Greek hai thawnthu a indo thiem le mi huoisen, Pasalṭha Achilles chu kum naupangte-a thi ding a ni thu hrillawkna a um a. Chu thina anthawka a him theina ding beiseiin a nu chun Styx vadunga a ṭhuoia. Hi vadung hi thilthawtheina mak danglam tak (magical power) nei a ni a ring a nih. Achilles chu naute a ni lai vadunga chun a nu'n a tuia chun a phûm a. Nisienlakhawm a ke ârtui chu tuia chun phûm sa a ni ve naw a. Chu a ke ârtui chu a hratnawna (weakness) tak a hung ni pha tah. Tu chena khawm Achilles ke ârtui (Achilles heel) thu hi mi hratnawna hrilna (metaphor) a hmang a hung ni pei ta a nih.
Khawvela mihriem hung piengsuok taphawt hi ei Lalpa Isu Krista chau naw chu tukhawm fel famkima pieng ei um nawh. Felnawna, hratnawna neia seilien seng ei nih. Khawvel mi ropuia ei ngai hai khawm hi sawisel bo anni bik nawh. America President ropui Abraham Lincoln kha midum hai zalenna dinga sûlsutu pawimaw tak a nih. America History a chun a chanchin hril tâwp ni ta ngai naw nih. Amiruokchu, 'Ama kha a nuhmei a ngam naw em el, a thaibawi taluo,' ti a hril a ni ngai nawh. British Prime Minister, pa rorum le huoisen Winston Churchill khawm kha 'a ropui a chu zu a he taluo' tia dem zui a ni ngai bawk nawh. Indopui pahnina hun laia Kumpinu lalram humhimtu ropuitak a ni na a khan mi ngaisang a ni zing a nih. Chuongang bawkin India Prime Minister hmasatak Pu Nehru khawm kha 'A lêr zek zuk em el, Lord Mountbatten a nuhmei le khawm hrilsep an kai an ti kha' tia dawrte tuola mi'n a sietna thu an hril vûng rak hriet ding a um ngai nawh. Khawvel mithmua an thilthaw ropuitak tak hai leiin ngaisang an ni a, chu thu chu ṭhang le thar chenin hril a la ni rawp hlak. An mimal hratnawna hai ruok chu thuphmangin a um ve thunga, hril a ni ta ngai nawh.
Eini Hmar ṭawng hmang hai ei ṭhangmawbâwk pakhat chu; mi ṭhatna le felna hril neka mi hai hratnawna, (weakness) an châuna ei hril nuom lem hi ni ngei a tih. Mi ṭhatna hmu hi harsa ei ti a, mi zuk inpâk hi harsa ei ti ngawi ngawi hlak. Mi pakhat hlasakthiem deu a hung inlâr sien, a hlasak thiem zie ei hriet le inruol in a mimal nun châuna ei hril zui nghal hlak. Pathien thuhriltu ropui le thlawtling tamtak haiin Kristien nun dân ṭha an hril châng khawm an thuhril nekin an famkimnawna ei hmu lien pek lem a, an insung chanchin infuknaw chen ei hril kai rawp hlak. Football inkhel thiema inlar hai dâm, an thiemna kawnga inpak phu annih. Sienkhawm, an ngaizawnghai sietna chen hi chu va hril a ṭul kher nawh. An thilthawna kawnga inpak phu em em hai kha kawng dang daia ei van khia, an ṭhatna nekin an sietthu hril nuomna tiengin a mi bûk rik lem rawp hlak. An hratnawna tak hril nuompui ei insieka, a hre tak ni awm takin milai ei hril zut zut nawk hlak. Amiruokchu, sawiselna bo mi ni thei chu duthusam a nih. Chuong lai zing chun, 'Mihriem famkilo ei na, suksuol rawp thei ei ni annawm' tia mani nun inthiemfawmna ruok hi chu ei bân dinga ditum chu a nih.
Mitin in inpak ei lawma, ei ṭhatna chite um ve sun mi hrie pektu hai chu ei ngaina hlak. Chuleiin, ei renga ei dam tlangna ding chun, ei ṭhatnawna hai hril le in dem bansanin, mi hmelṭhatna hmu tum lem ei ta. Ei hratnawnahai anthawka hratna ei chang theina dingin, in ṭawngṭaipui tuo hlak ei tiu. Chu chu kristien hai ei thaw ding awm hrim khawm a nih!
#Riekmaw Cabin
Rongtheang
29th September 2020
Tiem a manhla ie
ReplyDelete