KA ṬAWNGṬAINA NGHIL AM AN TA?

Noa hun laia tuilet zoa inthawka a vawikhatna dingin taksa bawrsawmna leiin hospital pahni- Umrangso Community Health Centre le Dr. Norman Tunnel Hospital, Jowai ah hai kar hni lai enkawlin ka um a. Mi hrisel ve tak, hospital chen admit ngaia ka zuk na el chu mak kan ti a, kei chau niloin ruolṭha laina hai khawma mak an ti a, a ṭhâwng ve hle ning a tih. Veng tienga (Sielmat) sunghai khawm lungmuongin an um thei naw a, an lungril ka lak hle a ni ti chu phone call ka dawng dân anthawk khawma inhmai ruol a ni nawh. A ni ngei, "Sema Faihriem hospitala an admit," ti chu thil inhmelo le ngairuotna a khawm an ngairuot phak ngai naw khawm ni mei a tih.

Nov. 4, 2020 khan ka sûngkhaw le khawsik nasat leiin Umrangso Community Health Centre ah admit in ka uma. Dr fel em em el, ICI Nunghak ngat, Dr Rebecca Ramhlimum in ngunthluk taka ami enkawl hnungin Nov 7, 2020 khan kan suok a. Hebron Umrangso a ka zawlpa (LR Joy Tuolor) hai ina hadam dingin ka um ta a. Hospitala ka um sûng le suok chena ka zâwlhai sûngkuo ka ta dinga an inpekna hi a hlu bek bek. Theinghil ni um naw nih. 

Chuonga ina hadam dinga ni 4 vel ka um hnung chun ka khuo a hung sik ta rak el a, damdawi ramtin fain kan inenkawla chu umzie um chuong naw a. Kan beidawngin Nov 17, 2020 in Jowai ah hospital ṭha lem pan dingin kan tlân tung a. Dr Norman Tunnel Hospital a chun kan in admita, ka natna hai an hang check chun Malaria PF & PV inkawp in ka lo na a ni zing el. Ka natna ka hang hriet zet chu ka thla a phang a, ngaituona an vâk sei nuom hle. Sienkhawm, Pathien lunginsietna ka chunga suklangin a um a, damtakin Nov 23, 2020 khan hospital suoksan theiin kan um a, ka lâwm ngawt el.

Hospital ka panna san tak chu damna ka beisei lei a nih. Kei ang thoa damna beisei damnaw tamtak an zâl ve ṭhup bawk. Hospitala khuma ka zâl lai chun hieng hin kan ngaituo a; Isu Krista kha hung sien, "Sema Faihriem, sukdam i nuom am?" tiin mi hung indawn sien chu, thawklekhatin, "Awve Lalpa! sukdam ka nuom," tiin inrangtakin dawn ngei ka tih. Asanchu natna hrik paia zal zing kha harsa ka ti a, ka bei a dawng a, sûn khuo a sâwt in zân hun a sei ka ti em em hlak a. Khuo var le inthim ding kha ka hawphur em em hlak a nih. Chuelkelah, ka phing ṭam zing siin fak ka nei thei naw a, ka du zawng ka fak sun khawm kan luok dawk nawk peia. Ka umdân kha nun sawlum tak chu a nih. Mi rama beidawng leia patling zuk ṭap el hlak chu ka nuom bîk si nawh. Ṭum infûk sienla lem chu 'Pa' hlaw thei ta ding, mi rama thlasie taka zuk ṭap em chu thlawmthlâk a ka ngaia, kan sûm ve hrâm hrâm chau a nih. Ka umdân kha hril ngaina ka hriet naw a, bei hi a dawngin a dawng rawng rawng el chu a nih. Chuonga natna tuora hospital ka lût anthawk ka lungrila um zing chu, "Awve Lalpa! sukdam ka nuom" ti thu chau hi a nih. Thil dang iengkhawm ka beisei nawh. Dam kha ka nuom hle el a nih. 

Mihringin natna ei tuok changa ei beisei tak chu taksa damna a nih. Chu taksa damna chu beiseiin nei po po sengin hospital ṭha hai ei pan rawp hlak. Sienkhawm, damna tluontling chu ei hmu vawng chuong kher nawh. Taksa damna dinga nei po senga damna ei zawng ang hin chatuona hringna 'SANDAMNA' hi zawngin ṭhang ei lâk hlak dim aw ti hi a min ngaituo tir chu tie. Ei hmangai, ei nauhai, nu le pa, sung le kuo natna in a man meu chu sungkuo ei ṭhang tlanga, taksa damna beiseiin tangka tamtak sengin hospital ṭha ei pan pui hlak. A nih, chuong khawm chu ei thaw ding hrim a nih. Amiruokchu, taksa damna ei ngai pawimaw ang hin an thlarau damna ding khawm ngai pawimaw sa inla nuom a um ka ti thar hle chu tie. Ei sung le kuo thlarau damna la changlo hai hi an taksa damna ding ei ngaituo ang hin sungkuo tin ṭhangruolin chatuona hringna, damna tluontling an chang theina ding ngai pawimaw nawk zuol inla nuom a va um ngei de eh!

Taksa damna hi a hlu a, ei ngai pawimaw ang hin thlarau nun damna khawm hi ngai pawimaw zuol sa inla chu a va ṭha famkim awm ngei deh. Hospital a ei fe a, taksa sukdamna chang ei nuom ang hin Isu kuoma fe in, "Lalpa, sukdam ka nuom" tiin Isu kuoma thlarau damna hni mawl mawl ei tiu. Chatuon Hringna hi a hlu a nih!

Thubel:

Jowai hospital ka panna dinga lampui iengkim mi ngaituo pektu kan Field Secy. Rev. Ramnghet le 3km, Garampani a rawngbawlpui hai inpekna le an mi ngaituona kha ka ta dinga hrietzing thlak thil chu a nih. Chuelkhelah, hospitala ka um sung po po iengkima mi enkaitu ka sangnu Sophia Sungte chunga ka lawm bêk bêk. Jowai a kohran member hai, hospitala kan um sung fak le dâwna mi sawmdawl tu hai inpekna a ropuia, theinghil ni um naw nih. Hienghai baka hin hmun hnai le hlaa um ruoltha-laina, hmangaitu hai ka chanchin ngaivena mi ṭawngṭaipuituhai ka ta dingin in va hlu ngei deh!

Mihring ṭawngin lawmthu ka hril suok thiem nawh. Ka damnaw ngaivena mi sawmdawltuhai, ṭawngṭaina le thei ang anga mi ṭhangpuitu hai po po Pathienin mal sawm pei raw se cheu...

Tu hin chu ka hni ang ngeiin, "Lalpa'n a mi sukdam tah!" A hming thienghlim chu inpakin um sien, A ma chu ropuitak rawse. Amen!

#Riekmaw_Cabin

 

Rongtheang

10th Dec 2020