Ni sawm ding lai khuol inzina ka thanghmang hnung chun ka umna Assam rama khaw kilkhawr ve tak el, Rongtheang tieng chu panin ke in ka fe hnap hnap a. Ni a lum bawk a, phurrik phur sâwl leiin thlan chu bienga a lung nguoi nguoi zing a. Lam chanve a chun Simkerlêk bul deihlim, chawlhmun inhawi takel a um a. Chu hmun chu tlung kar nghakhla'n pên khat peia pên in hmatieng ka fe det det pei a. Chu hmuna thlifim hrang hieu hieu chun thinghna hai chu a mût kûr sieu sieu a. Tlangdunga um a ni leiin a boruok an thieng bawka. Chungleng vate hai khawm lung muong taka an tuolchaina hmun a ni rawp hlak. Chuongang boruok kara chun sâwl dam vawng vawng dingin kan ring a, a hmun tlunga sawl hâdam kár ngawt ka nghakhla a nih.
Ringtu khuolzin fe lai mek hai khawm ei khuolchâmna hnuoi rama hin chu nun hadamna tak tak a um naw a. Ei hlimna, lawmna hai khawmin tawpchin an nei hlak a. A hunbi ang peiin ei innuiin ei ṭap nawk hlak. Mihriem ngaia vangduoina ei tuok a. Phurrrik phur ruollo in a mi del zing bawka. Hmatieng ding thlirin khaw êng hrim ei hmu phâk ngai nawh. Nun hi sâwlna in a sip a. Chawlna zawngin an vâk an vak vêl a. Hnuoi rama hin hâdamna tluontling a um naw ti ei hrietsuok meu chun; chungtieng Vân Jerusalem ngaiin ei thlir vawng vawng el hlak a nih.
A nih! hnuoi ram fe khêla Van Jerusalem ka tlung pha chun, ka Sandamtu'n mi lo lawm a ta. Ka lungngai mitthli hru hul in, nau ang mi dawn tleiin, ṭaplai bâng ka tih. Sienkhawm, chu hun ka tlung hma chun ram tina Kraws thina hlu puongsuok dinga ko ka ni si a. Ramhlun sin thaw dinga fiel ka ni annâwm. Hringna lallukhum hlaw dingin...
#Next Year in Jerusalem!
Riekmaw_Cabin!
Rongtheang
27th Feb, 2021
👍🏻
ReplyDelete