KA ṬAWNGṬAINA NGHIL AM AN TA?

Mihring taphawt ta dingin vawikhat thi ruot a ni a. Thina chu ei hmabâk, pumpel theilo ei hraw seng ding chu a nih. Iengtikam ka hun thlung veng a ta? Iengtik am ning a ta? ti chu ei hriet nawh. Sienkhawm hi hi ei chieng; nikhat chu thina kut deiin mi la man a ta, chu ei khawvel tâwpni chu a la ni ding a nih.

Thlahmur 22, 2020 zingkar chun thangko thu a hung thlunga. Pi Rose Ell in chatuon ram a mi lo pan san ta ti thu hi a nih. Mak ka ti a, inpam um khawm ka ti hle. A zani zân khan a naupa Samuel Lalhuopzau, kan ruolpa le kan inbieka. Ama, Pi Rose Ell a ruoltha em em Pi Thiengte le  Huopzau khawm an inbiek bawk a. A nu chu a ṭhat tieng a pan pei thu a mi hril annawm. Sienkhawm a zinga chun beisei naw tieng takin thu a hung thlung ta hlau el a, ami barakhai ngawt el!

Ama, Pi Rose Ell hi nu zaidam, kan ruolhawn thilthawna taphawta min hnikpui em em hlak tu a nih. A pasal Pu J. Para khawm hi kan tleirawl ball pet inhnik laia kan team manager a ni nghe nghe. An insung hi kan chetthlak na, so veng vunga ri kan siemna hlak le kan inhmukhawmna hmun pawimaw pakhat a nih. 

Hieng ang bawk hin kum 2015, thlaphal ni 18 khan Pi Laltlanmawi w/o Pu Laltleilien in a mi lo mâksan ta a. Nu thling, nunnem le zaidam, kan ruolhawn a tu el khawma kan inêl le ngainat. Khuoiva kuo lûn ang ela an in kan bêl châng khawm hmel hlim sara mi dawngsawng hlaktu nu ṭha kan lo ṭhe ta bawk. A hril hai thlak ngawt el! 

Khi a chunga nu ropui tak tak hai pahni khi an insung el chau nilo, Kohran le khawtlanga mi thahnemngai thei anni a. Kan ruolhawn thilthawna phawta khawm phûrna le thathona min thuomtu anni rawp hlak. Kan ruolhawn ta ding chun channa rapthlak tak a thling. An hming lam ding a um tanaw zet chun kan lawina 'RÛNMÂWI' khawm a dei zo ta a. Ârpui te ṭhuoilaiin a te hai a maksan ang el in mi awplum tu ding kan invai chu an tah. Aw Nuhai, ṭhena thu kan la tiem naw cheu annawm...

Thina lusun mitthli'n a mi bâwm zing lai chun hieng hin kan ngaituo a. Kan ruolhawn hi inchûkna le sin ṭûlna leiin ram hla tak taka hai kan um dar ta a. Inhma angin dâwr tuol le kawtthlera hai inpawl khawm thei ta naw inla khawm sungkuo anga hohlimna dingin 'RÛNMAWI' whatsapp group kan siema. Chu taka chun thu sie-thu ṭha, hun liemta haia kan chetsietna hai dam hrilin hunâwl kan intâwi hlak. Amiruokchu a sunga chêng hai ka zuk en vêl chun, a tam lem chu fahra a seilien kan lo ni ta zing el. Thlasiet a va na ngei deh! Sienkhawm beiseina hrim nei naw hai anga indawmkûn el kan tum nawh. 

Khawvêl ṭhena ram a hin fahrana nun in hringnun a tuom châng khawma Lal thisen hlu zârin kan lan nui thei a, ngui le chau chang um hlak sien khawm hlimin lan nui nawk hlak ngei kan tih!

"Aw Pathien ṭhangpuitu pangngai,

Kan hmatieng beiseina..."

RÛNMAWI FAMILY!

Riekmaw Cabin

Rongtheang

July 25, 2020