KA ṬAWNGṬAINA NGHIL AM AN TA?

I am nothing special, of this I am sure. I am a common man with common thoughts and I've led a common life. There are no monuments dedicated to me and my name will soon be forgotten...

~Nicholas Sparks (The Notebook)

Hringna nei taphawt hin inko dân bîk an nei senga. Chu inko dan chu 'hming' ei ti hi a nih. Thil tinrêng hieng - ramsa dâm, thing le ruo, thlai hai, pârte hai le add (a dang dang) haikhawmin hming dang dang an nei ve hlak. Mihriem hai khawm hin hming ei nei senga. Mi pakhat ta dingin hming pakhat sak a ni hlak a. Mi pakhat nêka tam hming inang khawm ei um nuol bawk. Chu khawvêl fe dân zûl zui chun kei khawm ka pû, (ka pû pa) in ka hming dingin 'Lalrosem Faihriem' tiin a lo sak a. Thisena inhnaipui suong le kuo hai chun 'Bawia' tiin an mi ko ve bawk hlak. Khawvel nun a hung inṭhang pei a, thing del lo lung idel lo ta châwk chu ka hung inṭhanglien ve pei a.Dit dân le nuom dan ka hung nei ve a.  Ka hming phuoktu chu inza hle lang khawm ka dit dân ang takin ka hming chu, 'Sema Faihriem' tiin ka ziek lem ta a nih. Ka hming, 'Sema Faihriem' ti hi nal tina tak ka neia, a tawi fel in a mawi huntawk khawm ka ti a. Mihaiin an mi ko hlak dân khawm ni ngei sien ka nuom tak chu a nih. Amiruokchu, la zuk ti hram ka ti ie... Khawvela hin siemtu in mi pakhat ka lunginruolpui ding a mi lo ruot pêk ngai a ni chun; ama nu chun 'U Sem...' tiin mi ko ngei sien la ka nuom, lâwm khawm lâwm hleng ka tih! Salam chawina a um chuong naw thoa duthu ka zuk sam vak a ni chu! Haha

Eh! To rawh. Ka hming saktu ka pu hi kei chun iengang hmel put am a ni ti ka hriet hman naw a. A chanchin ka hriet tam naw hle. Ka nu le pa a'nthawka ka hriet thei chu; tapphel kâwma a zal chu a thla a, kum 101 mi a niin a thi a ni an tih. 

Khawvel mihriem, pawisa nei leia pawisak bek bek nei ta lo, mi a pasiet leia hmelsie, chêngna hmun ṭhat leia hmelṭha le nunṭha anga ei inlang hlak na khawvêla hin mitin in ei nei seng chu 'hming' hi a nih. Hming nei loa khawvel hmang chu ei um kher ring a um nawh. Ei thi chena ei put sawng ding chu ei hming ngei hi a nih. 

Hming chawia mihring lêng vêl hai hin ei damsûng khawvela hin hming phurzo tak tak khawm an um a. Mi hmingṭha le thilthawthei tak tak dam, khawvel hrieta bo ni um ta lo ding mi ropui tam takin an hming an lo ser ta bawk. An thi hnung chen khawmin an hming lam a la ni rawp hlak. Chuong mihai ang chun mi tamtakin khawvel intlansieknaa hming ser tumin theitawp an suo a. Hlawtlingna tlangsipa an hming chu tarlang a ni a. Khawvelin a theinghil ngai ta naw a, hrietzing anni ta hlak.

Hming ropuina hi mitinin ei dit le ei inhnar, mi tlawmte chauin an ichang hlak chu a nih. Sienkhawm, mi ṭhenkhat chun an lo ngai ropui he-hu naw hle el. Kum zabi 17 hun laia romantic poets hmingthang John Keats chu kum 25 a niin TB natna in a thi a. A ma dit dan ang takin a  thlân lunga chun a hming khawm ziek loin hieng ang hin ziek a nih. 'Here lies one whose name was writ in water'. (Hi taka hin mi pakhat a hming tuia inziek chu a zâl). Tuia hming ziek ti chu mi challang lo taluo, mi hlun lo le umzie neilo taluo hrilna a ni a. Khawvel hrieta hming inthang ni sien khawm Keats chun a  hming chu uongpui tham ah a ruot naw ni ngei a tih. Literature huonga hming dei ta ngai lo ding, thuthiem hmingthang le pa ropui ni sien khawm Keats a nun tlâwmna hi ngainatum tak chu a nih. 

Eini India hmârsak a chêng tribal hai ruok chu ei damlai hmurthiemin ei ropuina hai ei inhril vûng raka. Ei thilṭha thaw hai mi hrepuitu ding le ei tienga ṭhang ding mi ei zawng vêl a. Ei phâk le phû bâk chawimawina zawngin ei tlân vêl a. Khawtlâng le kohrana chanvo ṭha ei chel hai lem chu ami tlâng insampuitu ding ei zawng ruoi hlak. Ei khawvêl tâwpni a hung tlunga, thina kutdeiin a mi hung man meu chun ei hming chu kutdaw khawma a inei ve 'hming' naran ve el a hung ni tah. Sienkhawm ei ihnawt mi challang le mi hriet hlaw ni ei nuomna kha ei insung a'nthawk a la bo chuong naw a. Ei tlânlunga chun ei damlaia chanṭha ei chang hai le ei nina po po deu thaw lungmawia ei ziek thlar duot hlak. Mi hmingṭha le ropui tak anga inlang si khan ṭhangthar hai ta dinga hrietzing thlâk thil ṭha ei hnutsie chu hril ding a um ngai meu nawh. 

Hi khawvêla ei damsung tawite anga inlang; mi rimsihai ta dinga damsûng ni sei tak ni bawk si a hin ei phâk tawk china hming inthangna hnawtin ei tlân vêl hlak a. Chu intlansiekna nun chu khawvêl um sung tâwp ni um naw nih. Ieng anga hming inthang le ropui khawm ni inla, thina thlân hmun, a khang feet 2 le a dung feet 6 hmuna zal ding seng ei nih. Khawvêla hin hming serin ropuitak angin lêng hlak inla khawm, vân in ei hming a hriet si naw chun iengam a sâwt chuonga? Krista ṭhanglo chun chuong damlai ropuina thil hai chu teplo el an ni si a.

Kei, Sema Faihriem khâwm hi khawvela hin saruokin ka ka hung pieng ve a. Ka nun a hin chanchin ngainuom umlo thup ding tam tak an zep ṭeu a. Chuonghai chu tlâng in an hriet ve nawh. Ka hringnun muol khing chu vûr anga var inno in mi'n an mi hmu hlak a, a letliem dûm chirhak le suol in hmun a khuor hlak na ram chu an hmu phâk ta nawh. Sienkhawm, hi nun hi ka thup sawng theilo, iengkim hretu kuoma ka la puong ding chu a nih. Chuleiin, thina in ka mit a sîn pha chun, ka hming hnaisai lo hi hrietzing thlak ni ta naw ni a. Khawvel ram zau taka hin ruong zâlna hmun ding ka lo chang ve phâk a ni chun, ka thlânlunga chun hieng ang hin ziek ni sien...

"Krista lunginsietna zâra, misuol ngaidamna changtu sakruong chu hi hmuna hin inzâl a nih!" .

Riekmaw Cabin

6th August 2021