KA ṬAWNGṬAINA NGHIL AM AN TA?

Bible a Jona hming hi naupangte khawma ei hriet deu fur ring a um. Ei hriet inlâr dân tlangpui chu; Ninevi khuoa simna thu hril dinga Pathienin a tir khan a fe nuom naw a, Tarsis tieng tlanhmangin ngapui sunga nithum le zanthum a um ti hi ni ngei a tih. Mi tamtak chun Pathien thupek zawmlo tiin thiemnaw khawm ei inchang el thei, a âwm hrim a nih. Sienkhawm, Jona nun hin mihring mihriemna a min hmu fie tir hle in ka hriet a, thlirna tlang danga inthawk chun thiemnaw kan chang ngam ve ngam nawh. 

Ninevi khawpui hi Assuria lalram sunga khawpui pawimaw le ropuitak el, Noa tupa Kush naupa Nimrod in a sât a nih. Assuria mihai hi an vânglai chun an nun a râwng a, an suol bawka. Hmelma ta dinga râl ṭium tak an nih. Hebrai mi, Pathien zawlnei Jonah dam lai ngei khawm Assuria miha'n Israel an zu rûn a. Nasataka sukrinumin an lo um a nih. Chun, hi khawpui pawrche tak sunga cheng mihriem hai chun Pathien ngaisakna hrim an nei naw a. An suolna an sim naw chun Pathien hremna an tuok ngei ding a nih. Chu khawpuia simna thu hril dingin Pathienin Jona chu a tir ta tlat el. Nisienlakhawm Jona chu a fe nuom teu nawh. A chipui hai suknawmna tu, a chengna ram runtu a hmelma hlun hai kuoma simna thu hril chu a nuom naw hle. Hril nekin a khawpui pumin sie hâwp vawng sien a nuom lem niin an lang. 

Kei ngei khawm ka phâk ang tâwka rawngbawlna ka fe pui dan kan  en a; chanchinṭha hrilna kawnga hin ka mihriem ditthlangna, hril nuomna hmun bik, fe nuomna hmun ka nei hlak. Pathien lunginsietna zara sandamna hi mi po po ta ding ni sienkhawm a phu le chang dinga ditsak bik deu hi mihriem lungrila a um rawp hlak. Assuria mipui hai anga suolna tinrenga inhnel hlak mi hai lem chu; an suol bawka, hrem an phu hrim a nih, tia an chunga kutsawp nuomna lungril ka put rawp hlak. Hnam dang mi khing rawp hlak tu hai nek chun ka chipui hai kuoma hril ka nuom lem a. Kohran danga mi thlarau dangchar hai uksak loin kan lawina Kohran sûnga mi chau ka ngai pawimaw bawk hlak. Ka umna Kohrana khawm chun kan nuom bîk dam, lût nuomna bik dâm ka la nei pei a. Mi ṭhenkhat insunga ka lût inzing ut laiin ṭhenkhat dang hai chu thla têl ka riel dâm a um ve hlak. Ka lo thaw suol ngawt el!

Ei Pathien thu, chanchinṭha chu awia pawmtu taphawt ta dinga pêk a ni a. A lunginsietna chun misuoltak khawm a huom vawng a nih. Chu lunginsietna chun thlier bik a nei naw a, mitin ta ding a ni lem. Mihriemin ei nuom dana ei lo her rem el thei ding niin an lang nawh. Chanchinṭha thu maktak hi thlierbikna ṭhangloa, a mamaw taphawt hai kuoma hril ding a lo nih!

Jonah kha Tarsis tieng pana a fe na lawnga khan thlipui nasatak el a tuok a. A chuongpui hai beidawnga takin an um a, âi an sân meu chun Jona chunga chun a tlu a, thiemnaw an inchang thu ei hmu. A suolna chu inphat loin ama chu tuipuia peihmang el dingin a hril tâwl thu Biblea ei hmu sa bawk. Pathien thu zawm loa tlânhmang ani leiin tuipui a bohmang el dingin inring ngei a tih. Amiruokchu, a ma suksuolna leia mi tamlemin an tuor pha ding nek chun a suksuolna chu inphat a tum nawa, a chunga remruotna chu tuor thlang el a tum ta lem a nih. Kei, Kristien tlangval ve hin chu ka suolna hai chu thup bo tumin ṭhang ka lâk hlaka. Ka suolna anga thununna le tuorna ka tuok ding hai ka dâwn khâwl chang lem chu kan puong ngam ngai nawh. Ka suksuolna le felnawna leiin: ka insung, ka thuoitu chanpui, ka department, ka sinthawpui, kohran le khawtlangin an tuor pha ding ni sien khawm ka lan thup bo ṭawk ṭawk tum hlaka. Thiemthu ka lan zawt ruoi hlak. Jona anga peihmang dingin kan sie phal ve ngai nawh. Mi suol tak hi ka lo inngaihlu thei ngawt el!  

Jona chu a ṭawngtâina leiin ngaidamin a um a. Ngapui sûng anthawk suokin, Ninevi khuoa thu a va hril zo chun khawpui saktieng panga chun sâwlbuk a bâwl a, ûm zâm hlîma chun a chawl hadam a. Nisienlakhawm a zinga chun ûm zâm chu a thi el tah. Jona chu a lunginsen a, Pathien kuomah, "Keia ta dingin dam nekin thi a ṭha lem," tiin a lungninaw thu an zawt hiel a nih. Jona chu thlai zam thi leiin a lunginsen a, sienkhawm Ninevi khuoa thlarau bohmang tam tak hai chunga sietna thlung ding ruok chu pawi a ti naw a, lunginsietna a nei ve nawh. Amiruokchu, Pathienin thlarau bohmang mihring hai hi anni a hmangai chu. Kei ngei khawm Jona ang hin ka um rawp hlak. Hrietnaw karin thlarau bohmang tamtakin muol an liem mek lai; ka ui thi dâm, ka bawngchal thi dâm, ka motor siet dam, ka insunga thil hlu hringna neilo sietthua dam pawi ka ti lem hlak.Thlarau bohmang tamtakin an chatuon hmun an pan mek pawi tina lungril ka lo nei phâk ngai nawh. Ka lo ininghil sawt ngawt el!

Chanchinṭha hrilna kawnga hin ramri khang a um naw a, hnamtin laia damna thu puongdar dinga thu pek ei ni lem. Thlier bîk ram nei thei a ni nawh. Chuleiin, mitin ta dinga damna thu, Isu Krista chanchin hi hnamtin lai hung inthang mawi zuol pawi raw se... Amen!

#Riekmaw Cabin.

Rongtheang,

31st August 2020.