Rom lal ropuitak el Julius Caesar chu a khâwnbawl haiin that tumin thu an phierruka. A khâwnbâwl laia a ringrâwl le a ruolṭha Marcus Brutus chu ama thattuhai lai a ṭhang ve ta tlat el. Julius Caesar chun, ama thattuhai lai Marcus Brutus khawm a ṭhang ve ngei ti a hang hmu a. Chemtea suntu ngei kha a nih ti a hang hmu zet chun na a ti zuol a, a ṭawngbau nuhnungtak, "Et tu, Brute?" (Nang chen khawmin maw, Brutus?) tiin lungril natakin a thi a ni an tih.
Mihriemin inpâwl ngei pui bîk, thusie le thuṭha hai ei hril ngamna ruolṭha bîk ei nei hlak a. Chuongang bawk chun sung le kuo, thisen inhnaipui mi hmangaitu bîk khawm ei nei bawk hlak. Chuong ei laina hai a inthawka sêlna thu dâm, inkhakna le anni a'nthawk tuithlarna chen ei tuok chun lung hi a na ngawi ngawi hlak. Lungril le taksa hi nasatakin an mi hliema. Damna damdawi hrim a um thei nawh.
Nunghak le tlangval inngaizawngnaa ngei khawm hin a ni hlak. Kum tamtak hmangaina lamtluong lo hraw kawp tah! "I will love you, forever and a day..." tia thu lo intiem nghet bur tahai chunga ringumna chu a ringum zo ta naw a. Phatsanna a tuok meu chun thiemchang lem nuom leia chir inthena chen a tlung hlak. Ama zaipu Sawbua in, "Min hmangaih bertu khan, ral ang min do ta maw...?" a lo ti hlawl el ni kha! Ni e, hmangaitak haiin ral anga an mi do ding chu a tuortu ta ding chun a rinum âwm êm annawm maw? Thil inhâwkum tak ni dingin an lang nawh.
Ei Lalpa Isu ngei khawm hnuoia rawng a bâwl lai khan phatsantu langsar tak pahni a tawng hlau el. Chuonghai chu Juda Iskariot le Peter hi an nih. Juda Iskariot hi Isu ṭhuoihruoi laia ṭhang, a thilmak thaw ropui taktakhai hrepuitu laia ṭhang ve a ni a. Sienkhawm tangka sawmthum chauin ei Lalpa chu a zawr lem ta a nih. Hnungzuitu ringum ni dinga a inchuktir chun, inchuktirna a dawng pêt sanin inchuktirtu ropui chu tangka sawmthum chauin an phatsan ta a nih. Ei Lalpa ta ding chun hrietthiem intak ngawt dingin ring a um. Nauhaiin nu le pa inchuktirna pêt san a, nu le pa ditnaw zawng taka an um hman lungril a na chun, ei Lalpa lungril nat ding zie hi aw...
Ṭhuoihruoi hai laia a lusa pâwl, pa rorum le rohrât hmêl tak Peter khawmin Isu Krista ei Lal hi vawithum lai an phat a ni kha tie. Hun tamtak tuorna a lo tuormuolsuo pui, a hun tawphnai lai a chungthu an rêl lai khera phatsana a um kha chu ei Lal Isu lung a va naw awm ngei. A chunga thil hung tlung ding po po dâwnkhâwla a ṭawngṭai lai khawm, a lungngaina thu an zâwt suok hlawl a ni kha. Chu a rinumna hrepuitu dinga thlang ngeiin an phatsan el ta chu, a lungngaina a va belsa zuol awm deh! Mihriemin harsatna ei tuok a, ṭhangpuitu ei mamaw lai tak hin ṭhangpuitu ding an vâng a, hmangaitu ni dinga ei ngai hai hmêl kha ei zawng ruoi hlak. Ei Lalpa Isu khawm kha, Thiempu laltak hmaa a ngir khan chu a hnungzuituhai hmel hmu ding an um naw a, a harsatna hmuna ngirpui ngam ding hmangaitu a nei ta naw a nih. Thlalera khan chu a sukdamna beiseia zuitu kha an tam êm êm vei leh! A bei fatu hai kha khawlam an um zo taa...?
Ei Lalpa Isu ngei khawm a dotu pharisaihai le lekhaziektuhai chêksawlna nekin ama hnungzuitu Juda Isakariot le Peterin an inphatsanna kha nâ a ti lem hiel ring a um. A hmangai, a ko bîk hai anni tlat annawm.
Krista thina le a thonawkna pawmtuhai, a hnungzuitu le ama ringtu hai hi teh? Ringumin ei la um am? A rinum tuorna tuorpuitu neka a phatsantu, inmantirtu dam ni pal ei tih ti inlau a um ngawt el. "Mihriem Naupa inmantirtu ding mipa chung chu a rik! chu mihriem chu insieng naw sien la, a ta dingin ṭha lem a tih," tiin ei thuringa ziek a ni si a. Ei lekha inchukna, sinthawna le nitin hun hmangna a hin Isu hi phatsanin inumtir inlau a va um deh. Nun inhawtirna sawtnawte ei thlakhla lei ringawt leiin ei Lalpa hi a zawrtu ni pal ei tih. Chuleiin, "Kristien fimkhurtakin" tiin ei nun uluk nawk zuol sau ei tiu.
Nang chen khawmin maw, Brutus? tia ei um ve nawna dingin...
#Riekmaw_Cabin
Rongtheang
April 1, 2021
Post a Comment
Post a Comment