KA ṬAWNGṬAINA NGHIL AM AN TA?

Tlangvâl, kum sawmthum ei hang chuong meu chu lênglai khawvêl huntâwp hnaia lêng eini tah ti chu inhriettirin ei um nghâl a. Nu le pa haiin an hriselnaw thu an hril ṭan a, insûng châng vela thangpuitu ding an mamaw thu an min zawt khum rawp ta hlak. Umpui ding zawng el ei tih ti inla hlak chu an nuom naw phiengsen el hmel si. Dit nei anni ti chu inhmai ruol a ni ta nawh. 'Mo' dit an ni tah. An damlaini a thlâk hma ngeia tu mawngben chu an lungawitheina um sun ni ta sien a hawi. Pi le puhai khawmin "Bawia, ka thi hma ngeiin aw..." tiin an mi hril nawn sek bawk hlak.

Khawlai ei suoka, puipung ni le sûngkuo inhmukhawm huna khawm kawppui ei mamaw tâk thu bawk chu an mi lo hril khum nâwk a. Khawtlânga mi ngaina dertu hai le ami ngamthlâk deu hai khawm an bâng bîk chuong nawh. Sûngkuo inkhawm zâta ṭawngṭaina subject pakhata ei hmang khawm dittawk a um tâk tho vei leh, insuk bengvâr fahrana ei mamaw 'Nuhmei' nei dinga mi nawrtu an um nâwk rawp hlak. An mi hril naw khawma ei inhriet ve tho vei leh.

A mak hi ka ti hlak annawm. Nunghâk le tlangvâl lêng sâwt deu ta hai chu khawtlâng mita chun kawppui ding hmu zo lo angin ei ngai a. An hnu siet hmaa nuhmei-pasal nei dingin ei inmâwr rawp hlak. "I ruolhaiin kawppui an nei san zo ta che a ni hi. Nang khawm nei ve ta rawh!" tia inturna hi ei khawtlânga hin a la hluor hle el. Ei bânsan ding pawimaw tak chu niin an lang. Mi chunga turna (pressure) ei pek rak hlaka. A tuortu ta ding chena nghawng ṭhalo tak an tlun thei a nih ti hi ei ngaituo sa nuom a um hlak.

Nunghâk le tlangvâl, piengken kim le mihriem lungril pangngai put taphawt hai chun kawppui neia, kristien sungkuo indin chu an beiseina a ni ve ngei ring a um. An hrildawk naw khawmin an lungrila bek chu ngaituo hlak ngei an tih. Amiruokchu, mi thenkhat hi chu lungril hliempui tuora um dâm, mi ringumnaw an tuok fûk pal leia lungril nataka phatsan khawm um ngei an tih. An chantâwk kawppui ding chu an hmu taluo, sienkhawm vawikhat lungril kawidar tah an ni a. Hmatieng kalpên ngamloa ṭitna in a tuom vel khawm an lo ni el thei a nih. An nuna ieng ang harsatna am an lo tuok ti kha ei va hriet vawng ta nawh. Mi lungsietum tak khawm an lo ni el thei a ni aw. 

Hieng ang inmawrna ṭawngbau hi kei ngei khawma ka tuok rawp ta le ka la tuok pei ding chu a hawi hi. Haha! Ditsakna ṭawngbau am ti-elna ti chu thlier thiem intak ka ti châng a um hlak bawk. A mi titu izir khawm chu ni tang a tih. Nie, an mi ngama, an mi nêla khawm chu ni ngei a tih. Amiruokchu, hieng anga mi ti hlak tu tamtak hi chu ka en a. An nupa hringnun hi kei mi famkimlo hin sawiselna ding hi ka hmu rawn ve thei khawp el. Nuhmei nei dinga an mi ti ngun deu chang chu lungril ṭhanaw a hung suok a. "Nang khawm i nuhmei hi a tha nawh, a fel nawh. Hi neka fel, pasal inza thiem, hmûr tamlo, Kristaa hringna ṭhatak nei nuhmei dang i mamaw a ni hih!" ti ve phawng nuom châng a tam hlak. An nuhmei nei hi mi sukna'n an hmanga. An tlangvâl lai hun an hril châng hlak chu khawkhat tlangvâla chethei tak, dit dit thlang thei hiel angin an inhril tâwl nawk ang lawi si. An nuhmei hai hlak chu...!!!

Upa haiin, "Nuhmei le sî chu ei en chet chet ngai nawh" an ti hlak annawm. "Nangni'n sawiselbo in zawng hlaka nih. Uluk taluo naw ro", tia hmakhuo ngaitaka min fuitu khawm an bo nawh. A ni ngei, famkimlo na rama cheng mihriem  famkimlo haiin 'ṭhafamkim' chu ei beisei ngam bîk chuong naw a. Ei kebai chanpui ei zawng ve lem chau a nih. Amiruokchu, damsûnga kawppui ding chun fîmkhur taka en chu a ṭul ve tho annawm. Pal dai anga nuom hun huna thleng thei hlak a ni ta hmel si nawh. Mi anga piengthiem le hlawtling ni naw inla khawm, lungrila ditzawng le lung kuoi zawng deu ei nei ve ṭît ṭêt a. Chuongang mi, ei lungdum zâwng hai chu va ngaizâwng a nei ngei ei nuom ve hlak. Sienkhawm, beisei angin vâng a fe tluong vawng ngai nawh ti chu a hretu seng ei nih. Chuleiin, riekmaw va iengin hmartlangpuia hin hringthla a la'n vai hri a ni hi. 

Ie..., ka hril nuom tak chu; lêng sâwt hi dit uluk lei khawm a ni chuong nawh, ei dithaiin an lo dit uluk lem pei hlak hi a nih! Ama L. Keivom iengin, Sawngkhar zawlaidi le Lienchi sakhmel ka chawi zo ve naw lei khawm chu ni tang a tih. Sienkhawm, hieng hin la'n hnem phawt el ei ti maw...?

Lêngṭul in lêng lang khawm,

Ka lung a sen chuong nawh.

Kum 40 vâla la tawng de ning,

Chu pha chun nunu-papa makhe chawichawka.

Riekmaw Cabin

26th Nov 2021