KA ṬAWNGṬAINA NGHIL AM AN TA?

Zantieng bufâk khawp thaw taluo nei loa kan tai vel lai chun, Facebook Messenger a'nthawk call a hung vang vang a, ka zuk en chu 'Lalthlamuong Keivom calling...' ti hi a lo inziek a. Mak ka ti a, zuk lâk el nachâng ka hriet naw a, ka hamhai vel vawng a ni deu tak.

Pu Lalthlamuong Keivom aka L. Keivom hi tu'm a na ti chu i lo la hriet naw a ni el thei. Hmar Literature sûtpui, hrietna kawnga zohnathlak hai library, thu le hla tam tak ziek suok in, lekhabu tam tak a lo ziek ta bawk. Kaisar sin a thaw hai chu hril sa kher da'l ei tih. Zoram Khawvela hin a mikhuol naw hle a, a ma hming hril loin Zoram Khawvel chanchin hi kim thei ngai naw nih. Ngainat a umna hi ziek rawn a ziek suok zo el din ka ring nawh. Ama, Upa Dr Lalzakung in "No subject under the sun is alien to him" a lo ti hin dittawk ve el ei tih. Chuongang lawma pa ropui, hmârnu sula insieng mi ihriet hlaw le ngaisang hrawn. An hril huoi huoi hlak L Keivom ngeiin; kei Hmar Maulien tlangval, kan khuo inkil zie an hril khawma 'khawvel puo' an iti hiel hlak, buher khâwl (rice mill) ti loa khâwl le motor khû in boruok a la suk hnawk ve phak lo a cheng ta ding chun intithei pui awm  in ti ve tho naw maw?  In mi ti pui naw khawmin 'inti' deu ka nih. Kan ti thei pei ding. Ka ti tak tak!

Asanchu, L. Keivom ti hming put hi muolkhanga lo kan riek lai ka lo hriet dai ta annawm. A lekhabu ziek, 'Lalnunnem ka ngai em che' ti le 'Zangkhaw Bungbu' kha thlavar hnuoi, fasuora ngei mitthli le insawp nenga kan lo tiem ve hlak a ni kha tie...

Kan inbiek sung po khan a lekhabu mi hrilfie kha hriet mumal ka nei nawh, 'aw', ka ti liem ve mei mei a nih. Khanga induthaw taka ka thu indawn a mi hrilfie mawl mawl lai khan phone kha ka that chak tlat chu tie, "L Keivom in a mi hung phone a, ka nghawk ema ka that pek ṭawt" ti a ruollaia intitheina ding bek in. Ka lo that naw kha a pawi ta bâk el, a thil mi hril hlak kha hriet mumal nei chuong bar lo. Damsûnga bel-bel ve naw ding ni inla khawm suon le par, ruolṭha hai bul ah, "L Keivom phone that hmak ngam ka ni hi in mi hriet?" ti a tapsaka fûr dumpui hip vung vung malama hril ding bek in...

Thubel (28/11/2021) :

Vawisun tarik 28, 2021 hin Pu L. Keivom chun ropuina ram a mi lo pan san tah ti thu ka hriet in a mi ṭhawnga. Pawm thiem harsa ka tih. A hrietna le thiemna tuihnar in Zoram Khawvel hi la'n chie zawp sien ti a ei beisei zing lai, hieng hin khuo'n a hung rel ta si maw? Kei ngei khawm hin indawn nuom ka la va hau ngei deh!

Zoram Khawvel ta dinga mi hlu. Hmar Ar'si lien a liem ta ie. Ama, P.B Shelly in John Keats a sunna hla hin inthla ve el ei ti maw...

I weep for Adonais—he is dead!

Oh, weep for Adonais! though our tears

Thaw not the frost which binds so dear a head!

And thou, sad Hour, selected from all years

To mourn our loss, rouse thy obscure compeers,

And teach them thine own sorrow, say: "With me

Died Adonais; till the Future dares

Forget the Past, his fate and fame shall be

An echo and a light unto eternity!"

Riekmaw Cabin

May 16, 2020