ta nawna hringnun khawvêl harsa a ti zie chu a hril zawm nâwk nghâl a. "Tu hin chu kum thum lai a liem tah a. Ka hmangai, ka nu le Krismas kan hmang kawp tâwp dân kha ka lung a awi thei naw nih. Tu hin ama hlak a um ta si nawh. Khawvela hin mal ngâwi ngâwiin kan hriet hlak a nih!" a hung ti thâm sat a. Kei khawm chun zuk hnem dân ding rak khawm ka hriet bîk chuong naw a. Pu Rokunga hla hi hieng hin ka hril ta ringawt a.
Awmlai vei leh lusun fate chan tawk hi dawn ve teh,
Hnutiang mualliam hnu ngaiin an tap e;
Par ang an lawm hnu he ni ropui lo thlen hian,
Chhungkim dar ang len lai kha ngai zualin,
Tapin luaithlipui an nul ngei ang.
A châng tâwpna tak, tlar hnina a chun, 'A ṬHEN THINLAI NA PAWH DAM RAW SE' ti a ni kha. Kei khawm hi lai thu hin tukum chu a mi pâwl a, kan hnêmna tak khawm a nih ti malam chun lengkhâwm hall ah kan inzui lût tah a...
Awleh! Krismas le Kumthar lâwm ivuokvêt lai hin chu lungrila in ta hnung thilhai a hung tho a. Hmangai fe tahai le hlim lai hun hai a hung inlang uor uor hlak. Hi hunpui hi hlimtaka hmang tumin hmun hla le hnaia mihai ei infuon khâwm hlaka. Sienkhawm, ei kim thei chuong ta nawh. Kimtlâng taka Lal piengchampha hmang hi ei nuom le duthusam ni hlak sien khawm, ṭhena ram khawvela hin chu lawmna a kim tak tak thei chuong nawh.
A ni ngei, sungkuo kima Krismas hmang ei nuoma, sûngkima hmang thei chu a ropui a, lâwm khawm a um hle. Amiruokchu, chu neka ei ngai pawimaw lem ding chu sungkuo kima vanram kai hi ni mawl sien nuom a um. Chu hmuna chun a nih, "Inṭhe um naw naw nih, inṭhe um ta naw nih!"
Riekmaw Cabin
24th Dec 2021
Țha thei de aw.
ReplyDelete