Naupang kêl khal tiet ka hung ni ve a. Ruol pâwl le khawlaidunga inhnel inhawizie dâm ka hung paw phâk ve tah. Sienkhawm, vangduoithlak takin ka pa chun kal natna leiin a mi thi san a. Ka lo ngaituo phâk ngailo tienlaia an hmusit le nêksâwr tuok rawp hlak 'NAU FAHRA' chu ka lo ni ve ta zing el.
Unau pali, nuhmei pahni le pasal pahni kan ni a. Lo sina sawrthei mumal hlak kan la um si nawh. Ka nu ta ding chun inkhatpâ ṭhang loa nau pali enkawl chu huphur um tak ni ngei a tih. Pâ tak um talo chu kan insûng chu hmeithai insûng a hung ni tah a. Tlângram khaw kilkhawra seilien chu mihai mi hmusitna ṭawngkasuok hriet ding a la tam a. Ruolhai khawmin an mi zuom a. Inhmuthiemnaw châng, "fahra te te, nau fahraa ka hrietsa" tia chaldel taka an mi ṭawngkhum châng a um nâwk rawp hlak.
Kei le ka u chu thil hrethei ve tâwk tah kan ni leiin rinum ti châng kan hau a. Ruolhai thuom ang kan inthuom ve phâk nawh a, ruolhai fak ang khawm kan fâk phaknaw châng tamtak a um hlak. Thil umzie hre ve loa ka sanghaiin mi thil an inhnara, ṭap puma ka nu kuoma an ngên chang dam khan ka nu lungril kha a va na thei awm de aw! Kan hmu loin vawi iengzam a mitthli far a ta. Vân Pathien kuoma vawi iengza'm a lungngaina thu inzâwt hlak a ta...?
Christmas a hung nia, mihai chu sûngkimin thuomhnaw thar le Biekin an pan a. Inkhawm ṭin ah naupang hawn chu Biekin tuol lai an inhnel dar dar a. Keini chu thuomhnaw thar kan nei thei ve nawa. Lêngkhâwmna ah ka nu bula kan inṭhung rama, tuola ka ruolhai hlimtaka an inhnel ka thlîr vawng vawng lai dam khan ka nu khan "Aw ama inpâk ei tiu" ti hla hi hlimtakin a sak bîk chu ka ring naw tawp el!
Fahra nun hi a rinuma, ditthlang thei ni inla chu tukhawma ei tlang ka ring bîk nawh. Mâni inngaisiet a awl a, thlasiet a awl bawk. Sienkhawm, khang ang nun harsatak kara khawm khan ka nu chun Pathien hnaia um dân a mi'n chûktir hlaka. Chu chu kei le kan sûngkuo ta ding chun a huntâwk hle a nih.
Ka theinghil theilo thil pakhat chu, bupui sîk lai a ni a. Ka nu le mi bu ât inhlaw dingin kan fe a. Keiin ṭu ah ka sang ka lo dawn a. Sûna chun ka sang dangchar a ṭap ta ngat ngat el a, nû ne ne ngaia ṭap a nih. Ka beidawngin ka nu chu ka zuk ko khêk hlaka. Mi loa inhlaw a ni si leiin mi mîtmei a vêng leiin a hung el ngam naw a, ruom khâwk rawng rawnga ka sâng a ṭap lai dam kha hi hrietzingna hin theinghil harsa a ti hlak. Fahra nun kha chu a lo rinum ngawt el!
Tuhnung hin ka ngaituoa, kan sangsiet hun laia ka nu lungril sawl thei ding zie dam, a ngaituona buoi hlak ding zie dam kha aw... Ka nu kha a lo tuorsel ngawt el. Pathienin mak takin hratna le thilthawtheina in anthuom ni ngei a tih.
Puitling hnung chen khawmin chînlai hun harsa khan a mi hung fang châng a um hlaka. Ka ngaituo kîr châng chu tlasietna in a mi tuom rawp hlak. Ka piengzie le hmêl enin mi phet phut, lung inrawm le suol hmel put hlak lang khawm, lung innona rûk tak hi chu neiin kan hriet ve a. Ka chînlai hun tawng khan a mi suk nêm ni ngei dingin ka ring.
Zânrila naute ṭap rawng rawng dâm. Naupang ngaisaktu neilo, khawlaidunga tlasie taka ṭap rawng rawng ka hmu châng dâm hin mihriem lung innona a hung suok a. Hnuk in a mi ul a, mitthli a parawl kuong châng a um hlak. Asanchu, kha nunram kha ka lo pal ve ta hlak annawm...!
Fahra nun kha a tuor hun lai chu rinum hle angin inlang hlak sien khawm, ka ta ding chun malsawmna lampui a lo ni lem hlau el. Fahra a seilien ninaw lang chu vawisûna ka ngîrna hmuna hin ngîr nawng ka ta. Pathien hmangaina le a lunginsietna ropuizie khawm hi man phâk kan ring nawh.
Pathien thil rêl dân hi a mak a. Mihriem ngaituonain a sui phâk naw a, a buoi rawp hlak. Sienkhawm, a tawpa chun ''Ka ta dingin Lalpa a ṭha!" ti naw thei a ni nawh. Khawvel ena mi tlawmtak khawm a mi hmangaia, lunginsietna in a mi chawilien a. Châwlna tuikama mi ṭhuoiin, lâwmna tlângah a mi'n lâwn tir ta lem si a.
11 Sept 2023
Riekmaw Cabin
Post a Comment
Post a Comment