Whatsapp ka zuk hawnga, group ṭhenkhata chun chat a hung lût zur zura. Ka zuk bi chieng chun tleirâwl hawn video pakhat hi an lo chai nak nak a. Iengkhawm hril loin ka suok san a. Facebook tieng ka zuk insawn phei a, group iemani zâta chun Whatsapp groupa an chai video bawk kha an lo so pui nâwk a. Comment tamtak a lo um tah. Comment hai chu a hmatiem in ka zuk tiem suk pei a. Commenttu a tamlem chun fiemthuin an thlâk a, ṭhenkhaṭ chun, "mi um ṭha peilo ruol, hrem an phu" ti ni âwm taka an comment hmu ding a um nuol bawk. Kristien ṭhalai ruol inkhawm taima, mifel umkhâwm hawn comment ding chun lunginsietna thu an comment hmu ding a um meu nawh. Ka zuk en suk pei chun, Pastor pakhat hin, lampui indik hrila, nundân tha inchuktir an mamaw thu a comment chu ka hmu ta nawl a. Chu comment ka hmu chun kei khawm ka ngaituona a suk sei a, ka lungrila a um ta zing el.
Tleirawl hawn dâwntawi ruolin, 'F**k the Police' ti puma matawr a an tlân lai video viral chu social media khawvela chun a hung indar lien pei a. Manipur state puotienga Instagram troll/meme page a hai chun hmun a hung hluo phak ve tah. Chu video chu to bopui el ka tum khawma ka lungril a um zinga. Kei ṭhibe pha ve lo, inkhawmpui huna dâwsang chunga kawrchung le inṭhung muk nêka dâr muk tala ṭhungna put hlaktu in ngaidân fahra te zuk thairâng ve chu inthlahrung um ka ti a. Sienkhawm, hi video chungchang le inzawm hin thu tlawmte bek hril chu ṭûl a ka hriet leiin vaihnungin ka hung thaw ve hrâm a nih.
Kum 1980 chawhnu tieng le 1990 bâwr lai vel khan America rama California khawpui pakhat, Compton an ti a chun N.W.A gang (Niggas With Atitude) inti hai chun hip-hop khawvel an hung chuong kai ṭan a. An member inlar zuol tu chena hip hop khawvel hluo lumtu hai chu: Eazy-E. Ice Cube, Dr. Dre hai hi an nih. Chuong hai bul inṭan dan vel chu kum 2015 khan 'Straight Outta Compton' ti film an siem a. An hla hril hlaw êm em pakhat chu 'F**k the Police' ti hi a nih. Hi hla thu hin thlang ram (western) ṭhalai lai chau niloin eini India hmarsak rama cheng ṭhalai iemanizat hai khawm a mi chîm ve tah ni ngei a tih. Hi tleirâwl hawn hai khawm hin hi hla anthawka pawlna inthieng nêka pawlna inthienglo chang anni ve ngei ring a um.
Mihriem vawikhat tleirâwl hun hi tuta puitling tahai hin ei lo pal ve seng chu ring a um. Ei vawikhat tleirawl lai khan chu ngaituona a la tâwi a, mâwlna invetthlak takin ei nun a ṭhuoia. Khawksak le pawisak bek bek ei nei naw a ni deu tak. Tuta tleirawl hawn ei hril hai khawm hi hieng ang hun hung pal ve mêk chu an nih. An hmel enin kum naupang te te anni ti chu hriettheiin an um. Khawtlâng nunphung sukbuoi tum reng renga khawsa le, police hai le inhmelmakna nei leia hieng anga khek suok anni chu ring a um nawh. Chu nêk hmanin, ruolhawn umkhawm inchophâwk le, insukphûra nun zalênna hmangsuol mek anni lem chau niin an lang. An pilhmangna hi inthûk taluo a ni ring a um nawh. 'Misuol hawn', 'mi khawhlo ruol' tia râl thlîr el nekin; an chunga lunginsietna le lainatna ei suklang a ṭul takzet a nih. Mau Maus gang hai hotupa Nicky Cruz khawm lunginsietnaa hnawtzuitu hmaa khan chu a ngêng sâwt thei bik naw kha. Pathien anthawka suok hmangaina hi mi lungril sûng hnetu ropuitak a ni a. La ni pei bawk a tih!
Covid 19 hripui leiin ei rama inchûkna in hai chu khâr a ni meka. Naupang inchûklai hai chun lêkha nêka thil dang ngaituona ding hun âwl an hung hau ta hle el. A têlpuia inchûktirna ṭha dawngna hun an nei tlawm taa. School pangngai taka an kai khawmin lekha inhnik lo le lampui inhmang tam tak an um zing lai, school khar a hung ni pei a, abiktakin High School le Higher Secondary inchuklai hai hi lunginsiet an um zuol hle a nih. School kai zinga class room sûnga lekha an inchûk thei ta naw leiin nundân ṭha khawm tamtakin an inchûk thei ta naw sa nghâl a, a pawi takzet! School chau ti tâk loa ei Biekin le Sunday School hai chen khawm khâr a ni pei tah. Hieng ang hun ei tawng meka hin iengtinam thawng ei ta? Naupang hai lampui indik le nundân ṭha inchuktir chu tu mawphurna am ni tâng a ta?
Tuta tleirawl hawn ei hril mêk hai chau niloin, nundân lampui inhmang tam tak ei rama an um mêk a. A ṭhen chu mihriem pangngai anga khawsa zo ta lo, kawmkâr le kawtthlera nun hmang liem mei mei khawm an um bawk. Hieng mi bohmang mêk hai hin nun pangngai taka mi anga khawsa ve chu an nuom hle ring a um. An pilhmangna ruoma inthawka ṭhuoisuoktu dingin tu'm feng an ta? San thei anni lai hin kut kuongkuoin ngaingam takin ei thlir liem el ding am a nih?
Khi a chunga indawnna hai khi i tiem lai chun ei kohrana rawngbawltu Pastor hai i lungrila an hung inlang nal el thei. A ni ngei, Pastor hai hin iemani chen mawphurna chu an nei ngei el, inhmai ruol a ni nawh. Amiruokchu ei ram le khawtlanga suolna hluor takluot hi rawngbawltuhaiin an sin an hne naw lei tia intum bîk thei ning an ti? Mani mihriem chanpui lampui indik hril le kâwkhmu chu hrieknâl rawngbawltu hai chau mawphurna a ni bîk naw a. Krista ringtuhai, chanchinṭha zara sandam taphawt hai mawphurna a nih. 'Thil ṭha thaw dinga Isu Kristaa chun siema um in...' ti ziek a ni kha.
Aw Kristien, "I kut le ke hai chu khuop a ni si naw a...". Hieng mihai hin lainatna mita entu le, lungril liṭuonga inthawka hmangaitu a ni an mamaw chu. An suolna ang anga pawmtu le, lunginsiettu kut an nghak zing a nih!
Ei tulai khawvel ei en a; khawtlânga suolna a hung hluora, nauhaiin nundân an inhmang a, lampui danga an kâwi pha intum ding kawtlawk ei zawnga. 'Upa haiin an berâm hai an mi kan hne nawh, Pastor khawmin mi kan a pei naw taluo' tia suonlam siema rawngbawltuhai maw inphurtirna ṭawngbau hi ei khawtlânga hriet ding a um zeu zeu hlak. Nu le pa dittak, hi hi hre rawh. I naupa/naunu in baptisma a chang lai khan "Lalpa thu le thununnaa chun enkawl le inchûktir tlat'' dinga Pathien le kohran mipuihai hmaa thutiemna nei i ni kha. I nauhai baptisma certificate kha keidawk la, kha zâna intiemna kha ngaituo thar nawk rawh. Tu mawphurna am a na?
Khawtlâng muongum le hadam taka a um theina ding chun mitin hin mawphurna ei nei seng a. Ei mawphurna hai chu mi thaw dinga sie bik el loa ei ṭhang tlâng a ṭul takzet el. Khawvel mipui po poin hmelhma ei do hrawn mek chu covid-19 hripui hi a ni a. Chuong ang bawkin Kristien taphawt hai chun suolna chitin râl lien ding hi phal nawng ei ta, thukhat vuoin do tlat lem ei tiu.
'Straight Outta CCPur!'
'Straight Outta My Home!'
ti ngam dingin...
#Riekmaw Cabin
8th June 2021
Post a Comment
Post a Comment