KA ṬAWNGṬAINA NGHIL AM AN TA?

Shân khawzawla hla phuok thiem an hril Liendang chun,

"Tiena pipu'n thlafamin hrânglung an phun, Suilunglengah chaltuoiin hrânglung ka phun" 

a lo ti hi a âwm ngawt el. 

Lunglen purdo leiin Shân khaw tlangval Liendang ang chun lung chu phun êm ei ti'm maw...Ṭhaphuk!

Leh! ka Diary ka zuk phêt a, lockdown hun sunga ka hun hmang dan hai ka zuk thlir kîr a, hlimna le lungngaina an pawl deu ruoi. Sienkhawm bûklunga bûk ding ni inla chu hlimna tieng hin a bûk rik lem ngei ka ring. 

India ram pumpuia lockdown puong a ni deu hlim lai khan, ka pienga inthawka ka la ṭhang ngai lo moneitu ṭhienpa a ka ṭhanga. Zing tho phak le kawrchung (coat suit) hâk an zawm nghal a. Kha ni a kan chei kha nal kan ti em em vei le, a mi hmutu an tlawm kha chu tu chen hin pawi ka la tih. Zoram khawvela nunghak po le râlleng nunghak tlawm pûk belin mi hmu hai sien ti kha ka duthusam a na. "Kawthler lun lai taka khit deng kan che a, nithum sung en char char pei kan che" an mi ti hiel khawm ka ring. Chu neka pawi nawk zuol chu; bawngsa chartang le vawksa belpuia a thau inlâng deu dûr tawp (vawkin bu a tawp ang) dinga inngai khawm kha sûmlai an zâm ral tah. Ka bawng keina ka sawl vei le maw? Thaw nawk thei hlak ni ta lo. A pawi ngawt el. Hripui lei vawng!

Israel hai babulon sala an um a. Mi rama chun zion hla rem a harsat zie an inzawt ang khan; kei khawm khuolrama ka cham lai hin ka "Riekmaw Cabin" ngaiin ka kieu vawng vawng hlak. Leh, ka umna hmun ram kilkhawr a an hril tieng chu pan dingin zingkar kan thawk suok ta a. Nisa chartang hnuoia darkar thum vel ka lawn hnung chun ke a hung na ṭan a, zaper khawmin 'za' a per zo ta naw a. Pang chu a na thei po po a na vawng ta a, tlan tuiin a min sil zing bawk! Khawsawt chu um naw ngawt el... Sienkhawm, "Aw Pathien ṭhangpuitu pangngai" khan ka umna  hmun chu a min tlun ta thoa, ka lawm ngawt el. 

Lockdown tawp hun ding nghaka beidawng êkche ṭhung thaw el nek chun literature khawvela ka mi hriet ve sun hai le ka ngainat hai lekhabu ka mai khâwm a. Ziektu hmingthang hieng: L. Keivom, Mafaa Hauhnar, Lalhruaitluanga Chawngte, Rev Dr. Zairema hai kutziek mawi tak el hai chun lung an dum hle. Zoram Khawvelin anni hai ei nei hi ei lo vangnei ngei deh! Eh, a ruk taka ka lo ngaina ve hlak Kushwant Singh, a kuthnung inlar em em, "NOT A NICE MAN TO KNOW" khawm ka lo inhmelhriet pui ve tah. Hi lekhabu ka tiema inthawk ka sapṭawng thiemnaw zie inhriettir in um lang khawm ka thiem chakna lungril in a mi hne lem tlat chu tie. John Stott, C.S Lewis le Rick Warren hai kutziek khawm kan buon pui ve nuol hman annawm. 

Lemchangna khawvela lemchangthiem hai lemchangin lockdown khawvel buoina min theinghil tirin hun a min tâwi tir bawka. The Notebook, War Room, Forever my Girl, I Still Believe hai anthawk ṭan in Extraction, 12 Strong ka pakai a. Chu zoa chun Greek nunghak hmeltha Helen of Troy le Cleopetra hai fe peiin, Paul: Apostle of Christ in ka tâwp ta a.

Chun, Kristien hringnun inthanglienna dinga pawimaw takel Bible tiemna le suizauna hai hun ka hmanga. Pathien ropui zie, a lunginsietna nasat zie hai bâk ah; mihriem nundan ding kimchang taka ziek le induong a lo ni ti a min hmu fie tir zuol. Pathien thu hi chu a va ṭha ngei deh! 

Aningei, hriet ngailo ram; sung le kuo laina, ruoltha le hmangai hai chu hril lo, mani chipui pakhat tak ngiel khawm hmu ding umnaw na rama cheng inla khawm ama chun a mi umpui zinga. Ka khawvel lungngaina a hmu a, ka ṭawngṭaina ngaithla in, ka mamaw tinreng a mi pek hlak. Chuongang lawma mi hmangaitu le mi lunginsiettu, ka ta dinga himna le damna ni sien khawm a ma hriefu loin hla tak ka lo fe hmang san a. Thisena inchawk ka ni reng hriefu loin ka tisa ditzawngin hun ka lo hmang nawk hlak. Sienkhawm a mi hmangaina, a lunginsietna chu a kiem chuong nawh. A pangngai zing, nitinin a pung deu deu lem a ni ie. A va ṭha ngei deh!

Pathien Hring, I ropui ie, I ropui ie... 

Riekmaw Cabin.

Rongtheang

June 1, 2020