KA ṬAWNGṬAINA NGHIL AM AN TA?

Nang ruok chu iengkimah fimkhur la, rinum tuor la, Chanchinṭha hriltu tieng sin thaw la, I rawngbawlna kha hlen rawh. 

2 Timothe 4:5

A hmasatakin Ṭhalai Weekly Kum 10 tlingna chibai vochuom. Mi hriet phak loa inrim taka buoipuitu hai inzana chibai ka buk cheu a. Hi chen mi ṭhuoitu ei Lalpa Pathien kuoma lâwmthu um sien, A hming chau chu ropui tak raw se. 

Awleh! Ei thupui 'I rawngbawlna kha hlen rawh' ti hi Timothe kuoma Tirko Paula Lekhathawn Pahnina, (2 Timothe 4:5 ) anthawka laksuok a ni a. Timothe hi Asia Minor a Kohran enkawltu, rawngbawlna sin pawimaw tak thaw a nih. Chun, Tirko Paula rawngbawlna zuitu le ṭhangpuitu pawimaw tak ani bawk. Mihriem kum tiem khawmin Timothe hi kum naupangte, ṭhalai, vânglai hun hmang ve mek ani ti ei Bible a'nthawk hriet thei a ni bawk a. Chuleiin, a rawngbawlna kawnga ki dang dang anthawkin harsatna tuok hlak a ta, hnengdena le hmusitna dam, harsatna phaivuo a hung hrang châng khawma tuorsel taka a mawphurna, thuhriltu sin a thaw pei Paula'n a dit lei a, hi infuina thu hi Timothe kuoma a ziek a nih. 

Isu Krista ringtu, Kristien taphawt hai hi rawngbawlna chanvo pek in ei um seng a nih. Ei chanvo ruok chu inang vawng naw ni a. Ei thaw dân le fe dân khawm an ang zo naw el thei. Kohran pui le ṭhalai huong sunga a ei rawngbawlna chanvo khawm indang hlak a tih. Amiruokchu chulaia ei hriet ding pawimaw em em chu 'Rawngbawltu' nina ei nei ani ti hi mitin ei inhriet seng nuom a um. Anle eini rawngbawltu ṭhalai hai hin tu rawng am ana ei bawl? Annawleh, Kohrana mawphurna ei nei hai hi rawngbawlna ah ei ngai ve hlak am? Hi kawnga hin ei chieng hle nuom a um. Isu Krista, hnuoi le vân lal nau thisen thienghlimin Kalvari Kross ah ei suol hai a min thlan a, man a inchâwk ei ni tah! Vanram kai ding ringawta sandam chu ei ni nawh, rawngbawl dinga sandam ei nih. Hi thu hi tulai ṭhangthar haiin ei ngai pawimaw nuomum ka ti hle a nih. 

A ni ngei, rawngbawlna hi ei phak tawk senga ei ithaw zing le ei fe pui mek chu a nih. Anle iengtinam rawngbawlna hi i lo fe puiin i lo thaw hlak a? A ṭhen chun chier pumin, a ṭhen dang lungawinaw le inhmur pumin, lungril inthim takin ei thaw hlak. Amiruokchu ei Bible chun, "Lawm pumin Lalpa rawng bawl unla" a mi ti a nih. I rawngbawlna a khan lawmna i la nei am?  Pathien rawng bawl theia i um khan i sungrila hlimna an tlun hlak am? Hi lai nunram hi Kristien hai ei in-ennawn rawp nuom um ka ti hle. Lawmna nei ngailo mihriem chu mi lungsietum tak el anni a, thaw rawn vieu in thawlawm tam tak pe hlak sien khawm a thlawn el ding a nih. Chulleiin, lungril thienghlim tak putin lawm pumin Lalpa rawng hi bâwl sunzawm pei ei tiu. 

Kristien hai hi Isu Krista hnungzuitu ei ni leiin ei rawngbawlna kawnga khawm hin fimkhur taka ei thaw hi a lo ṭul a nih. Tirko Paula chun Timothe kuoma khan "Nang ruok chu iemkima fimkhur la, rinum tuor la..." a ti nih. Tulai ei Kristien nun hi a da ta hle niin an lang. Krista hnungzuitu, rawngbawltu hai hi ei nundân hi ei fimkhur hle a ṭul. Biekina inkhawma, Kohran sin thawna haia ṭhang ve el hi a lo huntâwk naw tawp el. Biekin puo tienga ei nun, ei ṭawng dân le khawsak dân hi ani a pawimaw chu. Khuo le veng maksanin ram hla taka inchukna le sin ṭulna leiin ei um dar a ṭul hlak a. Chu huna chun nun a hung zalên a, khawvel inhawitirna chânga tam tak ei tlu rawp hlak a, ringnawtu sakhuo neinaw hai ang ela nunkhuo phâm ṭhalai hriet ding an um deu zing el tah, lungril a na in a pawi em em. Ram danga chau niloin hieng ang nun hi ei tuolzawla hai khawm a tlung mek ta bawk. Hieng Kristien nun depde hai lei hin annawm fam tah mihrang Pastor Thangngur in,

"Ringtu laia suolna lei khawm-

Hin ei Lalpa hming an sukpâwi zo ie;

A hming siet ding phal naw'm ei niu,

A hmel siet ding phal naw'm ei niu,

Ei thlarau hliem damna a nih." tiin rawngbawltu, Krista zuitu hai chu nun dâna Pathien chawimawi dingin a fiel. Thuhril le inpakna hlasakin ei Pathien hi ei va chawimawi thei ve naw ani khawmin ei nundan bek hin chawimawi tum ei tiu. Mihaiin ei nundân an mi tiema, an mi en zing a nih. Chuleiin, "A tiemtu chun tlân puma a tiem theina dingin."  (Habakuk 2:2) ti ziek ang khan ei nundan le Krista Chanchinṭha hi inmawi mawl raw seh!

Isu Krista rawngbawltu hai hi rinum tuorna kawnga khawm hin tuorsel a lo va ṭul ngei deh! Tirko Paula bawk in Timothe kuoma chun 'Krista Isu sipai thatak angin rinum mi tuorpui rawh' (2 Timothe 2:3) tiin a rawngbawlnaa rinumna a tuor hai tuorpui ngam ve dingin a fiel a nih. Krista rawngbawltuhai hai hi hadam le inhawi ti taka rawngbawlna phur suok thei ani naw a, tuorna le inthlawn a ṭul châng tam tak a um hlak ani ti ei hriet. Mi tam tak tak chun Isu Krista chu sukdamtu ropui ani ti an hriet khan an zui hum hum a, nisienlakhawm an hemde na ding Kross a put meu khan chu ṭhangpuitu ding an vai ruoi a ni kha maw? Krista'n a min thlanna lampui khawm kha lampui inhawi le thel hen hun chu ani nawh, hling le châng a sip a nih. Chuong hai chu pumpel tum loin thawitakin a tuor muolsuo lema, chu zara chun chatuon hringna changtu, nau nina chau ni lo rawngbawlna chanvo chen pek ei ni tah. A ropui tak zet! 

Tulai Kohran hai khawm rawngbawlna chu ei inhnik, nisienlakhawm anhawina chen chaua a rawngbawl, tuor a ṭul na hmun chena fe ngam loa tlansie hlak rawngbawltu ei um hlak. Italy ram inpumkhatna (Unification of Italy) dinga thawhlawk em em sipai huoisen Garibaldi chun Italy ram zalenna dingin ram ta dinga pensuok dingin thalai sang ruol hai fielna a neia, thu a hril zo chun mi pakhat hin "Pu, Italy ram ta dinga kan pen suok chun iem hlaw'ng kan ta?" tiin an dawna. Ama chun, "Hliemna dam, pân ser dam, imu intuo nawna le phingṭamna hai, vuokna invuolhai le thina chen khawm ning a tih..." tiin a dawn. Eini khawm ei rawngbawlna a hin harsatna thuo tam tak um a tih. Chuonghai chu pumpelna lampui zawng loa huoisen taka tuor muolsuo dinga ko ei ni lem. Krista hming leia rinum tuor ngam dingin inbuotsai ei tiu. 

Ni e, ei rawngbawlna a hin chau chang chu um hlak a tih. Beidawng harsat leia mani indawm kun thlawk thlawk chang tam tak tuok hlak bawk ei tih. Nisienlakhawm ei Pathien thu bawkin "In hung sawl a, in thlarau tieng in hung chau naw na dingin, misuolhai theidana nasatak tuormuolsuotu ngei chu ngaituo ro" (Hebrai 12:3) a mi ti a nih. Khawvela harsatna ei tuok hai lei hin ei rawngbawlna hi chau a thlu sawng el ding ei ni nawh. Ei harsatna ei hmu lien chang Isu'n suol leia hliem tuora an rûmna, bohmang hai a mi zawng suokna lampui kha ei ngaituo nawn rawp nuom a um. Harsa le beidawng inti em em a ei um lai khawm Isu Krista'n Bethlehem anthawka Kalvari Kross lampui a hung hraw kha ei ngaituo pha chun ei tuorna hai kha chîntakin an lang hlak a nih. Ei thlarau a a chaua, ei sawl ta hle khawmin khawsak mivar hai angin ringumtakin chungtieng arasi ei Lalpa zui zing ei ta. Ama chun Vân Jerusalema a mi la ṭhuoikhawm ding a nih. 

Tulai khawvel thiemna an ṭhang hrat a, ṭhalai hai inhawi ti le nuom ti zawng tam tak ban phak ela a um tah. Hieng changkangna le nun inhawitirna thil hai hin dam te te'n Pathiena min hlat tir hlak a, ei rawngbawlna chanvo hlen zo loin hmingsie takin ṭhenkhat chu ei tawp hlak a nih. Sunday School anthawkin bul ei ṭan ṭhat vei leh, a pawi em em. Pathien neka khawvel thil hai ngaisak a, ei ngaina lem chun, "Dema chun tulai khawvel hi a ngainat leiin a mi maksan tah a" ti ziek ang khan ei chanchin hi hril ni pal a tih ti inlau a um hle. Chuleiin, rawngbawlna hi bul ṭan ṭhat el annawa, ringumtaka a tawp chena thang dingin ei infiel thar seng a nih

Aw, nang kristien ṭhalai, 'I rawngbawlna kha hlen rawh!'