Vâirik a ni a, lovaihai khawm lo sin thaw dingin lo tieng an liem zo tah. Ni chu a ṭang ṭha keng kawng hle el. A lum a, thli chu a hrang del del bawk a, a hrâng e ti lo chun a peinaw sa saa hrâng ni sien a hawi. Khuo chu a re thlawk thlawk a, ârpui inkaw-kawdâk ri chau naw chu hriet ding a um meu nawh. Chuongang boruok kara chun, hun intâwina tiin woofer a chun hla ka ngai taa.
Damchung tawite a hian,
Heihi a pawimawh ber
Isua i nei tawh em?
In chhungkua in dam em?
Hi hla hi ka ngai le inruolin ka hla dithai laia ka zieklût ve nghal taa. Ka ngainuom zawng tak a nih. Ka ngainuom ti ah, a saktu râwl hi ka ngaizawng a ni tak el ta âwm ie. A sak inno thiem a, a râwl a thâm huntawk vel char bawk. Ka hrietna na ah chun sawisel ding a um naw a ni tak.
Awleh! Mihriem hringnun tawite sung hin iem a pawimaw tak a? tiin indawna siem inla chu dawnna dang dang hmu ngei ei tih. Hringnuna ei ngai pawimaw thil hai hi an ang vawng kher naw tlat annawm. Politician le hnam ṭhuoitu hai chun, ram le hnam hmangaina nun a pawimawzie hril hluom an ta. Sumdawng mihai chun hlawkna nasatak intel dingin infui an che a. Inchukna ngaisangtuhai khawmin thiem inchukna chau hi mi anga ei damkhawsuok theina umsun a ni thu lo hril ngei an che. Lekhaziektuhai bula i fe chun, literature khawvel mawizie thlumtak el chu lo inba bawk an ti che. Chuong ang bawkin, ruolhai le pungkhawm huna chun, 'You only live once. Live young wild and free' tiin khawvel inhawitirna chên dingin lo thlem ngei bawk an ti che. Kohrana rawngbawltuhai chun thil dang po nekin Isu nei hi a pawimaw hmasak zie lo hril ngei an che. Anih! Ama ah chun lawmna a kim si a.
Khi a chunga indawnna le dawnna hai khi a pawimaw hle el. Khawvela ei châm sunga ei ngai pawimaw ve ding thilhai anni hrim a nih. Amiruokchu, mihriem hringnuna hin Kristaa damna nun hi ei ngai pawimaw hmasatak ding chu a nih.
Kristien sungkuoa seilien; kristien nunzie tam tak hmua inchûktuhai, vawisun hin ei dam tlâng tawl de maw...? A hnuoia zawna hai hi iengtinam dawn ei ta?
Nang i dam de maw?
I pasal kha a dam de maw?
Naupang kha a dam de maw?
(2 Lalhai 4:26)
Kristien sungkuo a dam ding chun inkhata 'Nu' a dam a ṭul a nih. Nu chu insunga iengkim hre a, insung feltaka enkawl tu a ni a. Nu hrisello natna nei zing insung chu a buora, sawl a dam nawa. Nghatna tieng tieng thaw a pik in sawlna ding vawng a nih. Chu el chu annawh, nu a damnaw chun insunga 'Pa' tak khawm a lung a muong zo naw a. A bei dawngin an rûm dawk nghut el hlak. Nauhai khawmin, nû damnaw zing thlazâr hnuoia chun hadamna an hmu ta nawa. Nun inhawitirna le chawlna zawngin an suok dawk rawp hlak a. Insung nekin khawlai nun an thlakhla lem hlaka, a tawpa chun zalenna in a thuoisuol tam tak an um rawp hlak a nih. A pawi takzet! Insung enkawltu, a tuomdamtu ding tak 'Nu' a damnaw tlat annawm...
Chuongang bawkin Kristien sungkuo damna dinga 'Pa' mawphurna khawm hi a va lien ngei deh! Pa chun insung mamaw ngaituona leiin inrimtakin sin a thaw ngam ding a nih. A nuhmei, a nauhai a hmangaihai ta dingin a theitawp suoin ṭhang a lak ding a ni a; Pa, a ni anga a mawphurna chu a hlen ngei ding a nih, an thlada a thieng nawh. A nuhmei a nauhaiin taksa le thlarau tieng thila an mamaw a phuhruk tum tlat ding a ni bawk. Insunga pa takin pa a nina anga a mawphurna a hlenzo tanaw a ni chun insung chu lawng a khaltu umlo ang zing a ni ta ding a nih. Ei pu Nova chun ama le a sunghai damna dingin lawng a tuka, tuilêt insawk but but kara khawm dam pielin niêng mawi takel an hmu nawk thu ei thuring bua ngei ei hmu a ni kha!
Kristien sungkuoa ei dam tlâng ding chun nauhai khawmin mawphurna lientak ei nei ve. Chu mawphurna hai laia pawimaw chu mi hringtu nu le pa hmangaina lêt ve na nun hi a nih. Nu le pa hai hin hmangaina le an theina po poa an enkawl seilien nauhai anthawk hin iem an dawng lêt ve a?
Nu le pain nauhai laka an ngiet rawp hlak chu 'nauhai hmangaina' a nih. Mi anga khawvel var ei hmu theina dinga an hratna po po sâwrkang inhuoma mi hmangaitu ei nu le pahai hin hmangai lêt ve an phu hle. Mi ṭhenkhat chun mi hringtu nu le pa hai hi mâwl ei tiin ei inzapui a, ruolṭha nei chang lem chu insûng kilkhata ei hnâwka. Ieng thawthei taloa an taksa a hung chau ta hnung lem hin chu; a hma neka duotna le hmangainaa enkawl hi an mamaw zuol hle a nih ti ei hriet a pawimaw. An kum a hung upa ta leiin an hrietna a hung buoia, an du zawng a hung khira, an lungril ngaituona a chaua, naupang ang el in an um chang a um hlak bawk. An insûnga ngei inphalam dawr dawr in an um a. An dit le nuom zawng khawm hril ngam loin hun an hmanga. Nauhai hmangaina thlakhla takin hun an hmang liem hlak a. Ei nu le pahai hin natna chikhat; 'nauhai hmangaina thlakhlana' natna an invawi zing a ni ti hrim ei ngaituo phak ta ngai nawh. Hi natna pai zingin thlan thim an mi liem san dam hi lo ni el di'm? In ngaituo ṭhat a va ṭul deh!
Khawvela hin natna chi tam tak a um a. Mi mal, sungkuo, kohran le khawtlang, hnam tinin eini tawk senga damnawna ei nei hlak. Chu natna hai po po a'nthawka damna ei chang theina chu 'Isu Krista' chau hi a nih. Chu chu mihriem nuna a pawimaw tak chu a nih.
Kristien sungkuo a dam a, hun khirtak kara khawm nun zângkhai taka ei hmang theina ding chun Krista'n mihriem hai ta dinga damna a hung intlunna nun hi ei ngaituo nawn rawp a ṭul. Nun chau le beidawng taka umhai, khawvel tui dâwna insukkhawp tumhai hin 'Kalvari Tuisunsuo' hi pan lem ei tiu. Chu hringna tui dawntuhai chun chatuona hringna an changa, mi suoltak le mi nunrawng tak khawm vaṭhu anga nunnem in a siem hlak. Chu chau niloin, hmangaina le inremna, thuhnuoirawlna, hrietthiemna le ngaidamna nun hai an pai taa, nun a hadamin a muongum thlak em em hlak a nih.
Ei khawvel ei ena, hripui leiin ei inrûma, ṭapnau thlaphâng khêkrawl hriet ding a um deu zing bawk. Iengtikam ka hun tlung veng a ta tiin thlaphâng takin ei intawmhim tuma. Damna ding ngaituoin zingkhuo ei var a, zân ei inthim pui nawk rawp hlak. Sienkhawm, damna le lungmuongna tak tak ei hmu chuong nawh. Hieng ang boruok ei pal mek kara hin, mihriemin ei ngai pawimaw ding tak chu taksa damna el niloin thlarau damna fel tak nun hi a nih. Kristaa nun hâdamna ngei chu! Gileada chun hang fe la, thinghnai damdawi hang la rawh (Jeremiah 46:11) ti ziek ang khan, Sukdamtu ropui Isu Krista chu pan mawl ei tiu!Ama chun tukhawm a hnar ve ngai naw a, damnaw natna tinrengin a ibâwm hai khawm hlim le lawmin an ṭin tir hlak. Chu damna ngei chu a nih a pawimaw chu, Kristaa 'damna' kim chu!
#Riekmaw Cabin
4th June 2021
A ṭha dap dap ie!
ReplyDelete